ភ្នំពេញៈ អយ្យការអមសាលាដំបូងរាជធានីភ្នំពេញកាលពីម្សិលមិញបានសម្រេចចោទប្រកាន់មន្ត្រីនគរបាល ៥ រូប ពីបទសូកប៉ាន់ ពាក់ព័ន្ធនឹងករណីពុករលួយ ជួយអន្តរាគមន៍ឲ្យមានការដោះលែង ជនជាតិចិនដែលប្រព្រឹត្តបទល្មើសជំរិតទារប្រាក់តាមអ៊ីនធឺណិតចំនួន ១៨ នាក់។
លោក គុជ គឹមឡុង អ្នកនាំពាក្យស្ថាប័នអយ្យការអមសាលាដំបូងរាជធានីភ្នំពេញបានឲ្យដឹងកាលពីម្សិលមិញថា ជនជាប់ចោទមាន៖ ឈ្មោះ សឿ ស៊ីថា អនុប្រធាន នាយកដ្ឋាននៃអគ្គនាយកដ្ឋានអត្តសញ្ញាណកម្ម, ឈ្មោះ រ័ត្ឋ ពិន មន្ត្រីការិយាល័យអត្តសញ្ញាណប័ណ្ណសញ្ជាតិខ្មែរនៃអគ្គនាយកដ្ឋានអត្តសញ្ញាណកម្ម, ឈ្មោះ វណ្ណ សុភាព មន្ត្រីការិយាល័យអនុវត្តនីតិវិធីនៃអគ្គនាយកដ្ឋានអន្តោប្រវេសន៍ពីបទសូកប៉ាន់ និងបទរារាំងក្នុងការអនុវត្តច្បាប់ ខណៈពេលដែលជន សង្ស័យ ២ នាក់ផ្សេងទៀត ដែលជាប់ពាក់ព័ន្ធករណីនេះបាននិងកំពុងរត់គេចខ្លួន។
មន្ដ្រីនគរបាលទាំង ៣ នាក់នេះ ត្រូវបានចាប់ឃាត់ខ្លួនកាលពីថ្ងៃទី ១៨ ខែ កក្កដា ឆ្នាំ ២០១៩ នៅខេត្តកំពង់ស្ពឺ នៅពេលដែលពួកគេជួយធ្វើអន្តរាគមន៍ឲ្យមានការដោះលែងជនជាតិចិន ១៨ នាក់ ដែលប្រព្រឹត្តបទល្មើសជំរិតទារប្រាក់តាមអីុនធឺណិតដែលត្រូវបាន ស្នងការដ្ឋាននគរបាលខេត្តកំពង់ស្ពឺបើកប្រតិបត្តិការឃាត់ខ្លួនខណៈពេល ដែលបានពួនសំងំលាក់ខ្លួនធ្វើសកម្មភាពក្នុងភូមិសាស្ត្រភូមិចា ឃុំស្វាយ ចចឹប ស្រុកបសេដ្ឋ ប្រព្រឹត្តបទល្មើសជំរិតទារប្រាក់តាមអីុនធឺណិត (VOIP) កាលពីថ្ងៃទី ១៧ ខែ កក្កដា ឆ្នាំ ២០១៩។
លោក វ៉ី សំណាង អភិបាលខេត្តកំពង់ស្ពឺ ថ្លែងកាលពីពេលថ្មីៗនេះថា មន្ត្រីនគរបាលទាំង ៣ នាក់នេះ បានយកប្រាក់ចំនួន ៤ ម៉ឺនដុល្លារអាមេរិក ទៅសូកប៉ាន់មន្ត្រីស្នងការដ្ឋាននគរបាលខេត្តកំពង់ស្ពឺ ដើម្បីដោះលែងជនជាតិចិន ៨ នាក់ក្នុងចំណោមជនជាតិចិនទាំង ១៨ នាក់។
លោកបញ្ជាក់ថា៖ «យើងចាប់បានទាំងមនុស្ស ៣ នាក់ និងលុយ ៤ ម៉ឺន»៕