.jpg)
បុរសជនសង្ស័យ និងវត្ថុតាង ដែលសមត្ថកិច្ចឃាត់ខ្លូននឹងរក្សាទុក។ រូបថត នគរបាល
ភ្នំពេញៈ សាលាដំបូងរាជធានីភ្នំពេញកាលពីថ្ងៃចន្ទបានសម្រេចចោទប្រកាន់បុរសជនសង្ស័យម្នាក់ពាក់ព័ន្ធនឹងករណីជួញដូរគ្រឿងញៀន បន្ទាប់ពីសមត្ថកិច្ចបញ្ជូនខ្លួនដល់តុលាការកាលពីថ្ងៃ ៩ កុម្ភៈ ប៉ុន្មានថ្ងៃក្រោយពេលឃាត់ខ្លួនបាននៅសង្កាត់អូរបែកក្អម ខណ្ឌសែនសុខ រាជធានីភ្នំពេញជាមួយគ្រឿងញៀនមេតំហ្វេតាមីនជាង ១៥ គីឡូក្រាម។
លោក សេង ឃុនណាង ប្រធានការិយាល័យ (ក ១១) នៃមន្ទីរប្រឆាំងគ្រឿងញៀនក្រសួងមហាផ្ទៃប្រាប់ភ្នំពេញប៉ុស្តិ៍ថា បុរសជនសង្ស័យនោះ ឈ្មោះ ភី សុផល អាយុ ៣៤ ឆ្នាំជាជនជាតិខ្មែរត្រូវសមត្ថកិច្ចរបស់លោកចាប់ខ្លួនកាលពីថ្ងៃ ៦ កុម្ភៈ និងបានកសាងសំណុំរឿងបញ្ជូនទៅសាលាដំបូងរាជធានីភ្នំពេញក្រោយពីបញ្ចប់ការសាកសួរ។
លោកបានបញ្ជាក់ថា៖ «ជនម្នាក់នោះខាងខ្ញុំបានបញ្ជូនគាត់ទៅតុលាការព្រឹក (ថ្ងៃទី ៩ កុម្ភៈ) ក្រោយពីបានការឯកភាពពីថ្នាក់លើរបស់ខ្ញុំ»។
លោក គុជ គឹមឡុង អ្នកនាំពាក្យផ្នែកអយ្យការសាលាដំបូងរាជធានីភ្នំពេញបានឲ្យដឹងកាលពីរសៀលថ្ងៃ ១០ កុម្ភៈថា បុរសជាជនសង្ស័យឈ្មោះ ភី សុផល ត្រូវបានព្រះរាជអាជ្ញាចោទប្រកាន់រួចហើយ និងបានបញ្ជូនទៅឲ្យចៅក្រមស៊ើបសួរនៅថ្ងៃចន្ទដើម្បីបន្តនីតិវិធី។
លោកបានថ្លែងថា៖ «គាត់ត្រូវបានចោទប្រកាន់ពីបទជួញដូរគ្រឿងញៀនតាមមាត្រា ៤០ នៃច្បាប់ស្ដីពីការត្រួតពិនិត្យគ្រឿងញៀន ហើយបានបញ្ជូនទៅឲ្យចៅក្រមស៊ើបសួរបន្ត»។
បើតាមលោក សេង ឃុនណាង ការឃាត់ខ្លួនជនសង្ស័យខាងលើនេះបានធ្វើឡើងកាលពីម៉ោង ២១ និង ១០ នាទីយប់ថ្ងៃទី ៦ ខែកុម្ភៈនៅចំណុចបន្ទប់ជួល (គ្មានលេខ) ផ្លូវលេខ ១១៣ សង្កាត់អូរបែកក្អម ខណ្ឌសែនសុខ រាជធានីភ្នំពេញដឹកនាំដោយលោកវរសេនីយ៍ ឯក ស៊ី ផល្លា នាយករងមន្ទីរប្រឆាំងបទល្មើសគ្រឿងញៀន និងមានការសម្របសម្រួលពីលោក សាយ ណូរ៉ា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
លោកថា មុនឃាត់ខ្លួន សមត្ថកិច្ចបានស៊ើបអង្កេតយ៉ាងយកចិត្តទុកដាក់បំផុតទើបឈានទៅបង្ក្រាបករណីជួញដូរគ្រឿងញៀនឆ្លងដែនពីថៃមកកម្ពុជានេះ។
លោកបានបញ្ជាក់ថា វត្ថុតាងដែលសមត្ថកិច្ចរឹបអូសបានរួមមានគ្រឿងញៀនប្រភេទមេតំហ្វេតាមីន (ICE) ទម្ងន់ ១៥,៣៥៨.៦៥ គីឡូក្រាម ជញ្ជីងថ្លឹងចំនួន ២ គ្រឿង និងម៉ូតូ ១ គ្រឿង ហើយបើតាមចម្លើយរបស់ជនសង្ស័យគឺគ្រឿងញៀននេះគេបាននាំចូលមកពីប្រទេស ថៃ។
ពាក់ព័ន្ធការបង្ក្រាបគ្រឿងញៀននេះដែរ បើតាមរបាយការណ៍របស់មន្ទីរប្រឆាំងគ្រឿងញៀននៃក្រសួងមហាផ្ទៃចុះផ្សាយក្នុងគេហទំព័ររបស់អគ្គស្នងការនគរបាលជាតិបង្ហាញថា មានមនុស្ស ៨៦ នាក់ត្រូវបានសមត្ថកិច្ចឃាត់ខ្លួននៅទូទាំងប្រទេសកាលពីថ្ងៃទី ៨ ខែកុម្ភៈ ក្នុងនោះ (ស្រី ៥ នាក់) ក្នុង ២១ ករណី។ ក្នុងចំណោមជនសង្ស័យទាំង ៨៦ នាក់នោះ មានមុខសញ្ញាជួញដូរគ្រឿងញៀនចំនួន ៧១ នាក់ និងអ្នកប្រើប្រាស់ ១៥ នាក់ រួមនឹងគ្រឿងញៀនមេតំហ្វេតាមីនប្រមាណ ២៤,៩៧ ក្រាម និង ៧១ កញ្ចប់តូចផង។
បើតាមរបាយករណ៍ដដែលការបង្ក្រាបបទល្មើសគ្រឿងញៀនទាំងនោះបានធ្វើឡើងនៅបណ្ដាខេត្ត-ក្រុងមួយចំនួនរួមមាន ខេត្តបន្ទាយមានជ័យ បាត់ដំបង កំពង់ចាម កំពង់ឆ្នាំង កំពង់ស្ពឺ កំពត កណ្ដាល ពោធិ៍សាត់ រតនគិរី ត្បូងឃ្មុំ និងរាជធានីភ្នំពេញ៕
