.jpg)
លោក James Ricketson នៅនៅតុលាការពីម្សិលមិញ។ ផា លីណា
ភ្នំពេញៈ សាលាដំបូងរាជធានីភ្នំពេញកាលពីម្សិលមិញបានច្រានចោលសំណើសុំនៅក្រៅឃុំរបស់ផលិតករភាពយន្តជនជាតិអូស្ត្រាលីលោក James Ricketson ជាថ្មីម្តងទៀត។ ប៉ុន្តែតុលាការបានចាប់ផ្តើមសំណុំរឿងចារកម្មដោយសាកសួរសាក្សីផលិតករភាពយន្តអូស្ត្រាលីល្បីឈ្មោះម្នាក់។
លោក Ricketson អាយុ ៦៩ ឆ្នាំត្រូវបានចោទប្រកាន់ពីបទប្រមូលព័ត៌មានដែលត្រូវបានចាត់ទុកថាប៉ះពាល់ការការពារសន្តិសុខជាតិដែលបានប្រព្រឹត្តក្នុងប្រទេសកម្ពុជាពីឆ្នាំ ១៩៩៥ រហូតដល់ពេលចាប់ខ្លួននៅថ្ងៃទី ៣ ខែមិថុនា ឆ្នាំ ២០១៧ យោងទៅតាមមាត្រា ៤៤៦ នៃក្រមព្រហ្មទណ្ឌដែលលោកប្រឈមមុខនឹងការជាប់ពន្ធនាគាររហូតដល់ ១០ ឆ្នាំប្រសិនបើរកឃើញថា មានទោស។ ការចាប់ខ្លួនលោកបានធ្វើឡើងក្នុងអំឡុងពេលដែលលោកធ្វើការថតតាមរយៈយន្តហ្រោះដូនដើម្បីចាប់យករូបភាពនៃការប្រមូលផ្តុំរបស់អតីតគណបក្សសង្គ្រោះជាតិនៅថ្ងៃចុងក្រោយនៃយុទ្ធនាការបោះឆ្នោតឃុំ-សង្កាត់កាលពីខែមិថុនាឆ្នាំមុន។
នៅក្នុងសវនាការសុំនៅក្រៅឃុំកាលពីម្សិលមិញមេធាវីការពារក្តីបានលើកឡើង ៦ ចំណុចក្នុងការធ្វើសំណើសុំនៅក្រៅឃុំរួមមាន ឆន្ទៈរបស់លោកក្នុងការមកឲ្យតុលាការសាកសួរនៅពេលណាក៏បានការបញ្ចប់ការស៊ើបអង្កេតបញ្ហាសុខភាព ការផ្តល់ពេលវេលាដល់មេធាវី ដើម្បីពិភាក្សាជាមួយកូនក្តី ការសន្យារបស់លោកមិនប្រព្រឹត្តបទល្មើសដទៃទៀតហើយលោកនឹងមិនដាក់សម្ពាធសាក្សី ឬធ្វើការសម្រុះសម្រួលជាមួយនរណាម្នាក់ដែលពាក់ព័ន្ធនៅក្នុងសំណុំរឿងនេះ។
លោក ពឹង យុកហៀប ដែលជាមេធាវីម្នាក់ក្នុងចំណោមមេធាវីទាំង ២ នាក់ថ្លែងថា៖ «គាត់ជាមនុស្សមានការទទួលខុសត្រូវ ហើយគាត់នឹងមិនរត់ទេ។ គាត់នឹងត្រឡប់មកបំភ្លឺនៅពេលណាក៏បាន។ គាត់មានឆន្ទៈប្រគល់ឯកសារទាំងអស់ដែលចាំបាច់»។
លោក គង់ សំអុន ដែលជាមេធាវីការពារក្តីម្នាក់ទៀតបានថ្លែងថាមិនមានសញ្ញាបង្ហាញថាលោក Ricketson បានប្រព្រឹត្តបទល្មើសនោះទេ។
«លោក James គាត់បានទទួលយកថា គាត់បានបង្ហោះយន្តហោះដ្រូនរបស់លោកនៅតំបន់ហាមឃាត់ ដែលប្រកាសដោយសាលារាជធានីភ្នំពេញ។ គាត់ជាអ្នកកាសែត ឬផលិតករភាពយន្ត ប៉ុន្តែគាត់មិនបានចុះបញ្ជីជាមួយក្រសួង។ ដូច្នេះលោក James គួរទទួលខុសត្រូវចំពោះសកម្មភាពទាំង ២ នេះ»។
