.jpg)
សាលាដំបូងរាជធានីភ្នំពេញកាលពីម្សិលមិញបានបើកសវនាការ ជំនុំជម្រះសំណុំរឿងគ្រឿងញៀនជិត ៥០ គីឡូក្រាម នៅក្លិបកម្សាន្ត Rock ជាអសាធារណៈលើជនជាប់ចោទលោក ឧកញ៉ា គិត ធាង ដែលជាម្ចាស់ក្លិប និងស្ត្រីចំនួន ៣ នាក់ ក្នុងចំណោមជនជាប់ចោទ ២៧ នាក់។ ហេង ជីវ័ន
ភ្នំពេញៈ សាលាដំបូងរាជធានីភ្នំពេញកាលពីម្សិលមិញបានបើកសវនាការ ជំនុំជម្រះសំណុំរឿងគ្រឿងញៀនជិត ៥០ គីឡូក្រាម នៅក្លិបកម្សាន្ត Rock ជាអសាធារណៈលើជនជាប់ចោទលោក ឧកញ៉ា គិត ធាង ដែលជាម្ចាស់ក្លិប និងស្ត្រីចំនួន ៣ នាក់ ក្នុងចំណោមជនជាប់ចោទ ២៧ នាក់ ខណៈសំណុំរឿងមួយនេះត្រូវបានជំនុំជម្រះជាអសាធារណៈប្រមាណ ៣-៤ ដងរួចមកហើយ។
នៅក្នុងបន្ទប់សវនាការ មុននឹងដេញអ្នកដែលមិនពាក់ព័ន្ធក្នុងសំណុំរឿងឲ្យចេញក្រៅបន្ទប់សវនាការពីម្សិលមិញគេឃើញមានសមាសភាពចៅក្រមប្រឹក្សាជំនុំជម្រះ ៣ រូបដោយមានលោក អ៊ឹម វណ្ណៈ ជាប្រធានក្រុមប្រឹក្សាជំនុំជម្រះ រីឯតំណាងអយ្យការមានលោក សុក កែវបណ្ឌិត។
ជាមួយគ្នានេះដែរគេឃើញមានវត្តមានមេធាវីចំនួនពី ៦ ទៅ ៧ នាក់ ដែលការពារសិទ្ធិឲ្យជនត្រូវចោទទាំង ២៧ នាក់ ក្នុងសំណុំរឿងនេះផងដែរ។
មុនការចាប់ផ្តើមជំនុំជម្រះលោកចៅក្រម អ៊ឹម វណ្ណៈ បានហៅឈ្មោះជនជាប់ចោទតែ ៤ នាក់ប៉ុណ្ណោះ ក្នុងនោះក៏មានលោកឧកញ៉ា គិត ធាង ផងដែរ ដើម្បីដំណើរការជំនុំជម្រះហើយថ្លែងថា៖ «ដោយសារតែសំណុំរឿងនេះមានអនីតិជននៅជាមួយដែរ ដូច្នេះសូមសាធារណជនចេញទៅក្រៅបន្ទប់ និងទុកតែជនជាប់ចោទប៉ុណ្ណោះ»។
មេធាវីមួយរូបដែលសុំមិនបញ្ចេញឈ្មោះបាននិយាយថា ក្នុងចំណោមជនជាប់ចោទទាំង ២៧ នាក់ នៅក្នុងឃុំមានជនមិនទាន់គ្រប់អាយុ (អនីតិជន) តែម្នាក់ទៅ ២ នាក់ប៉ុណ្ណោះ ហើយពួកគេត្រូវបានសួរដេញដោលអស់ហើយដែរកាលពីជំនុំជម្រះលើកមុន។ មេធាវីរូបនោះបានចោទសួរថា៖ «ថ្ងៃនេះអត់មានអនីតិជនទេ តែហេតុអីក៏ត្រូវជំនុំជម្រះជាអសាធារណៈ ព្រោះខ្ញុំឃើញមនុស្សសុទ្ធតែគ្រប់អាយុទាំងអស់ហ្នឹង»។
លោក សួង ចាន់ថន ជាមេធាវីម្នាក់ក្នុងចំណោមមេធាវីការពារសិទ្ធិឲ្យលោក គិត ធាង បានប្រាប់ភ្នំពេញប៉ុស្តិ៍តាមទូរស័ព្ទពីម្សិលមិញថា៖ «ព្រឹកមិញ (ថ្ងៃអង្គារ) ចៅក្រមបានហៅលោកឧកញ៉ា គិត ធាង ឡើងសួរដេញដោលដែរ តែព័ត៌មានលម្អិតយ៉ាងណានោះ ខ្ញុំមិនអាចបញ្ជាក់ជូនបានទេ»។
គួររំឭកថាកាលពីថ្ងៃទី ២៣ ខែ កុម្ភៈ ឆ្នាំ ២០១៩ វេលាម៉ោង ១ កន្លះរំលងអធ្រាត្រ កម្លាំងសមត្ថកិច្ចចម្រុះដែលដឹកនាំផ្ទាល់ដោយលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញដោយមានការសម្របសម្រួលពីលោក លី សុផាណា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានបង្ក្រាបទីតាំងមជ្ឈមណ្ឌលកម្សាន្តរ៉ុកស្ថិតនៅផ្លូវព្រះមុនីវង្សក្នុងសង្កាត់ទន្លេបាសាក់ ខណ្ឌចំការមន ពាក់ព័ន្ធករណីប្រើប្រាស់សម្រួល និងចាត់ចែងដោយខុសច្បាប់នូវសារធាតុញៀន។
ក្នុងប្រតិបត្តិការបង្ក្រាបនោះកម្លាំងចម្រុះបានឃាត់ខ្លួនមនុស្ស ៣១១ នាក់ ( ប្រុស ២៥៦ នាក់ស្រី ៥៥ នាក់) ជាមួយវត្ថុតាងគ្រឿងញៀនរួមមានថ្នាំគ្រាប់អិចស្តាស៊ី កេតាមីន ថ្នាំ Nimetazepam មេតំហ្វេតាមីន ហេរ៉ូ អ៊ីន និងសារធាតុផ្សំគ្រឿងញៀនសរុបទាំងអស់ ៤៩,៤៤ គីឡូក្រាម។
បន្ទាប់ពីជំនុំជម្រះ ១ ព្រឹកចៅក្រមបានលើកទៅជម្រះនៅពេលរសៀលទៀត៕
