.jpg)
ស្រ្តីត្រូវចោទពេលចាប់ខ្លួន។ នគរបាល
កណ្ដាលៈ សាលាដំបូងខេត្តកណ្តាលបានចោទប្រកាន់ និងបញ្ជូនខ្លួនស្ត្រីម្នាក់ទៅឃុំខ្លួនក្នុងពន្ធនាគារខេត្ត កាលពីថ្ងៃទី ១៨ មករា បន្ទាប់ពីសមត្ថកិច្ចតាមចាប់ខ្លួនបាននៅខេត្តកំពង់ធំកាលពីថ្ងៃ ១៧ មករា ពាក់ព័ន្ធករណីរឹតកសម្លាប់ស្ត្រីចងការប្រាក់ម្នាក់កាលពីថ្ងៃទី ១៤ មករា នៅភូមិបឹង ឃុំរកាស្រុកកណ្តាលស្ទឹងខេត្តកណ្តាល។
លោក សូ សារិន អ្នកនាំពាក្យសាលាដំបូងខេត្តកណ្តាលបានប្រាប់ពីម្សិលមិញថា ស្ត្រីឈ្មោះ សុខ ចាន់ថា អាយុ ៣៦ ឆ្នាំដែលបានសម្លាប់ស្ត្រីរងគ្រោះឈ្មោះ ឈុន ទូ អាយុ ៥៦ ឆ្នាំ ជាអ្នករកស៊ីចងការប្រាក់ត្រូវចៅក្រមស៊ើបសួរសាលាដំបូងខេត្តកណ្តាលចោទប្រកាន់ហើយកាលពីថ្ងៃទី ១៨ ខែមករា។
លោកបញ្ជាក់ថា៖ «ស្ត្រីជាជនដៃដល់ ត្រូវបានចៅក្រមស៊ើបសួរ លោកស្រី ពេជ្រ ម៉ារ៉ែន ចោទប្រកាន់ និងឃុំខ្លួនបណ្តោះអាសន្នហើយនៅពន្ធនាគារខេត្ត។ ស្ត្រីម្នាក់នេះត្រូវចោទពីបទឃាតកម្មគិតទុកជាមុនតាមបញ្ញត្តិ មាត្រា ២០០ នៃក្រមព្រហ្មទណ្ឌ»។
យោងតាមបញ្ញតិ្តមាត្រា ២០០ នៃក្រមព្រហ្មទណ្ឌ ប្រសិនបើតុលាការរកឃើញមានកំហុសមែននោះ ស្ត្រីត្រូវចោទត្រូវប្រឈមនឹងការផ្តន្ទាទោសដាក់ពន្ធនាគារអស់ ១ ជីវិត។
ពាក់ព័ន្ធនឹងការតាមចាប់ខ្លួនស្ត្រីត្រូវចោទនេះ លោក រឿន ណារ៉ា ស្នងការរងនគរបាលខេត្តកណ្តាល បានប្រាប់ភ្នំពេញប៉ុស្តិ៍កាលពីម្សិលមិញថា បន្ទាប់ពីធ្វើសកម្មភាពឃាតកម្មរួច ស្ត្រីត្រូវចោទ បានរត់គេចខ្លួនទៅខេត្តកំពង់ស្ពឺ រួចបន្តទៅខេត្តតាកែវ ហើយចុងក្រោយទៅលាក់ខ្លួននៅខេត្តកំពង់ធំ។ ក្នុងពេលគេចខ្លួននោះស្ត្រីត្រូវចោទបាននាំប្តី និងកូន ៣ នាក់ រត់ទៅតាមខ្លួនដែរ តែករណីនេះបុរសជាប្តីមិនជាប់ពាក់ព័ន្ធទេ។
លោកបានបញ្ជាក់ថា៖ «ស្ត្រីត្រូវចោទបន្ទាប់ពីសម្លាប់ស្ត្រីរងគ្រោះរួចបានប្រាប់ប្តីថា ទៅលេងបងប្អូន ហើយប្តីនិងកូនក៏ទៅតាម ប៉ុន្តែក្រោយមកទើបប្រាប់ប្តី។ ដូច្នេះក្រោយពីសមត្ថកិច្ចស្រាវជ្រាវទៅឃើញថាប្តីនោះមិនជាប់ពាក់ព័ន្ធនឹងឃាតកម្មនេះទេ»។
លោកប្រាប់ថា ក្រោយឃាត់ខ្លួនសមត្ថកិច្ចដកហូតបានវត្ថុតាងប្រាក់ដុល្លារចំនួន ៦៣២ ដុល្លាររួមនឹងខ្សែកខ្សែដៃរបស់ស្ត្រីរងគ្រោះមកវិញហើយ។
បើតាម លោក រឿន ណារ៉ា ស្ត្រីត្រូវចោទ បានសារភាពថា មូលហេតុដែលខ្លួនធ្វើបែបនេះលើជនរងគ្រោះដោយសារគាត់ជំពាក់បំណុលគេក្នុងភូមិច្រើន និងធនាគារទៀត។ ដោយសារតែម្ចាស់បំណុលចោមរោមទារលុយច្រើនពេក គាត់ក៏គិតគម្រោងថា ធ្វើយ៉ាងណារកប្រាក់យកមកដោះស្រាយបំណុលនេះហើយបានរៀបចំខ្សែអង្រឹង ត្រៀមទុកក្នុងហោប៉ៅខោរួចរកឱកាសសម្លាប់ជនរងគ្រោះយកលុយតែម្តង។
លោកបន្តថា បន្ទាប់មក ស្ត្រីត្រូវចោទបានជិះម៉ូតូ ទៅផ្ទះស្ត្រីរងគ្រោះនៅពេលថ្ងៃត្រង់ ហើយគោះទ្វារ ហៅស្ត្រីរងគ្រោះរួចចូលទៅអង្គុយមើលទូរទស្សន៍ក្នុងផ្ទះជនរងគ្រោះ បន្ទាប់មកជនរងគ្រោះបាននាំខ្លួនចូលមើលកម្រាលពូកថ្មី នៅក្នុងបន្ទប់។ ពេលមានឱកាសស្ត្រីត្រូវចោទក៏បានយកខ្សែអង្រឹងរឹតកហើយ ប្រវាយប្រតប់គ្នា ហើយជនរងគ្រោះដណ្ដើមបានខ្សែអង្រឹងហើយរឹតកស្ត្រីត្រូវចោទវិញ តែត្រូវស្ត្រីដៃដល់ច្របាច់ក និងរឹតកបន្ថែមរហូតជនរងគ្រោះស្លាប់។
លោកបន្តតាមសម្តីសារភាពរបស់ស្ត្រីត្រូវចោទថា ក្រោយសម្លាប់រួច ខ្លួនបានយកខ្សែដៃ ១ ខ្សែនិងខ្សែកប្លាទីន ១ ខ្សែ របស់ជនរងគ្រោះ ហើយដើរមកទាញថតទូជ័របើកឃើញកូនកាបូប ដាក់លុយ នៅក្រោមខោអាវ ក៏ដកយកលុយដុល្លារក្រដាស ១០០ និងក្រដាស ៥០ ក្រដាស ២០ ខ្លះ រួមទាំងលុយខ្មែរផងហើយគេចខ្លួន៕
