ស្ទឹងត្រែងៈ តុលាការខេត្តស្ទឹងត្រែងបានចោទប្រកាន់បុរស ២ នាក់ជាកូនភ្លោះ និងបង្គាប់ឲ្យសមត្ថកិច្ចឃុំខ្លួននៅពន្ធនាគារខេត្តពីម្សិលមិញ បន្ទាប់ពីសមត្ថកិច្ចជលផលខេត្តស្ទឹងត្រែងចាប់ពួកគេពីថ្ងៃទី ២៨ កក្កដា ហើយបានបញ្ជូនទៅតុលាការ ករណីឆក់ត្រីខុសច្បាប់ ប្រព្រឹត្តនៅភូមិ-ឃុំស្ដៅ ស្រុកសេសាន ខេត្តស្ទឹងត្រែង។
លោក គឹម ហុងសាន អ្នកនាំពាក្យផ្នែកអយ្យការនៃសាលាដំបូងខេត្តស្ទឹងត្រែងឲ្យដឹងពីព្រឹកម្សិលមិញថា ករណីជនសង្ស័យឈ្មោះ ពុន រស្មី ហៅ អាម៉ី អាយុ ២៥ ឆ្នាំ និងឈ្មោះ ពុន មិនប៉ាក់ អាយុ ២៥ ឆ្នាំត្រូវបានអយ្យការសាលាដំបូងខេត្តស្ទឹងត្រែងបញ្ជូនទៅចៅក្រមស៊ើបសួរដោយឯកភាពចោទប្រកាន់ពួកគេទាំង ២ នាក់។ ពួកគេត្រូវបានចោទពីបទនេសាទត្រីដោយប្រើប្រាស់ឧបករណ៍ខុសច្បាប់តាមបញ្ញត្តិមាត្រា ៩៨ នៃច្បាប់ស្តីពីជលផល និងឃុំខ្លួននៅពន្ធនាគារខេត្តស្ទឹងត្រែងហើយកាលពីព្រឹកថ្ងៃទី ៣០ កក្កដា។
ជនសង្ស័យទាំង ២ នាក់នេះ ប្រសិនបើតុលាការរកឃើញមានកំហុសដូចការចោទប្រកាន់តាមមាត្រា ៩៨ នៃច្បាប់ស្តីពីជលផលមែននោះ ពួកគេប្រឈមមុខជាប់ពន្ធនាគារពី ៣ ទៅ ៥ ឆ្នាំ។
លោក ទុំ នីរ៉ូ នាយខណ្ឌរដ្ឋបាលជលផលខេត្តស្ទឹងត្រែងប្រាប់ពីថ្ងៃទី ២៩ កក្កដាថា ជនសង្ស័យឈ្មោះ ពុន រស្មី ហៅអាម៉ី អាយុ ២៥ ឆ្នាំ និងឈ្មោះ ពុន មិនប៉ាក់ អាយុ ២៥ (កូនភ្លោះ) ត្រូវបានសមត្ថកិច្ចរបស់លោកឃាត់ខ្លួននៅល្ងាចថ្ងៃទី ២៨ កក្កដា បន្ទាប់ពីអ្នកភូមិរាយការណ៍មកខណ្ឌរដ្ឋបាលជលផលថា ពួកគេឆក់ត្រីនៅចំណុចបឹងយ៉កតាមដងទន្លេសេកុង។
លោកថា ក្រោយទទួលព័ត៌មាននេះ សមត្ថកិច្ចមន្ត្រីជលផលបានចុះទៅចំណុចកើតហេតុ ហើយក៏ឃាត់ខ្លួនពួកគេ។ ចំពោះវត្ថុតាងដែលរឹបអូសបាន រួមមានអាគុយ ១២ វ៉ុលចំនួន ២, ក្បាលឆក់ក្តៅ ១២ គ្រាប់ ខ្សែកាប្លិ៍ ១ ខ្សែ ថ្នងដងត្រី ២ ទូក ១ គ្រឿងប្រវែង ៧ ម៉ែត្រ ម៉ាស៊ីនទូក ១ គ្រឿងកម្លាំង ៦ សេះ និងត្រីចម្រុះចំនួន ៥ គីឡូក្រាម។
លោកបន្ថែមថា ខណ្ឌរដ្ឋបាលជលផលធ្វើការតាមរយៈសហគមន៍ដែលមានចំនួន ៥៦។ ប្រជាសហគមន៍បានចូលរួមយ៉ាងសកម្មក្នុងការផ្តល់ព័ត៌មាន និងជួយប្រឆាំងនឹងការនេសាទត្រីខុសច្បាប់នេះ។
បើតាមលោក ទុំ នីរ៉ូ តំបន់មានបទល្មើសនោះគឺនៅដាច់ស្រយាលពីទីរួមខេត្តស្ទឹងត្រែង ប៉ុន្តែមិនមែនជាតំបន់អភិរក្សត្រីទេ។ តែរដូវនេះជារដូវបិទនេសាទគិតចាប់ពីថ្ងៃទី ១ ខែឧសភា ដល់ថ្ងៃទី ៣១ ខែកញ្ញា ដែលការនេសាទជាលក្ខណៈទ្រង់ទ្រាយធំត្រូវបានហាមឃាត់ ពិសេសការឆក់នេះ។ ម្យ៉ាងបញ្ហានេះវាធ្វើឲ្យប៉ះពាល់ដល់ប្រព័ន្ធអេកូឡូស៊ីក្នុងធម្មជាតិខ្លាំងទៀតផង។
លោកបានបន្ថែមថា៖ «ប្រសិនបើត្រីនោះគេចរួចពីការឆក់ក៏វាមិនអាចទៅពងកូនបានទៀតដែរ។ បើត្រីហ្នឹងជ្រកលាក់ខ្លួននៅកន្លៀតណាក៏មិនសល់ដែរ»។
ទន្ទឹមនឹងនេះលោកបានឲ្យដឹងដែរថា ក្នុងឆមាសទី ១ ឆ្នាំនេះបរិមាណត្រីដែលខណ្ឌរដ្ឋបាលចាប់បានមានប្រមាណ ២០៨០ តោន។ រីឯផលនេសាទកែច្នៃមានប្រមាណ ៥៣ តោនក្នុងនោះមានប្រហុក ១៨ តោន ត្រីងៀត ៤ តោន និងផ្អក ៣១ តោន៕