.jpg)
មន្ត្រីនគរបាលរងរបួសបាក់ជើង ដោយសារបុរស ២ នាក់វៃ។ រូបថត នគរបាល
កំពង់ឆ្នាំងៈ មន្ត្រីនគរបាលខេត្តកំពង់ឆ្នាំងបានអះអាងកាលពីថ្ងៃទី ២៧ មករា ថា បុរស ២ នាក់ ដែលបានវ៉ៃមន្ត្រីនគរបាលប៉ុស្ដិ៍រដ្ឋបាលសង្កាត់ខ្សាម ក្រុងកំពង់ឆ្នាំងឲ្យរបួសបាក់ជើងខាងស្តាំម្ខាងនោះត្រូវបានសាលាដំបូងខេត្តនេះសម្រេចឃុំខ្លួនបណ្តោះអាសន្នហើយដោយចោទពីបទប្រើប្រាស់ហិង្សាដោយចេតនាស្ថានទម្ងន់ទោស។
លោក ប៉ុល វុទ្ធី ស្នងការរងនគរបាលខេត្តកំពង់ឆ្នាំងបានថ្លែងថា ជនសង្ស័យទាំង ២ នាក់ នេះមានឈ្មោះ ពៅ ប៉ុន អាយុ ២៩ ឆ្នាំ និងឈ្មោះ រ៉េត សារ៉ន អាយុ ២៩ ឆ្នាំ រស់នៅក្នុងសង្កាត់ខ្សាមក្រុង-ខេត្តកំពង់ឆ្នាំង។ ពួកគេត្រូវបានសាលាដំបូងខេត្តសម្រេចឃុំខ្លួនកាលពីរសៀលថ្ងៃចន្ទទី ១៧ ខែមករា ពាក់ព័ន្ធករណីវ៉ៃមន្ត្រីនគរបាលឈ្មោះ សួស សារី បណ្ដាលឲ្យបាក់ជើងខាងស្តាំ ខណៈគាត់ (នគរបាល) បានចូលឃាត់ជម្លោះពួកគេកាលពីព្រឹកថ្ងៃទី ២៦ ខែមករា នៅក្នុងភូមិទី ៦ សង្កាត់ខ្សាម ក្រុង-ខេត្តកំពង់ឆ្នាំង។
លោកបានបញ្ជាក់ថា៖ «តុលាការខេត្តកំពង់ឆ្នាំងបានសម្រេចចោទប្រកាន់ជនសង្ស័យទាំង ២ នាក់ ពីបទហិង្សាដោយចេតនាមានស្ថានទម្ងន់ទោសហើយបានបញ្ជូនទៅពន្ធនាគាខេត្តរួចហើយ។ មន្ត្រីនគរបាលគាត់ឃើញបទល្មើសគាត់ក៏ទៅអន្តរាគមន៍ដើម្បីហាមឃាត់តែជនសង្ស័យបានវាយរហូតដល់គាត់បាក់ឆ្អឹងជើងខាងស្តាំ» ។
លោក ឆាយ ខែមរ័ត្ន អធិការនគរបាលក្រុងកំពង់ឆ្នាំងបានឲ្យដឹងថា មុនកើតហេតុ ក្រុមខាងលើបាននាំគ្នាផឹកស៊ីស្រវឹង ហើយបានទាស់សម្តី។ បន្ទាប់មកលោក សួស សារី បានចូលទៅឃាត់ខណៈជនដៃដល់កំពុងយកបំពង់ទីបវ៉ៃលើគូទំនាស់ តែមិនត្រូវក៏បែរជាមកត្រូវមន្ត្រីនគរបាលនោះបាក់ជើងស្តាំទៅវិញ។
លោកបានបញ្ជាក់ថា៖ «ពេលពួកគេកំពុងវ៉ៃគ្នាទៅវិញទៅមក ប៉ូលិសគាត់បានចុះទៅអន្តរាគមន៍ និងឃាត់ជនសង្ស័យទាំង ២ ហ្នឹងមិនមានបំណងយកបំពង់ទីបវ៉ៃទៅលើប៉ូលិសទេ តែដោយសារពួកគេទប់ដៃមិនជាប់ក៏ត្រូវប៉ូលិសវាគឺជារឿងអចេតនា។ ជនរងគ្រោះកំពុងសម្រាកព្យាបាលនៅមន្ទីរពេទ្យ»។
លោកបានបន្ថែមថា កម្លាំងសមត្ថកិច្ចបានឃាត់ខ្លួនជនសង្ស័យទាំង ២ នាក់ក្រោយពីពួកគេបានបង្កហិង្សាលើជនរងគ្រោះ ហើយត្រូវបានបញ្ជូនមកអធិការដ្ឋាននគរបាលក្រុងកំពង់ឆ្នាំងមុនពេលបញ្ជូនបន្តទៅស្នងការដ្ឋាននគរបាលខេត្ត។
លោកបានបន្ថែមថា កាលពីព្រឹកថ្ងៃទី ២៧ ខែមករា លោក ខូវ លី ស្នងការនគរបាលខេត្តកំពង់ឆ្នាំងបានដឹកនាំមន្ត្រី នគរបាលខេត្តទៅសួរសុខទុក្ខ និងនាំយកអំណោយជូនមន្ត្រីនគរបាលរងគ្រោះនោះ ខណៈគាត់កំពុងសម្រាកព្យាបាលនៅមន្ទីរពេទ្យបង្អែកខេត្ត។
សូមបញ្ជាក់ថាកាលពីថ្ងៃទី ១៨ ខែមករា នៅខេត្តកំពង់ស្ពឺក៏ធ្លាប់មានករណីស្រដៀងគ្នានេះដែរ ដោយសមត្ថកិច្ចខេត្តកំពង់ស្ពឺនេះបានឃាត់ខ្លួនបុរសវ័យ ២៨ ឆ្នាំម្នាក់ ឈ្មោះ ទូច ហេង បន្ទាប់ពីបុរសរូបនេះបានបាញ់នាយរងប៉ុស្តិ៍នគរបាលឃុំចំបក់ ក្នុងស្រុកភ្នំស្រួចម្នាក់បណ្ដាលស្លាប់ និងនាយប៉ុស្តិ៍ម្នាក់រងម្នាក់ទៀតរបួសធ្ងន់ ខណៈសមត្ថកិច្ចរងគ្រោះទាំង ២ រូបចុះអន្តរាគមន៍ក្នុងជម្លោះកាប់ចាក់គ្នា រវាងជនសង្ស័យ និងភាគីម្ខាងទៀត៕
