កំពង់ឆ្នាំង៖ ចៅក្រមសាលាដំបូងខេត្តកំពង់ឆ្នាំង បានឃុំខ្លួនបុរសឈ្មោះ ភឹម ផាយផាត់ អាយុ ៣៩ ឆ្នាំ ជនជាតិខ្មែរ មានលំនៅក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ នៅក្នុងពន្ធនាគារពាក់ព័ន្ធនឹងករណីកាត់តប្រសាសន៍លោកនាយករដ្ឋមន្ត្រីបង្ហោះតាម TikTok ខុសពីការពិតដែលបង្កឱ្យមានភាពចលាចលក្នុងសង្គម។
លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំងប្រាប់ ភ្នំពេញ ប៉ុស្តិ៍ នៅថ្ងៃនេះថា ឈ្មោះ ភឹម ផាយផាត់ ត្រូវបានសម្រេចឃុំខ្លួនដាក់ពន្ធនាគារជាបណ្តោះអាសន្នដោយលោក សុខ ឧត្តម ជាចៅក្រមស៊ើបសួរនៃសាលាដំបូងខេត្តកំពង់ឆ្នាំង។
យ៉ាងណាក្ដី លោក អ៊ិត សុធា មិនបានបញ្ជាក់ពីបទចោទលើបុរសរូបនេះនោះទេ ដោយលោកបានបង្វែរឱ្យសួរទៅលោកចៅក្រមស៊ើបសួរដោយផ្ទាល់។ ប៉ុន្តែ លោក អៀរ ប៊ុនធឿន ស្នងការរង និងជាអ្នកនាំពាក្យស្នងការដ្ឋាននគរបាលខេត្តកំពង់ឆ្នាំងប្រាប់ ភ្នំពេញ ប៉ុស្តិ៍ កាលពីម្សិលមិញថា ឈ្មោះ ភឹម ផាយផាត់ កាក់តសំឡេងថ្នាក់ដឹកនាំបង្ហោះលើបណ្តាញសង្គម Tik Tok ខុសពីការពិត និង «ញុះញង់ឱ្យមានចលាចលក្នុងសង្គម» ស្របពេលដែលកម្ពុជាកំពុងប្រយុទ្ធប្រឆាំងនឹងជំងឺកូវីដ ១៩។
លោកស្នងការរងបានបន្តថា ឈ្មោះ ភឹម ផាយផាត់ បានកាត់តសំឡេងថ្នាក់ដឹកនាំខ្លី (លោកនាយករដ្ឋមន្ត្រី ហ៊ុន សែន) ដែលបានមានប្រសាសន៍កាលពីឆ្នាំ ២០២០ ថា នៅបិទមិនឱ្យចេញដើរហើររយៈពេល ៣ ខែទៀត ដែលធ្វើឱ្យមានភាពចលាចលក្នុងសង្គម។
លោក អៀរ ប៊ុនធឿន បានបញ្ជាក់ថា៖ «គាត់កាត់តប្រសាសន៍ថ្នាក់ដឹកនាំមកលេង TikTok ខុសពីការពិត។ គាត់បង្ហោះថ្ងៃទី ២៣ មេសា នៅវេលាម៉ោង ៥ ល្ងាច ហើយក្រោយគាត់បង្ហោះ យើងក៏បានស្រាវជ្រាវចាប់ខ្លួនគាត់នៅថ្ងៃទី ២៤ មេសា»។
យោងតាមមាត្រា ៤៩៦ នៃក្រមព្រហ្មទណ្ឌចែងថា អំពើញុះញង់តាមមធ្យោបាយណាមួយដែលមានចែងនៅក្នុងមាត្រា ៤៩៤ (លក្ខខណ្ឌអត្ថិភាពនៃការញុះញុង) នៃក្រមនេះ ឱ្យមានការប្រព្រឹត្តការរើសអើង ការគុំកួន ឬហិង្សាចំពោះបុគ្គលណាម្នាក់ ឬក្រុមណាមួយ ដោយមូលហេតុបុគ្គលនោះជាសមាជិក ឬមិនមែនសមាជិកនៃជាតិពន្ធុ ក្រុមជាតិ ពូជសាសន៍ ឬនៃសាសនាណាមួយជាកំណត់នោះ ត្រូវផ្តន្ទាទោសដាក់ពន្ធនាគារពី ១ ទៅ ៣ ឆ្នាំ និងពិន័យជាប្រាក់ចាប់ពី ២ លានរៀល ទៅ ៦ លានរៀល៕