ភ្នំពេញៈ សាលាដំបូងរាជធានីភ្នំពេញកាលពីម្សិលមិញបានជំនុំជម្រះជនជាប់ចោទ ៤ នាក់ ក្នុងចំណោម ៦ នាក់ ពីបទប៉ុនប៉ងធ្វើរដ្ឋប្រហារ ផ្តួលរំលំរដ្ឋាភិបាលពាក់ព័ន្ធនឹងការដាក់បង្កៃគ្រាប់បែកតែមិនផ្ទុះប្រព្រឹត្តកាលពីមុនចូលឆ្នាំខ្មែរក្នុងឆ្នាំ ២០១៩ នៅភ្នំពេញ។
ជនជាប់ចោទ ឈ្មោះ ចាន់ សារ៉ាត់ បានឆ្លើយក្នុងសវនាការកាលពីម្សិលមិញថា លោកជាកម្មករសំណង់ហើយលោកទៅធ្វើការសំណង់នៅខេត្តកំពត និងបានស្គាល់គ្នាជាមួយបុរសម្នាក់ឈ្មោះ ហេង រ៉ាន់ ហើយ រ៉ាន់ បានណែនាំឲ្យស្គាល់ឈ្មោះ សំណាង បន្ទាប់មក សំណាង បានណែនាំឲ្យលោកស្គាល់ឈ្មោះ សុខ ភារម្យ អាយុ ជាង ៦០ ឆ្នាំរស់នៅសហរដ្ឋអាមេរិក។ ក្នុងអំឡុងឆ្នាំ ២០១៨ ឈ្មោះ ភារម្យ បានហៅគាត់ឲ្យទៅជួបនៅប្រទេសថៃដែលឆ្លងកាត់តាមច្រកព្រំដែនអន្តរជាតិ កម្ពុជា-ថៃ ឡែម ក្នុងស្រុកកំរៀង ខេត្តបាត់ដំបង។
ជនជាប់ចោទ សារ៉ាត់ បន្តថាគាត់បានជួបឈ្មោះ ភារម្យ ដែលជាមេចលនាមានឈ្មោះថា« ខ្មែររំដោះខ្មែរ» នេះបានចំនួន ២ ដង ហើយរាល់ការជួបគ្នាម្តងៗគឺជននោះបានឲ្យលោកដើរចលនាប្រមូលសមាជិកឲ្យបានច្រើននៅតាមស្រុក ខេត្ត។ ភារម្យ បានប្រាប់លោកថា គេបានបង្កើតគណបក្សមួយឈ្មោះ «គណបក្សចលនាខ្មែររំដោះខ្មែរ» និងកំពុងសុំច្បាប់នៅក្រសួងមហាផ្ទៃ។ ដោយសារឮដូច្នេះរូបលោកក៏មានបំណងចូលរួមជាមួយគណបក្សចលនាខ្មែររំដោះខ្មែរ ដែរ ហើយក៏ខិតខំដើរប្រមូលសមាជិកបានជាង ៤០ នាក់។
ជនជាប់ចោទ សារ៉ាត់ ថាចំពោះការរៀបចំរចនាសម្ព័ន្ធជាកងកម្លាំងប្រដាប់អាវុធយ៉ាងណានោះលោកមិនបានដឹងទេ ព្រោះរាល់ការពិភាក្សាគ្នាជាមួយ ភារម្យ ម្តងៗគឺពិភាក្សាគ្នាពីការបង្កើតគណបក្សតែប៉ុណ្ណោះ។
លោក សារ៉ាត់ ប្រាប់ចៅក្រមក្នុងសវនាការថា៖ «ខ្ញុំគ្មានបំណងប្រឆាំងរដ្ឋាភិបាលកម្ពុជាទេ ប៉ុន្តែខ្ញុំចង់ចូលរួមក្នុងគណបក្ស ចលនាខ្មែររំដោះខ្មែរមែន។ ខ្ញុំសូមឲ្យតុលាការបន្ធូរបន្ថយទោសខ្ញុំ»។
ជនជាប់ចោទឈ្មោះ ហេង រ៉ាន់ ក៏បានឆ្លើយប្រាប់ចៅក្រមដែរថា លោកជាមេការសំណង់ និងធ្លាប់ជាសមាជិកគណបក្សខ្មែររួបរួមជាតិ ហើយក្រោយពីគណបក្សខ្មែររួបរួមជាតិរំលាយមកលោកដើរម៉ៅការសំណង់។
ជនជាប់ចោទបន្តថាលោកត្រូវបានឈ្មោះ សំណាង នាំទៅជួប សុខ ភារម្យ នៅប្រទេសថៃបាន ៣ ដងហើយ ចំពោះរាល់ការចាត់តាំងឲ្យលោកទៅបំផ្ទុះគ្រាប់បែកយ៉ាងណានោះលោកមិនបានប្រព្រឹត្តទេ។ ហេង រ៉ាន់ និយាយថា៖ «ខ្ញុំសូមឲ្យតុលាការបន្ថយទោសដល់ខ្ញុំ ព្រោះខ្ញុំមិនបានប្រព្រឹត្តបទល្មើសក្នុងការចូលរួមធ្វើរដ្ឋប្រហាររដ្ឋាភិបាលទេ»។
