.jpg)
ជនត្រូវចោទ ក្រោយពេលសមត្ថកិច្ចចាប់ខ្លួនកាលពីថ្ងៃទី២៧ ឧសភា ។ រូបថត ប៉ូលិស
រតនគិរី៖តុលាការខេត្តរតនគិរីកាលពីថ្ងៃទី២៩ឧសភា បានចេញដីកាឃុំជនត្រូវចោទម្នាក់នៅពន្ធនាគារខេត្ត ក្រោយពីចាប់ខ្លួនបាន ២ ថ្ងៃ ពាក់ព័ន្ធករណីរំលោភសេពសន្ថវៈលើកូនស្រីបង្កើតរបស់ខ្លួន ប្រព្រឹត្តនៅឃុំត្រពាំងច្រេស ស្រុកកូនមុំ ខេត្តរតនគិរី។
លោកស្រីកែវ ដាវី ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តរតនគិរី ប្រាប់នៅថ្ងៃទី ៣០ ឧសភាថា សមត្ថកិច្ចរបស់លោកស្រីបានទទួលដីកាឃុំខ្លួនពីតុលាការខេត្តរតនគិរី ដែលបញ្ជាក់ពីជនត្រូវចោទឈ្មោះ ស្រី សាវឿន អាយុ ៤៥ ឆ្នាំ ត្រូវបានចៅក្រមស៊ើបសួរចេញដីកាបង្គាប់ឱ្យសមត្ថកិច្ចរបស់លោកស្រីនាំជនម្នាក់នេះទៅឃុំក្នុងពន្ធនាគារខេត្តពីថ្ងៃទី ២៩ ឧសភា។រីឯក្មេងរងគ្រោះឈ្មោះ ស.ធ អាយុ ៩ ឆ្នាំ។
លោកស្រីថ្លែងថា៖«បុរសនោះត្រូវចោទពីបទរួមភេទជាមួយអនីតិជនក្រោមអាយុ ១៥ ឆ្នាំ តាមបញ្ញត្តិមាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងការពារអនីតិជន»។
យោងតាមបញ្ញត្តិមាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងការពារអនីតិជន ប្រសិនបើតុលាការរកឃើញថាជនត្រូវចោទពិតជាបានប្រព្រឹត្តមែននោះនឹងត្រូវប្រឈមការផ្តន្ទាទោសដាក់ពន្ធនាគារពី ៥ ឆ្នាំទៅ ១០ ឆ្នាំ។
លោកស្រី ដាវី ឱ្យដឹងថា៖«ការបំភ្លឺរបស់ក្មេងស្រីរងគ្រោះឈ្មោះ ស.ធ ប្រាប់សមត្ថកិច្ចខ្ញុំថា នាងត្រូវជាកូនបង្កើតរបស់ជនត្រូវចោទហើយត្រូវបានឪពុករបស់ខ្លួនចាប់រំលោភពិតប្រាកដមែន ប៉ុន្តែនាងមិនចាំពេលម៉ោង និងថ្ងៃណាច្បាស់ទេ ព្រោះអាចមកពីនាងនៅក្មេងពេក»។
យ៉ាងណាក្ដី លោកវរសេនីយ៍ឯក ថេង ចន្ធី អធិការនគរបាលស្រុកកូនមុំប្រាប់ភ្នំពេញប៉ុស្តិ៍នៅថ្ងៃទី ៣០ ឧសភាដោយបានស្រង់សម្តីជនត្រូវចោទថាការចាប់ខ្លួននេះគឺ តាមបណ្តឹងរបស់បងស្រីក្មេងស្រីរងគ្រោះ ក្រោយពីនាងបានឃើញជននេះកំពុងធ្វើសកម្មភាពលើក្មេងរងគ្រោះ ហើយបានរាយការណ៍ប្រាប់អ្នកភូមិ ទើបពលរដ្ឋរាយការណ៍បន្តមកនគរបាលប៉ុស្តិ៍ឃុំត្រពាំងច្រេស រហូតចុះឃាត់ខ្លួននៅថ្ងៃទី ២៧ ឧសភា តែម្តង។
លោកបានរៀបរាប់តាមសម្តីប្រពន្ធជនត្រូវចោទថា គាត់(ប្រពន្ធ) និងជនត្រូវចោទមានកូនចំនួន ៤ នាក់ ប្រុស ២ នាក់ និងកូនស្រី ២ នាក់។ចំណែកក្មេងស្រីរងគ្រោះជាកូនពៅ ហើយដោយសារជនត្រូវចោទជាមនុស្សញៀនស្រា គឺតែងប្រើអំពើហិង្សាលើប្រពន្ធកូនរាល់ថ្ងៃ។ករណីនេះសមត្ថកិច្ចតែងបានហៅជននេះមកអប់រំឱ្យឈប់ប្រព្រឹត្តអំពើហិង្សាតទៅទៀត។ប៉ុន្តែក្រោយមកស្ត្រីជាប្រពន្ធបានយកកូន ៣ នាក់ចុះចេញពីផ្ទះតែជនត្រូវចោទរូបនេះទាមទារឱ្យទុកកូនស្រីពៅ (ក្មេងរងគ្រោះ) នៅជាមួយខ្លួន ។
លោកបន្តថាបន្ទាប់ពីប្រពន្ធចុះចោលបាត់ទៅគឺជនសង្ស័យមិនយកប្រពន្ធទេ ដោយរស់នៅជាមួយកូនស្រីពៅតែ ២ នាក់ឪពុកកូន។ លុះនៅប៉ុន្មានខែចុងក្រោយក្នុងឆ្នាំ ២០២១ នេះ ជនសង្ស័យបានចាប់ក្មេងស្រីរងគ្រោះរំលោភជាច្រើនលើក តែត្រូវបែកការដោយសារបងស្រីរបស់ក្មេងនោះមកទាន់។
បើតាមលោក ចន្ធី «ដោយសារក្មេងនៅតូច មិនចាំខែឆ្នាំអីទេគាត់គ្រាន់តែដឹងថាឪពុកចាប់រំលោភជួនពេលព្រឹក ពេលល្ងាច ហើយពេលយប់ក៏មាន តែក៏មិនចាំប៉ុន្មានដងដែរ»។
លោកប្រាប់ថា ពេលសមត្ថកិច្ចចាប់មកអធិការដ្ឋាននគរបាលរហូតបញ្ជូនដល់ស្នងការដ្ឋាននគរបាលខេត្តរតនគិរីគឺ ជននេះមិនឆ្លើយសារភាពទេ តែនៅដំណាក់កាលតំណាងអយ្យការអមសាលាដំបូងខេត្តរតនគិរីសាកសួរ ទើបគេឆ្លើយសារភាពប្រាប់ព្រះរាជអាជ្ញាថា គាត់បានរំលោភកូនស្រីរបស់គាត់បាន ៤ ដង៕
