.jpg)
ពលរដ្ឋ ៧ នាក់ ដែលទន្ទ្រានយកដីក្នុងតំបន់ការពារ។ សហការី
ព្រះសីហនុៈ តុលាការខេត្តព្រះសីហនុបានចោទប្រកាន់ពលរដ្ឋប្រុស និងស្រីចំនួន ៧ នាក់ ដោយហេតុបានរុករានដីព្រៃនៅក្នុងតំបន់ការពារធម្មជាតិ ដើម្បីយកមកធ្វើជាកម្មសិទ្ធិ និងបង្ករបួសស្នាមដល់សមត្ថកិច្ចដែលកំពុងអនុវត្តច្បាប់។
លោក លឹម ប៊ុនហេង អ្នកនាំពាក្យសាលាដំបូងខេត្តព្រះសីហនុបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ពលរដ្ឋទាំង ៧ នាក់នោះ បានកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃនៅភូមិស្មាច់ដែង ឃុំរាម ស្រុកព្រៃនប់ ខេត្ដព្រះសីហនុកាលពីថ្ងៃទី ១៥ ខែមករា ឆ្នាំ ២០២០ ដើម្បីយកធ្វើជាកម្មសិទ្ធិ និងពីបទ រារាំង បង្កគ្រោះថ្នាក់ របួសស្នាម ដល់មន្ដ្រីរដ្ឋបាលការពារ និងអភិរក្សធម្មជាតិក្នុងការចុះអនុវត្ដមុខនាទី និងភារកិច្ច។
លោក ប៊ុនហេង បានឲ្យដឹងថា ពលរដ្ឋទាំង ៧ នាក់នោះបានប្រព្រឹត្តបទល្មើសដែលមានបញ្ញត្ដិឱ្យផ្ដន្ទាទោសតាមមាត្រា ៦២ ចំណុច ១, មាត្រា ៥៦ ចំណុច ៤ និងមាត្រា ៦១ ចំណុច ៧ នៃច្បាប់ស្ដីពីតំបន់ការពារធនធានធម្មជាតិ។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងកាលពីម្សិលមិញថាកាលពីថ្ងៃពុធ ទី ១៥ ខែមករា បានឱ្យដឹងថា កម្លាំងនគរបាលខេត្តព្រះសីហនុនៅថ្ងៃទី ១៥ ខែមករាបានសហការជាមួយកម្លាំងចម្រុះនៃរដ្ឋបាលស្រុក ព្រៃនប់ ដែលដឹកនាំដោយលោក ព្រំ ប៊ុន្នី នាយករងរដ្ឋបាលស្រុកព្រៃនប់ចុះធ្វើការទប់ស្កាត់ និងរុះរើសំណង់ផ្ទះខ្ទមអនាធិបតេយ្យដែលសង់លើដីឧទ្យានជាតិព្រះសីហនុ (រាម) ត្រង់ចំណុចតាបិន ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុដែលវិនិយោគឱ្យក្រុមហ៊ុនអេវើហ្គ្រីន។
នៅក្នុងប្រតិបត្តិការនេះត្រូវបានក្រុមអនាធិបតេយ្យទាំងនោះបានប្រើហិង្សាមកលើក្រុមការងារដោយប្រើកាំបិត ពូថៅ ដំបង ដុំថ្ម ចម្ពាមកៅស៊ូ និងដបសាំងវាយ កាប់ និងគប់បណ្តាលឱ្យនគរបាល រងរបួសម្នាក់ឈ្មោះ នី សារ៉ាត់ ជានាយប៉ុស្តិ៍ទួលទទឹង, មន្ត្រីអាវុធហត្ថរងរបួសម្នាក់ឈ្មោះ រឿង សុខជា ជាសមាជិកកងអន្តរាគមន៍ពិសេស អាវុធហត្ថលើផ្ទៃប្រទេស និងកម្លាំងប្រជាការពារឃុំរងបួសម្នាក់ឈ្មោះ លន់ សារិទ្ធ។ ពលរដ្ឋទាំង ៧ នាក់នោះត្រូវបានកំណត់អត្តសញ្ញាណច្បាស់លាស់ដែលអ្នកខ្លះមកពីខេត្តព្រៃវែង កំពង់ធំ ស្ទឹងត្រែង។
លោក យូ វាសនា តំណាងប្រជាពលរដ្ឋសហគមន៍មានទំនាស់ដីធ្លីនៅខេត្តព្រះសីហនុបានឱ្យដឹងថា ក្នុងចំណោមពលរដ្ឋចូលទៅទន្ទ្រានដីនៅទីតាំងខាងលើមានពលរដ្ឋមួយចំនួនមិនមែនជាពលរដ្ឋនៅមូលដ្ឋានទេ ប៉ុន្ដែក៏មានពលរដ្ឋមួយចំនួនមានលំនៅជាក់ស្ដែងផងដែរ។
លោក វាសនា ថ្លែងថាក្នុងពេលសមត្ថកិច្ចចុះទៅរុះរើផ្ទះសំបែងពលរដ្ឋពេលនោះគឺពលរដ្ឋ និងសមត្ថកិច្ចមានការប៉ះទង្គិចគ្នាទៅវិញទៅមក ដោយហេតុតែពលរដ្ឋត្រូវការពារផ្ទះសំបែង និងដំណាំពួកគេដូច្នេះទើបមានការប៉ះទង្គិចគ្នាកើតជាហិង្សា។ ពលរដ្ឋដែលរស់នៅទីតាំងនោះមានភាគតិចដែលជាពលរដ្ឋរស់នៅជាក់ស្ដែងលើដី ប៉ុន្ដែក៏មានពលរដ្ឋខ្លះគាត់ជាពលរដ្ឋរស់នៅជាក់ស្ដែងដែលកំពុងអាស្រ័យផលធ្វើដំណាំនៅទីនោះដែរ៕
