.jpg)
ជនសង្ស័យទាំង ៣ នាក់ ត្រូវបានសមត្ថកិច្ចធ្វើការចាប់ឃាត់ខ្លួន ករណីហិង្សាដោយចេតនា។ រូបថត ប៉ូលិស
ស្ទឹងត្រែង៖ ជនសង្ស័យ ៣ នាក់ក្នុងចំណោមបក្ខពួក ១២ នាក់ ត្រូវបានតុលាការខេត្តស្ទឹងត្រែងសម្រេចឃុំខ្លួនដាក់ពន្ធនាគារជាបណ្ដោះអាសន្ន ដោយចោទប្រកាន់ក្នុងម្នាក់ៗ ២ បទល្មើស រួមមានបទ «លួច» និង បទ «ហិង្សាដោយចេតនា មានស្ថានទម្ងន់ទោស» ប្រព្រឹត្តទៅលើស្ត្រីមានផ្ទៃពោះ ២ នាក់ ដែលជាអ្នករស់នៅក្នុងភូមិជាមួយគ្នាបណ្ដាលឲ្យស្លាប់ទារកក្នុងផ្ទៃម្នាក់។ នេះបើតាមការប្រាប់ឲ្យដឹងពីមន្ត្រីនាំពាក្យតុលាការខេត្តស្ទឹងត្រែង។
លោក គឹម ហុងសាន អ្នកនាំពាក្យសាលាដំបូងខេត្តស្ទឹងត្រែង បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ០៥ ខែឧសភាថា ជនត្រូវចោទក្នុងបទល្មើសទាំង ២ នេះ រួមមានឈ្មោះ ទុន សាវុន អាយុ ៤២ ឆ្នាំ សឿន ហ្វង អាយុ ៣៩ ឆ្នាំ និង ឈ្មោះ លឿ រចនា អាយុ ៣៧ ឆ្នាំ។ អ្នកទាំង ៣ គឺជាបងប្អូនសាច់ថ្លៃនឹងគ្នា មានទីលំនៅភូមិស្វាយរៀង ឃុំតាឡាត ស្រុកសេសាន ខេត្តស្ទឹងត្រែង។
ចំណែកស្ត្រីរងគ្រោះ ២ នាក់ ដែលត្រូវបានក្រុមជនត្រូវចោទ ព្រួតគ្នាវាយរហូតបណ្ដាលឲ្យស្លាប់កូនក្នុងផ្ទៃម្នាក់នោះមានឈ្មោះ ដន ណា អាយុ ២៩ ឆ្នាំ មានផ្ទៃពោះ ៦ ខែ និងឈ្មោះ វី ដួង អាយុ ២២ ឆ្នាំ មានផ្ទៃពោះ ៣ ខែ។
លោកបានបន្តថា ពួកគេទាំង ៣ នាក់ ត្រូវបានកម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តស្ទឹងត្រែងចាប់ឃាត់ខ្លួនកាលពីថ្ងៃទី ០៣ ខែ ឧសភា ឆ្នាំ ២០២១ ក្រោយពីទារកក្នុងផ្ទៃស្ត្រីរងគ្រោះឈ្មោះ វី ដួង ត្រូវបានក្រុមគ្រូពេទ្យជំនាញនៃមន្ទីរពេទ្យខេត្តស្ទឹងត្រែងអះអាងថា បានស្លាប់នៅក្នុងផ្ទៃដោយសារស្ត្រីជាម្ដាយបានរងនូវការវាយប្រហារធ្ងន់ធ្ងរពីក្រុមជនត្រូវចោទទាំង ៣។ ពួកគេត្រូវបានមន្ត្រីនគរបាលជំនាញកសាងសំណុំរឿងចោទប្រកាន់ក្នុងបទល្មើស ហិង្សាដោយចេតនា និងបានបញ្ជូនមកកាន់តុលាការនៅរសៀលថ្ងៃទី ០៤ ខែ ឧសភា ឆ្នាំ ២០២១។
លោក ហុង សាន បានបញ្ជាក់ថា៖ «ប៉ុន្តែនៅរសៀលថ្ងៃទី ០៥ ខែឧសភា តំណាងអយ្យការ និងចៅក្រមស៊ើបសួរនៃសាលាដំបូងខេត្តស្ទឹងត្រែង បានរកឃើញថា ពួកគេបានប្រព្រឹត្តបទលួចយកធុងបាញ់ថ្នាំសម្លាប់សត្វល្អិតរបស់គ្រួសារស្ត្រីរងគ្រោះ មុនពេលពួកគេព្រួតគ្នាវាយទៅលើស្ត្រីរងគ្រោះទាំង ២»។
