ភ្នំពេញៈ សាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួនមេដឹកនាំជាន់ខ្ពស់ ៨ នាក់របស់គណបក្សសង្គ្រោះជាតិ ដែលត្រូវបានរំលាយដោយតុលាការកំពូលពីបទ «រួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍» ខណៈដែលពេលនេះពួកគេកំពុងភៀសខ្លួននៅបរទេស។
យោងតាមដីការបស់តុលាការចុះថ្ងៃទី ១២ ខែ មីនា ឆ្នាំ ២០១៩ ដែលត្រូវបានផ្សព្វផ្សាយជាសាធារណៈកាលពីម្សិលមិញ ចៅក្រមស៊ើបសួរ លោក កូយ សៅ បានបង្គាប់ឲ្យអាជ្ញាធរចាប់ខ្លួនប្រធានស្តីទីអតីតគណបក្សសង្គ្រោះជាតិ លោក សម រង្ស៊ី អនុប្រធាន លោកស្រី មូរ សុខហួរ និង លោក អេង ឆៃអ៊ាង អតីតតំណាងរាស្រ្ត លោក ឡុង រី លោក ម៉ែន សុថាវរិន្ទ លោក អ៊ូ ចាន់ឫទ្ធិ លោក តុ វ៉ាន់ចាន់ និងលោក ហូរ វ៉ាន់ ខណៈពួកគេទាំងអស់គ្នា កំពុងរស់នៅនិរទេស។
ដីកា ១ ក្នុងចំណោមដីកាបង្គាប់ឲ្យចាប់ខ្លួនទាំងនោះ បានសរសេរថា៖ «ត្រូវចោទប្រកាន់ពីបទរួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅប្រទេសកម្ពុជានិងទីកន្លែងផ្សេងទៀត កាលពីថ្ងៃទី ២០-២១-២២-២៥- ២៦ និងថ្ងៃទី ២៧ ខែមករា ឆ្នាំ ២០១៩ តាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ»។
ដីកាផ្សេងទៀតមានខ្លឹមសារដូចគ្នាសម្រាប់អ្នកទាំង៨នាក់នោះ។ ដីកាសរសេរថា ជនត្រូវចោទទាំងអស់ពុំមានវត្តមាននៅតាមទីលំនៅក្នុងមូលដ្ឋានរបស់ខ្លួន ក្នុងប្រទេស កម្ពុជា ទេ។
ដីកាតុលាការសរសេរថា៖ «ហេតុដូច្នេះ សម្រេចបង្គាប់ឲ្យចាប់ខ្លួនឈ្មោះ ហូរ វ៉ាន់ ដែលមានអត្តសញ្ញាណដូចខាងលើនេះ។ បញ្ជាដល់កងកម្លាំងសាធារណៈឲ្យស្រាវជ្រាវរកចាប់ និងនាំខ្លួនឈ្មោះខាងលើនេះ មកប្រគល់ជូនសាលាដំបូងរាជធានីភ្នំពេញដើម្បី ចាត់ការតាមច្បាប់»។
ទាំងចៅក្រមស៊ើបសួរលោក កូយ សៅ និងលោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងសុំអត្ថាធិប្បាយបានទេកាលពីម្សិលមិញ។
លោក ឆាយ គីមខឿន អ្នកនាំពាក្យនគរបាលជាតិ បានថ្លែងថា លោកមានព័ត៌មានអំពីមូលដ្ឋាននៃការចោទប្រកាន់នេះ ប៉ុន្តែលោកមិនអាចធ្វើ អត្ថាធិប្បាយបានទេដោយថ្លែងថា សំណុំរឿងនេះបានទៅដល់តុលាការហើយ។
បន្ទាប់ពីមានការចេញដីកាបង្គាប់ឲ្យចាប់ខ្លួននេះ លោក ឡុង រី និងលោក អេង ឆៃអ៊ាង បានថ្លែងថា ការចោទប្រកាន់នេះគឺជា «កាដូ» សម្រាប់ពួកលោកនៅក្នុងឱកាសថ្ងៃចូលឆ្នាំខ្មែរខាងមុខ។