ចំណែកជនជាប់ចោទម្នាក់ផ្សេងទៀតឈ្មោះ អ៊ុក រឹម បានឆ្លើយក្នុងសវនាការពីម្សិលមិញដែរថាពាក់ព័ន្ធការចូលរួមប៉ុនប៉ងធ្វើរដ្ឋប្រហាររដ្ឋាភិបាល ដែលមានឈ្មោះ សុខ ភារម្យ ជាអ្នកដឹកនាំ និងចាត់តាំងនោះ គឺរូបលោកមិនបានពាក់ព័ន្ធទេដោយលោកចង់ចូលរួមជាសមាជិកក្នុងគណបក្សខ្មែររំដោះខ្មែរតែប៉ុណ្ណោះ។ «ខ្ញុំសូមតុលាការបន្ថយទោសដល់ខ្ញុំផង»។
ស្ត្រីជាប់ចោទឈ្មោះ អេក អមរី ដែលជាចៅបង្កើតរបស់ឈ្មោះ សុខ ភារម្យ បានឆ្លើយប្រាប់ចៅក្រមដែរថា នាងមិនបានចូលរួមក្នុងបំណងផ្តួលរំលំរដ្ឋាភិបាលទេ។ ប៉ុន្តែនាងជាអ្នកវាយកុំព្យួទ័រឲ្យជីតារបស់នាងរាល់ពេលផ្ញើឯកសារមកព្រោះនាងគិតថា ជីតានាងជាអ្នកផ្តល់ថវិកាឲ្យនាងរៀនសូត្រ ដែលនាងមិនអាចប្រកែកបានទេ។
អមរី និយាយថា៖ «រាល់ការជួបប្រជុំមនុស្ស ៣ នាក់ខាងលើ គឺនាងមិនបានចូលរួមទេ ព្រោះនាងមិនបានគិតពីការធ្វើនយោបាយអីទេ។ ដូច្នេះខ្ញុំសុំឲ្យតុលាការដោះលែងខ្ញុំ»។
លោក សំម ឫទ្ធីវាសនា តំណាងអយ្យការបានសន្និដ្ឋានថា ឆ្លងតាមការសួរដេញដោល និងតាមអង្គហេតុបង្ហាញថាជនជាប់ចោទទាំង ៦ នាក់ពិតជាបានចូលរួមប៉ុនប៉ងផ្តួលរំលំរដ្ឋាភិបាលពិតមែន។ «ខ្ញុំសូមរក្សាបទចោទប្រកាន់តាមមាត្រា ៤៥៣ នៃក្រមព្រហ្មទណ្ឌ» ។
លោក អ៊ុន ច័ន្ទថុល មេធាវី ការពារឲ្យ ឈ្មោះ គង់ ថាន់ សន្និដ្ឋានថាក្នុងរឿងនេះសមត្ថកិច្ចបានស្រាវជ្រាវចាប់ខ្លួនមនុស្សចំនួន ៤ នាក់ខាងលើដោយសារជាប់ពាក់ព័ន្ធការដាក់បង្កៃគ្រាប់បំណងបំផ្ទុះតែមិនផ្ទុះហើយសមត្ថកិច្ចស្រាវជ្រាវរកឃើញថាពាក់ព័ន្ធការបញ្ជាតាមទូរស័ព្ទ។
ចំពោះកូនក្តីរបស់លោកឈ្មោះ គង់ ថាន់ មានអាយុ ៨១ ឆ្នាំហើយ ហើយគាត់មានជំងឺលើសឈាម ខូចតម្រងនោម ហើយអ្វីដែលតុលាការចោទប្រកាន់លើកូនក្តីលោកនោះគឺដោយសារកូនក្តីលោកមានសម្ភារជាគ្រឿងអេឡិចត្រូនិក ឈ្មោះ MK 160 ហើយឲ្យទៅមនុស្សម្នាក់ដែលវត្ថុនេះ គេដាក់ភ្ជាប់នឹងទូរស័ព្ទ អាចបញ្ជា បិទបើកទ្វារដោយស្វ័យប្រវត្តិបាន។ ចំពោះសម្ភារប្រភេទនេះក៏អាចរកទិញតាមអនឡាញបានផងដែរ។ លោកថា៖ «កូនក្តីខ្ញុំគ្មានចេតនាទុច្ចរិតទេព្រោះគាត់ក៏ជាមន្ត្រីរាជការចូលនិវត្តន៍ដែរ។ សូមតុលាការទម្លាក់បទចោទលើកូនក្តីខ្ញុំ»។
លោកស្រីមេធាវី ជា ពិសី ដែលការពារឲ្យជនជាប់ចោទ ចាន់ សារ៉ាត់,អ៊ុក រឹម,អេក អមរី និង សុខ ភារម្យ បានសន្និដ្ឋានថា កូនក្តីលោកស្រី ចាន់ សារ៉ាត់,អ៊ុក រឹមនិង អេក អមរី គឺជាអ្នកចាញ់បោក សុខ ភារម្យ ហើយ សុខ ភារម្យ ក៏ចាញ់បោកគេបន្តទៀតដែរ។ លោកស្រីបានស្នើថា៖ «សូមតុលាការដោះលែងពួកគេឲ្យមានសេរីភាពផង» ។
បន្ទាប់ពីបើកសវនាការ លោក លិ សុខា ប្រធាន ក្រុមប្រឹក្សាជំនុំជម្រះបានថ្លែងថា សាលក្រមនៃសំណុំរឿងនេះនឹងត្រូវប្រកាសនៅថ្ងៃទី ៦ ខែ ធ្នូ ឆ្នាំ ២០១៩៕