ខេត្តព្រះវិហារ: បុរស ៥ នាក់ត្រូវបានសាលាដំបូងខេត្តព្រះវិហារសម្រេចឃុំខ្លួនកាលពីថ្ងៃទី ២៥ សីហាពាក់ព័ន្ធនឹងការលួចកាប់ដឹកជញ្ជូនឈើប្រណីត និងបរបាញ់សត្វក្នុងដែនជម្រកសត្វព្រៃភ្នំត្នោតក្នុងឃុំស្តៅ ស្រុកសង្គមថ្មី។ នេះបើតាមលោកស្រី ភី ស៊ីថង ព្រះរាជអាជ្ញារងនៃសាលាដំបូងខេត្តព្រះវិហារកាលពីម្សិលមិញ។
លោកស្រី ភី ស៊ីថង ថ្លែងថាលោកព្រះរាជអាជ្ញាសម្រេចឃុំខ្លួនពួកគេបណ្ដោះអាសន្នក្នុងពន្ធនាគារក្រោមបទចោទចំនួន ៣ រួមមាន «ការប្រើរណារយន្តកាប់បំផ្លាញព្រៃឈើគ្មានការអនុញ្ញាតដឹកជញ្ជូនផលអនុផលព្រៃឈើគ្មានការអនុញ្ញាត និងការប្រើប្រាស់អាវុធគ្មានការអនុញ្ញាតផងដែរ»។ ប៉ុន្តែនៅមិនទាន់ពិន័យជាប្រាក់ទេដោយរង់ចាំការជំនុំជម្រះសិន។
លោកស្រីបញ្ជាក់ថា៖ «យើងធ្វើតាមនីតិវិធីតាមបទល្មើសដែលដឹកជញ្ជូនអនុផលព្រៃឈើគឺយើងពិន័យជាទឹកប្រាក់ ប៉ុន្ដែទោស ២ ករណីទៀតត្រូវជាប់ពន្ធនាគារតាមស្ថានទម្ងន់ទោសក្នុងមាត្រានៃច្បាប់»។
លោក មាស ញឹម នាយកដែនជម្រកសត្វព្រៃ ៤ តំបន់រួមមាន ភ្នំត្នោត ព្រៃឡង់ ងពេរ និងព្រះខ័ន បានឲ្យដឹងថាអ្នកទាំង ៥ ប្រកបមុខរបរកាប់អារព្រៃឈើ និងបរបាញ់សត្វព្រៃ ប៉ុន្ដែត្រូវបានសមត្ថកិច្ចពាក់ព័ន្ធឃាត់ខ្លួននៅតំបន់ដែនជម្រកសត្វព្រៃភ្នំត្នោតពេលពួកគេកំពុងដឹកជញ្ជូនឈើចេញពីព្រៃ។
លោកបន្តថាវត្ថុតាងរឹបអូសបានរួមមាន៖ ឈើប្រណីត ២ ម៉ែត្រគុប រណារយន្ត ២ គ្រឿង កាំភ្លើងច្នៃ ២ ដើម ឧបករណ៍ឆក់ត្រី និងអន្ទាក់សត្វព្រៃមួយចំនួនទៀត។ វត្ថុតាង និងជនសង្ស័យត្រូវបានបញ្ជូនទៅតុលាការរួចរាល់ហើយ។
លោកថា៖ «មើលតាមវត្ថុតាង និងការប្រព្រឹត្តនេះយើងមិនចាំបាច់រកអ្វីមកដាក់បន្ទុកបន្ថែមទេគឺពួកគាត់ពិតជាអ្នកប្រព្រឹត្តពិតមែន និងត្រូវទទួលទោសតាមច្បាប់ ប៉ុន្ដែ យើងក៏កំពុងបន្តស្រាវជ្រាវរកបក្ខពួកបន្ថែមទៀត ព្រោះពួកគេមកកាប់ឈើនេះមិនមែនមានគ្នាតែប៉ុណ្ណឹងទេ អាចនឹងមានក្រុមផ្សេងៗទៀតដែរ»។
លោក សុង ច័ន្ទសុជាតិ ប្រធានមន្ទីរបរិស្ថានខេត្តនេះបានឲ្យដឹងថាលោកបានទទួលព័ត៌មាននេះហើយ ប៉ុន្ដែតុលាការចាត់ចែងតាមនីតិវិធីរួចហើយ។
លោក NickMarx នាយកសង្គ្រោះ និងថែរក្សាសត្វព្រៃនៃអង្គការសម្ព័ន្ធមិត្តសត្វព្រៃ (wildlife Alliance) បានថ្លែងយ៉ាងខ្លីថា៖ «ខ្ញុំអត់មានយោបល់អ្វីទេ ព្រោះអាជ្ញាធរកម្ពុជាបានធ្វើការលើរឿងនេះហើយ»។
កាលពីថ្ងៃទី ១៨ ខែមេសាឆ្នាំនេះក្រុមអង្គការបរិស្ថានចំនួន ៨ បានចេញសេចក្តីថ្លែងការណ៍មួយសម្ដែង «ក្តីបារម្ភយ៉ាងខ្លាំង» ចំពោះស្ថានភាពក្នុងដែនជម្រកសត្វព្រៃនេះ។
ក្នុងចំណោមនោះអង្គការអភិរក្សកំពុងជំរុញរដ្ឋាភិបាលកម្ពុជាឲ្យចាត់វិធានការបន្ទាន់ដើម្បីបញ្ឈប់ «អត្រាបំផ្លាញយ៉ាងលឿន» ទៅលើដែនជម្រកសត្វព្រៃភ្នំត្នោតដែលទើបត្រូវបានបង្កើតនាពេលថ្មីៗក្នុងខេត្តព្រះវិហារដែលពពួកសត្វជិតផុតពូជមួយចំនួនត្រូវបានរកឃើញនៅតំបន់ការពារនេះ។
សេចក្តីថ្លែងការណ៍រួមនេះថា៖ «ដូចកើតមានកាន់តែច្រើនឡើង ករណីក្នុងតំបន់ការពារដទៃៗទៀតទូទាំងកម្ពុជា»៕