មណ្ឌលគិរី: ជនសង្ស័យ ១៣ នាក់ ត្រូវបានមន្ត្រីជំនាញក្រសួងបរិស្ថានឃាត់ខ្លួនបញ្ជូនសំណុំរឿងទៅសាលាដំបូងខេត្តមណ្ឌលគិរី និងមានការឃុំខ្លួនជាបន្តបន្ទាប់កាលពីខែមេសា ពាក់ព័ន្ធនឹងការទន្ទ្រានកាន់កាប់ដីព្រៃក្នុងដែនជម្រកសត្វព្រៃ ៤ ទីតាំងនៅក្នុងខេត្តនេះ ខណៈមន្ត្រីអះអាងថា តំបន់ទាំងនេះកំពុងប្រឈមនឹងសកម្មភាពវាតយកដី និងទិញលក់ខុសច្បាប់។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងកាលពីថ្ងៃ ០២ ឧសភាថាកាលពីខែមេសាមានមេខ្លោង និងជនល្មើស ១៣ នាក់ ត្រូវបានសាលាដំបូងខេត្តមណ្ឌលគិរីចោទប្រកាន់ និងឃុំខ្លួនជាបន្តបន្ទាប់ពាក់ព័ន្ធករណីទន្ទ្រានកាន់កាប់ដីព្រៃជាច្រើនហិកតាយកធ្វើជាកម្មសិទ្ធិនៅស្រុកកោះញែកក្នុងដែនជម្រកសត្វព្រៃភ្នំព្រេច ដែនជម្រកសត្វព្រៃស្រែពក ដែនជម្រកសត្វព្រៃណាមលៀរ និងដែនជម្រកសត្វព្រៃកែវសីមាដែលត្រូវបានការពារដោយច្បាប់ស្តីពីតំបន់ការពារធម្មជាតិ។
លោកបន្តថា ជនល្មើសទាំង ១៣ នាក់នោះ ត្រូវបានសាលាដំបូងខេត្តមណ្ឌលគិរី អនុវត្តវិធានការច្បាប់ដោយចោទប្រកាន់តាមបញ្ញត្តិមាត្រា ៥៦,៦០ និង ៦២ ដែលជាបទល្មើសធនធានធម្មជាតិថ្នាក់ទី ៤ នៃច្បាប់ស្ដីពីតំបន់ការពារធម្មជាតិ។
លោកបន្ថែមថា ក្រុមជនល្មើសទាំងនេះបានប្រើល្បិចកលផ្សេងៗគ្នាក្នុងការទន្ទ្រានកាន់កាប់ដីព្រៃរដ្ឋខុសច្បាប់នៅតំបន់ការពារធម្មជាតិ ដើម្បីបន្លំថា ក្រុមខ្លួនបានរស់នៅ និងអាស្រ័យផលលើដីនោះជាយូរឆ្នាំមកហើយ។
លោកបានបញ្ជាក់ថា៖ «គ្មានជនណាម្នាក់មានសិទ្ធិកាន់កាប់ដីធ្លី ទិញ ឬលក់ដូរដីធ្លីក្នុងតំបន់ការពារធម្មជាតិបានឡើយ។ ក្រសួងបរិស្ថានសូមស្នើសុំបងប្អូនពលរដ្ឋដែលមិនបានយល់ដឹងច្បាស់ពីច្បាប់សូមឈប់ចាញ់បោកជនខិលខូចបន្តទៀត និងសូមបញ្ឈប់ជាបន្ទាន់នូវសកម្មភាពខុសច្បាប់ជាអាទិ៍ការឈូសឆាយកាប់ឆ្ការ ដុត រុករាន ទន្ទ្រានដីព្រៃ ការសាងសង់ខ្ទម ឬរោងការដាំដុះដំណាំ និងការអាស្រ័យលើដីរបស់រដ្ឋក្នុងតំបន់ការពារធម្មជាតិ»។
