.jpg)
ជនសង្ស័យត្រូវបានឃាត់ខ្លួន ក្នុងករណីរឿងដុតសម្លាប់ប្រពន្ធ។ រូបថត ហ្វេសប៊ុក
សៀមរាបៈ ចៅក្រមស៊ើបសួរនៃសាលាដំបូងខេត្តសៀមរាបបានសម្រេចឃុំខ្លួនបុរសម្នាក់កាលពីថ្ងៃទី ៥ ខែមេសា ពីបទឃាតកម្មដោយចេតនា ក្រោយពីជនសង្ស័យបានចាក់សាំងដុតសម្លាប់ប្រពន្ធរបស់ខ្លួនដោយហេតុរឿងប្រចណ្ឌ។
រឿងនេះបានកើតមានឡើងនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាបកាលពីថ្ងៃទី ៤ មេសា ក្រោយមកកងរាជអាវុធហត្ថខេត្តសៀមរាបបានចាប់បញ្ជូនទៅតុលាការភ្លាមៗ ក្រោយពីកើតហេតុ។
លោក យិន ស្រាង អ្នកនាំពាក្យតុលាការខេត្តសៀមរាបបានឲ្យដឹងពីម្សិលមិញថា ជនសង្ស័យឈ្មោះ តាត គង់ អាយុ ៤៥ ឆ្នាំត្រូវបានលោក ស៊ិន សង្ហា ជាចៅក្រមស៊ើបសួរសម្រេចចោទប្រកាន់ពីបទឃាតកម្មដោយចេតនាតាមបញ្ញត្តិមាត្រា ២០០ នៃក្រមព្រហ្មទណ្ឌ និងបញ្ជូនទៅឃុំក្នុងពន្ធនាគារខេត្តសៀមរាបនៅថ្ងៃទី ៥ មេសា ឆ្នាំ ២០២០។
លោកប្រាប់ថា៖ «ជនម្នាក់នោះត្រូវបានចៅក្រម ស៊ិន សង្ហា ចោទប្រកាន់រួចហើយពីម្សិលមិញ (ថ្ងៃទី ៥ មេសា) និងបានឃុំខ្លួនគាត់ហើយដែរ»។
យោងមាត្រា ២០០ នៃក្រមព្រហ្មទណ្ឌនេះប្រសិនបើតុលាការរកឃើញថាជនសង្ស័យពិតជាបានប្រព្រឹត្តបទល្មើសមែននោះនឹងត្រូវតុលាការផ្តន្ទាទោសជាប់ពន្ធនាគារ ១ ជីវិត។
លោក គី សំប៊ុន មេបញ្ជាការកងរាជអាវុធហត្ថស្រុកបន្ទាយស្រីបានឲ្យដឹងកាលពីម្សិលមិញដែរថាស្ត្រីរងគ្រោះឈ្មោះ ជា សាវី អាយុ ៣៧ ឆ្នាំចំណែកជនបង្កជាប្តីឈ្មោះ តាត គង់ ជាមន្ត្រីយោធាមានតួនាទីអនុសេនីយ៍ឯកជាជំនួយការរបស់អង្គភាពវរសេនាតូចការពារអាកាសនៃកងពលធំអន្តរាគមន៍លេខ ២ មានទីតាំងឈរជើងនៅចំណុចក្បាលរហាលក្នុងឃុំត្បែង ស្រុកបន្ទាយស្រី ខេត្តសៀមរាប និងមានលំនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប។
លោក គី សំប៊ុន បានឲ្យដឹងថា ជនសង្ស័យបានយកដបសាំងទៅចាក់ដុតប្រពន្ធដែលកំពុងដេកក្នុងអង្រឹងក្រោយពីទទួលបានទូរស័ព្ទពីបុរសម្នាក់បានអះអាងថា បានធ្លាប់ដេកជាមួយស្ត្រីរងគ្រោះតាំងពីឆ្នាំ ២០១៩។ ភ្លើងបានឆេះលើស្ត្រីរងគ្រោះដែលកំពុងដេកក្នុងអង្រឹងបណ្តាលឲ្យរលាករលួយពេញខ្លួន រីឯជនសង្ស័យជាប្តីក៏ត្រូវភ្លើងឆាបឆេះត្រូវក្បាល និងត្រចៀកខ្លះដែរ។ ភ្លាមៗនោះយោធាដែលនៅក្នុងបន្ទាយនៃកងពលធំអន្តរាគមន៍លេខ ២ នាំគ្នាជួយពន្លត់ភ្លើង និងជួយសង្ក្រោះស្ត្រីរងគ្រោះ និងជនសង្ស័យដឹកយកទៅមន្ទីរពេទ្យ។
លោកថា៖ «អង្រឹងនោះជ័រហើយត្រូវភ្លើងឆេះទៀតដូចគេដុតថង់ប្លាស្ទិកបន្តក់លើសាច់មនុស្សអ៊ីចឹងគឺវាឆេះរុំជាប់នឹងសាច់តែម្តង»។
លោក គី សំប៊ុន ប្រាប់បន្តថា ស្ត្រីរងគ្រោះត្រូវបានដឹកយកទៅសង្គ្រោះនៅមន្ទីរពេទ្យបង្អែកស្រុកបន្ទាយស្រី តែដោយសារស្ថានភាពភ្លើងរលាកខ្លាំងពេកបានដាច់ខ្យល់ស្លាប់នៅមន្ទីរពេទ្យក្រោយពីសម្រាកបាន ១ យប់រីឯជនសង្ស័យជាប្តីក៏ត្រូវយោធាក្នុងបន្ទាយយកទៅព្យាបាលនៅមន្ទីរពេទ្យបង្អែកស្រុកបន្ទាយស្រីដែរតែយោធាបានប្រគល់ជនសង្ស័យមកឲ្យកម្លាំងកងរាជអាវុធហត្ថរបស់លោកយាមកាម ដើម្បីព្យាបាលរបួស៕