លោកបានបន្ថែមថា៖ «បន្ទាប់ពីបញ្ចប់នីតិវិធីស៊ើបសួរ ពួកគេទាំង ៣ នាក់ ត្រូវបានតុលាការសម្រេចចោទប្រកាន់ក្នុងម្នាក់ៗ ២ បទល្មើស រួមមានបទលួច តាមបញ្ញតិមាត្រា ៣៥៦ នៃក្រមព្រហ្មទណ្ឌ និងបទហិង្សាដោយចេតនាមានស្ថានទម្ងន់ទោសតាមបញ្ញតិមាត្រា ២១៩ នៃក្រមព្រហ្មទណ្ឌ និងបានបង្គាប់ឲ្យមន្ត្រីនគរបាលយុត្តិធម៌នាំពួកគេទៅឃុំខ្លួនក្នុងពន្ធនាគារខេត្តជាបណ្ដោះអាសន្ន»។
យោងតាមបទចោទទាំង ២ ក្រុមជនត្រូវចោទទាំង ៣ នឹងត្រូវប្រឈមការផ្ដន្ទាទោសជាប់ពន្ធនាគារក្នុងម្នាក់ៗពី ២ ឆ្នាំ ៦ ខែ ទៅ ៨ ឆ្នាំ និងពិន័យជាប្រាក់ពី ៥ លានរៀល ដល់ ១៦ លានរៀល។ ព្រោះបទលួចដែលត្រូវបានចោទក្នុងមាត្រា ៣៥៦ នៃក្រមព្រហ្មទណ្ឌបានកំណត់ការផ្ដន្ទាទោសជាប់ពន្ធនាគារពី ៦ ខែ ដល់ ៣ ឆ្នាំ និងពិន័យជាប្រាក់ពី ១ លានរៀល ដល់ ៦ លានរៀល។ ចំណែកបទហិង្សាដោយចេតនាមានស្ថានទម្ងន់ទោស ដែលត្រូវបានចោទក្នុងមាត្រា ២១៩ នៃក្រមព្រហ្មទណ្ឌបានកំណត់ការផ្ដន្ទាទោសជាប់ពន្ធនាគារ ពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លានរៀល ដល់ ១០ លានរៀល។
ទោះជាបែបណាក៏ដោយ លោក សល់ ច្រូច ដែលជាប្ដីរបស់ស្ត្រីរងគ្រោះឈ្មោះ វី ដួង បានប្រាប់ ភ្នំពេញ ប៉ុស្តិ៍ថា នៅក្នុងអំពើហិង្សានោះ ក្រុមជនត្រូវចោទមានគ្នា ១២ នាក់ ក្នុងនោះម្នាក់ជាមេឃុំតាឡាត ឈ្មោះ សឿន ខង ផងដែរ។ លោកបានបន្តថា នៅពេលនេះ លោកមេឃុំរូបនោះ និងសមាជិកគ្រួសារគាត់ជាច្រើននាក់ទៀត មិនត្រូវបានសមត្ថកិច្ចចាប់ឃាត់ខ្លួននោះទេ។
លោកសល់ ច្រូច បាននិយាយថា៖ «គាត់ជាមេឃុំមិនបានឃាត់ ឬរារាំងកូនប្រុស ស្រី និងកូនប្រសារ រួមទាំងចៅៗរបស់គាត់ កុំឲ្យបង្កហិង្សាវាយមកលើប្រពន្ធ និងបងថ្លៃស្រីរបស់ខ្ញុំដែលមានផ្ទៃពោះនោះទេ ថែមទាំងបានមកទាត់ធាក់ប្រពន្ធ និងបងថ្លៃស្រីខ្ញុំរហូតដល់ស្លាប់កូនក្នុងផ្ទៃ ៣ ខែទៀត។ ក្នុងករណីនេះ គ្រួសារខ្ញុំ និងគ្រួសារបងថ្លៃស្រីខ្ញុំ ទាមទារសំណងជំងឺចិត្តសរុប ៦ ម៉ឺនដុល្លារ និងសូមឲ្យសមត្ថកិច្ចតុលាការផ្ដន្ទាទោសពួកគេទៅតាមនីតិវិធីច្បាប់ ដែលមានជាធរមាន»។
បើតាមលោក សល់ ច្រូច ករណីហិង្សានោះបានកើតចេញពីបុរសទាំង ៣ ដែលត្រូវបានជាប់ឃុំនោះ បានលួចយកធុងបាញ់ថ្នាំសម្លាប់សត្វល្អិត ពីទីតាំងចម្ការស្វាយចន្ទីរបស់ឪពុកក្មេករបស់គាត់កាលពីថ្ងៃទី ២២ ខែ មេសា ឆ្នាំ ២០២១ គ្រាដែលមានភ្លើងឆេះព្រៃកើតឡើងក្បែរចម្ការស្វាយចន្ទីរបស់ឪពុកក្មេករបស់គាត់។
លុះដល់មានអ្នកជិតខាងរាយការណ៍ប្រាប់ឪពុកក្មេករបស់គាត់ អំពីករណីនោះ ប្រពន្ធគាត់បានទៅប្ដឹងមេភូមិ និងប្រជាការពារភូមិឲ្យជួយដឹងឮជាមុន ដើម្បីទៅស្នើសុំយកធុងបាញ់ថ្នាំសម្លាប់សត្វល្អិតនោះត្រឡប់មកវិញ ហើយក៏ត្រូវក្រុមគ្រួសាររបស់លោកមេឃុំតាឡាត នាំគ្នាព្រួតវាយតែម្ដង៕