លោកបានបន្ថែមថា៖ «ត្រូវបញ្ឈប់ជាបន្ទាន់នូវរាល់ការទិញលក់ដីរដ្ឋ...ហើយត្រូវរុះរើសំណង់គ្រប់ប្រភេទដោយខ្លួនឯង និងប្រគល់ទីតាំងដីទាំងនោះដោយឥតលក្ខខណ្ឌមកជូនក្រសួងបរិស្ថានគ្រប់គ្រងវិញ បើពុំនោះទេនឹងត្រូវប្រឈមមុខនឹងវិធានការច្បាប់»។
លោក គ្រើង តុលា សកម្មជនការពារព្រៃឈើខេត្តមណ្ឌលគិរីបានថ្លែងពីម្សិលមិញថា លោកគាំទ្រការឃាត់ខ្លួនជនល្មើសទាំង ១៣ នាក់នេះ។ ប៉ុន្តែលោកថា គ្មានជំនឿលើសមត្ថកិច្ចក្នុងការការពារព្រៃឈើក្នុងតំបន់ទាំង ៤ នេះបានទេ ព្រោះតំបន់នោះកំពុងត្រូវបានជនល្មើស និងអ្នកមានអំណាចមួយចំនួនឈូសព័ទ្ធរបងយកស្ទើររាល់ថ្ងៃ។
លោកថា៖ «កន្លងមកពួកគាត់ជាអ្នកសម្របសម្រួលឲ្យមានបទល្មើសព្រៃឈើអ្នកណាមានលុយឲ្យទៅមន្ត្រីគឺមន្ត្រីធ្វើជាមើលមិនឃើញបទល្មើស ពេលពលរដ្ឋសួរទៅឆ្លើយថាមិនដឹងរឿង។ ចំពោះពលរដ្ឋក្រក្រីគាត់បង្ក្រាបភ្លាមៗបញ្ជូនទៅតុលាការលឿនៗតែម្ដង ប៉ុន្ដែបើអ្នកមានលុយ គ្មានបញ្ជូនទៅតុលាការទេត្រឹមចុះកិច្ចសន្យាទេ។ លើសពីនេះបើពលរដ្ឋរាយការណ៍ពីបទល្មើសគឺមន្ត្រីងាកមកប្ដឹងអ្នករាយការណ៍វិញដោយថាជាព័ត៌មានមិនពិត ឬបំភ្លៃព័ត៌មានខុសពីការពិតជាដើម»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានថ្លែងពីថ្ងៃម្សិលមិញថា លោកគាំទ្រចំណាត់ការរបស់ក្រសួងបរិស្ថាននេះ ប៉ុន្ដែលោកជំរុញអនុវត្តច្បាប់មានតម្លាភាព និងយុត្តិធម៌ស្មើៗគ្នា។
លោកថា៖ «បទល្មើសព្រៃឈើគឺជាបទល្មើសជាក់ស្ដែង បើទោះបីកន្លងផុតរយៈពេល ១៥ ឆ្នាំក៏ដោយ ក៏អាចសើរើមកដាក់ទោសទណ្ឌបានដែរ។
នៅខេត្តមណ្ឌលគិរីមានអ្នកមានអំណាច និងអ្នកមានលុយជាច្រើនពាក់ព័ន្ធការកាប់ទន្ទ្រានដីព្រៃ ដូច្នេះសមត្ថកិច្ចគួរចាត់វិធានការតាមផ្លូវច្បាប់ឲ្យដូចនឹងអ្នកគ្មានលុយដែរ»។
បើតាមលោក នេត្រ ភក្ត្រា បច្ចុប្បន្ននេះក្រសួងបរិស្ថានមានមន្ត្រីឧទ្យានុរក្ស ១២៦០ នាក់ដែលមានតួនាទីជាមន្ត្រីនគរបាលយុត្តិធម៌ និងជាឆ្មាំការពារធម្មជាតិនៅលើផ្ទៃដីអភិរក្សសរុបជាង ៧,២ លានហិកតា ដោយពួកគាត់នឹងបង្កើនសកម្មភាពចុះល្បាតដើម្បីទប់ស្កាត់បទល្មើសនានាក៏ដូចជាការបរបាញ់សត្វព្រៃជាពិសេសសកម្មភាពការកាប់ឆ្ការ និងរុករានដីព្រៃខុសច្បាប់ និងដាំដំណាំយុទ្ធសាស្ត្រផ្សេងៗដើម្បីទន្ទ្រានកាន់កាប់ដី៕