លោក ហូរ វ៉ាន់ បានសរសេរនៅលើហ្វេសប៊ុករបស់លោកថា៖ «តុលាការចេញដីកាឲ្យចាប់ខ្លួនថ្នាក់ដឹកនំាបក្សសង្គ្រោះជាតិតើបងប្អូនជនរួមជាតិយល់យ៉ាងណាចំពោះការចេញដីកានេះ?»។
លោកស្រី មូរ សុខហួរ បានបដិសេធធ្វើអត្ថាធិប្បាយអំពីអ្វីដែលបានកើតឡើងនៅថ្ងៃនោះ។ លោកស្រីបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ពួកគេនឹងមិនចុះចាញ់ទេ។
លោកស្រីថ្លែងថា៖ «នេះគ្មានអ្វីលើសពី ការគំរាមកំហែងនិងការបំភិតបំភ័យនោះទេ។ យើងប្តេជ្ញាឆ្ពោះទៅមុខនៅក្នុងបេសកកម្មរបស់យើងដើម្បីសង្គ្រោះមាតុភូមិ និងប្រជាជនរបស់យើងពីរបបផ្តាច់ការ។ ប្រជាធិបតេយ្យត្រូវតែស្តារឡើងវិញ។ ហ៊ុន សែន ត្រូវតែទទួលខុសត្រូវចំពោះសេដ្ឋកិច្ច និងទម្រង់ទណ្ឌកម្មណាមួយពីសហភាពអឺរ៉ុប អាមេរិក និងប្រទេសដទៃៗទៀត»។
អ្នកទាំង ៨ នាក់ដែលត្រូវបានចោទប្រកាន់គឺជាសមាជិកនៃគណៈកម្មាធិការអចិន្រ្ដៃយ៍អតីតគណបក្សសង្គ្រោះជាតិក្នុងចំណោមសមាជិកសរុប ២៤ នាក់។ កាលពីថ្ងៃទី ២១ មករា ពួកគេបានប្រារព្ធកិច្ចប្រជុំមួយនៅទីក្រុង Lowell រដ្ឋ Massachusetts សហរដ្ឋអាមេរិក ដើម្បីរៀបចំឲ្យមានការវិលត្រឡប់មកវិញរបស់លោក សម រង្ស៊ី រួមទាំងការរៃអង្គាសប្រាក់ដើម្បីសម្រាប់ការវិលត្រឡប់មកវិញនេះ បង្កើតបណ្តាញស្វាគមន៍លោក សម រង្ស៊ី បង្កើនការងារការទូត ផ្សព្វផ្សាយព័ត៌មានអំពីបញ្ហាក្នុងប្រទេសកម្ពុជា និងការសហការជាមួយអ្នកប្រជាធិបតេយ្យទាំងអស់។
លោក អ៊ូ ចាន់ឫទ្ធិ បានថ្លែងកាលពីម្សិលមិញថា៖ «ខ្ញុំទើបតែបានឃើញដីកាបង្គាប់ឲ្យចាប់ខ្លួនដែលផ្ញើមកខ្ញុំតាមរយៈ messenger ។ ខ្ញុំមានការភ្ញាក់ផ្អើលដែលឃើញខ្លឹមសារបង្គាប់ឲ្យចាប់ខ្លួនខ្ញុំនិងសហការី ៧ នាក់ដទៃទៀតរបស់ខ្ញុំនៅក្នុងគណបក្សសង្គ្រោះជាតិ»។
លោកបានថ្លែងថា កិច្ចប្រជុំនៅទីក្រុង Lowell កាលថ្ងៃទី ២១ ខែមករា គឺជាកិច្ចប្រជុំលើកទីមួយ បន្ទាប់ពីលោក សម រង្ស៊ី ត្រូវបានជ្រើសរើស ជា «ប្រធានស្តីទី» នៃគណបក្សសង្គ្រោះជាតិ។
លោកបានប្រាប់ភ្នំពេញថា៖ «ប៉ុន្តែបទរួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ខ្ញុំមិនដឹងអំពីមូលហេតុនៃការចោទប្រកាន់នេះទេ»។
យោងតាមក្រមព្រហ្មទណ្ឌ បទញុះញង់ឲ្យប្រព្រឹត្តបទឧក្រិដ្ឋជាអាទិ៍ អាចជាប់ពន្ធនាគារពី ៦ ខែទៅ ២ ឆ្នាំ ខណៈបទរួមគំនិតក្បត់ អាចជាប់ពន្ធនាគារពី ៥ ទៅ ១០ ឆ្នាំ៕