លោក សំអុន បន្តថាក្នុងនាមជាអ្នកកាសែត ឬផលិតករភាពយន្ត ការសម្ភាសអ្នកនយោបាយគឺជារឿងធម្មតា ហើយមិនគួរចាត់ទុកថាជាការប្រមូលព័ត៌មានដែលធ្វើឲ្យគ្រោះថ្នាក់ដល់ជាតិនោះទេ។
«ជាការពិតការការពារជាតិគឺជាកាតព្វកិច្ចរបស់យោធា មិនមែននគរបាលទេ។ ប៉ុន្តែគាត់ត្រូវបានចាប់ខ្លួនដោយនគរបាល»។
ទោះយ៉ាងណាក្តីសំណើសុំនៅក្រៅឃុំត្រូវបានច្រានចោលដោយប្រធានចៅក្រមលោក សេង លាង បន្ទាប់ពីការពិចារណារយៈពេល ៣០ នាទី ខណៈសេចក្តីសម្រេចនេះត្រូវបានស្នើដោយព្រះរាជអាជ្ញា សៀង សុខ។ បន្ទាប់ពីសំណើសុំនៅក្រៅឃុំត្រូវបានច្រានចោលការជំនុំជម្រះបានបន្តទៅបទចោទប្រកាន់ជាក់ស្តែង។
មេធាវីការពារក្តីលោក គង់ សំអុន បានដាក់សាក្សី ៤ នាក់បន្ថែមទៀតចំពោះសំណុំរឿងនេះ។ នេះបានធ្វើឲ្យចំនួនសាក្សីឡើងដល់ ៧ នាក់រួមទាំងសាក្សី ៣ នាក់ដែលត្រូវបានដាក់កាលពីពេលមុន។
ប៉ុន្តែសវនាការទាំងមូលបានបន្តជាមួយនឹងការសួរទៅសាក្សីម្នាក់ឈ្មោះ Peter Weir អាយុ ៧៤ ឆ្នាំដែលជានាយកផលិតកម្មភាពយន្តអូស្ត្រាលីល្បីឈ្មោះម្នាក់ ដែលបានអះអាងថាបានផលិតភាពយន្តហូលីវូដមួយចំនួន។
លោក Peter បានរៀបរាប់អំពីទំនាក់ទំនងជាយូរមកហើយរបស់លោកជាមួយលោក Ricketson ដែលចាប់ផ្តើមក្នុងឆ្នាំ ១៩៧៣ នៅពេលដែលលោក Ricketson បានចាប់ផ្តើមរៀននៅសាលាភាពយន្តក្នុងប្រទេសអូស្ត្រាលី ហើយលោក Peter គឺជាទីប្រឹក្សាម្នាក់សម្រាប់គាត់។ លោកបានថ្លែងថាលោក James មិនមានការពាក់ព័ន្ធណាមួយជាមួយគណបក្សនយោបាយណាមួយទេទាំងក្នុងប្រទេសអូស្ត្រាលី និងក្នុងប្រទេសកម្ពុជា។ លោកថ្លែងថាលោក Ricketson បានផលិតភាពយន្តប្រឌិត និងភាពយន្តឯកសារលើប្រធានបទផ្សេងៗទាំងក្នុងអំឡុងពេលលោកនៅប្រទេសអូស្ត្រាលី និងក្នុងប្រទេសកម្ពុជា។
លោក Peter ថ្លែងថាលោកជឿថាការចាប់ខ្លួនលោក Ricketson គឺដោយសារតែការយល់ច្រឡំដែលកើតចេញពីវប្បធម៌ផ្សេងគ្នា។
ចៅក្រម សេង លាង បានសម្រេចបញ្ចប់សវនាការនៅវេលាម៉ោង ៦ ល្ងាច ហើយការជំនុំជម្រះនឹងបន្តនៅថ្ងៃទី ២០ ខែសីហា៕ PS
