.jpg)
ពោធិ៍សាត់ៈ សាលាដំបូងខេត្តពោធិ៍សាត់ពីថ្ងៃទី ២ កញ្ញា បានឃុំខ្លួនបុរសម្នាក់ភ្លាមៗបន្ទាប់ពីសមត្ថកិច្ចចាប់បញ្ជូនដល់តុលាការ ករណីកាប់យុវជនម្នាក់ស្លាប់នៅភូមិកំរែង ឃុំស្វាយស ស្រុកក្រគរ ខេត្តពោធិ៍សាត់ ប្រព្រឹត្តកាលពីឆ្នាំ ២០១០។
លោក ឧត្ដមសេនីយ៍ត្រី ម៉ូ លីដា ស្នងការរងនគរបាលខេត្តពោធិ៍សាត់បានឲ្យដឹងពីម្សិលមិញថា បុរសត្រូវចោទឈ្មោះ ណាត ដា អាយុ ៣០ ឆ្នាំ រស់នៅភូមិ-ឃុំ-ខាងលើត្រូវបានតុលាការខេត្តបញ្ជូនទៅឃុំនៅពន្ធនាគារខេត្តហើយ។ សមត្ថកិច្ចចាប់បានជននេះនៅថ្ងៃ ១ កញ្ញា តាមដីកាចុះថ្ងៃ ១៤ ធ្នូ ឆ្នាំ ២០១០។
លោកបន្តថា បន្ទាប់ពីបញ្ជូនដល់តុលាការនៅថ្ងៃទី ២ កញ្ញាភ្លាមក៏ត្រូវអយ្យការអមសាលាដំបូងខេត្តបើកសវនាការជំនុំជម្រះភ្លាមៗដែរ ហើយបានចោទប្រកាន់ពីបទមនុស្សឃាតដោយចេតនាដូចក្នុងដីកាបង្គាប់ឲ្យចាប់ខ្លួន ចេញដោយលោកចៅក្រមស៊ើបសួរ ថោង អុល នៃសាលាដំបូងខេត្តពោធិ៍សាត់។
លោក ឡាំ ជឿន នាយនគរបាលប៉ុស្តិ៍ឃុំស្វាយ ស ប្រាប់ពីម្សិលមិញថា ករណីសម្លាប់មនុស្សនេះកើតពីជម្លោះក្នុងពេលមានពិធីរាំកម្សាន្តបុណ្យពូនភ្នំស្រូវនៅភូមិកំរែង តាំងពីយប់ថ្ងៃទី ១ មករា ឆ្នាំ ២០១០ មក។
លោកបន្តថា ជម្លោះនេះកើតឡើងរវាងយុវជន ២ ក្រុម ប៉ុន្តែក្រុមបង្កបានយកចបកាប់ និងដំបងវាយ និងកាប់យុវជនឈ្មោះជ្រូក អាយុ ២០ ឆ្នាំ (២០១០) ស្លាប់នៅកន្លែងកើតហេតុ ដោយមានឈ្មោះ ណាត ដា ជាជនដៃដល់តែពួកគេបានគេចខ្លួន។
លោក ឡាំ ជឿន បន្តថា ក្រោយមកសមត្ថកិច្ចបានធ្វើកំណត់ហេតុបញ្ជូនទៅសាលាដំបូងខេត្តទើបចេញដីកាឲ្យតាមចាប់ខ្លួនជនដៃដល់មកផ្តន្ទាទោស។
លោកថា តាមចម្លើយជនត្រូវចោទថា បន្ទាប់ពីសម្លាប់ជនរងគ្រោះរូបគេបានរត់ទៅសំងំរស់នៅក្នុងភូមិកំពង់ចម្លងលើ ឃុំតាក្របី ស្រុកកំរៀង ខេត្តបាត់ដំបង ហើយពេលលួចចូលស្រុកវិញក៏ត្រូវសមត្ថកិច្ចចាប់ខ្លួនបានតែម្តង៕
