.jpg)
លោក សម រង្ស៊ី មេដឹកនាំអតីតបក្សប្រឆាំង។ ហេង ជីវ័ន
ភ្នំពេញៈ សាលាដំបូងរាជធានីភ្នំពេញពីម្សិលមិញបានបើកសវនាការជំនុំជម្រះលើសំណុំរឿងមេដឹកនាំអតីតបក្សប្រឆាំង លោក សម រង្ស៊ី និងបក្ខពួក ២១ នាក់ ពាក់ព័ន្ធបទចោទរួមគំនិតក្បត់ និងបង្កភាពវឹកវរដល់សន្តិសុខសង្គម និងញុះញង់មិនឱ្យយោធិនស្តាប់បង្គាប់រាជរដ្ឋាភិបាល។
សវនាការពីម្សិលមិញគេឃើញមានតែជនត្រូវចោទចំនួន ១៣ នាក់ប៉ុណ្ណោះ ក្នុងចំណោម ២២ នាក់ ខណៈ ៩ នាក់ផ្សេងទៀត កំពុងភៀសខ្លួននៅក្រៅប្រទេស។ ជនត្រូវចោទទាំង ២២ នាក់ ដែលរួមទាំងលោក សម រង្ស៊ី ផងនោះត្រូវបានការពារសិទ្ធិដោយលោក មេធាវី សំ សុគង់ លោក មេធាវី ឡោ ជុនធី រីឯមេធាវី ២ រូបទៀត គឺជាមេធាវីចាត់តាំងពីគណៈមេធាវីរួមមានលោកស្រីមេធាវី ស៊ិន សាវ៉ន និង លោក មេធាវី យុង ផានិត។
ឆ្លើយនៅចំពោះមុខប្រធានក្រុមប្រឹក្សាជំនុំជម្រះមានលោក រស់ ពិសិដ្ឋ និងតំណាងអយ្យការ លោក សេង ហៀង និងលោក សម ឫទ្ធីវាសនា ពីម្សិលមិញ ជនត្រូវចោទឈ្មោះ ឡុង ផារី អាយុ ៥៨ ឆ្នាំ ជាអតីតក្រុមប្រឹក្សានៃអតីតគណបក្សសង្គ្រោះជាតិប្រចាំស្រុកកំពង់ត្របែក ខេត្តព្រៃវែងបានប្រាប់ចៅក្រមថា គាត់បានស្គាល់ឈ្មោះមេបក្សរបស់គាត់គឺលោក សម រង្ស៊ី និងលោកស្រី ជូឡុង ស៊ូម៉ូរ៉ា ជាភរិយារបស់លោក សម រង្ស៊ី ចំណែកមន្ត្រីជាន់ខ្ពស់នៅក្នុងបក្សនេះផ្សេងទៀតលោកធ្លាប់តែឮឈ្មោះតែប៉ុណ្ណោះ។ ប៉ុន្តែកាលពីគណបក្សនៅដំណើរការគាត់មានទំនាក់ទំនងជាប់ជាប្រចាំមួយលោក ហេង ដាណារ៉ូ ជាតំណាងរាស្ត្រខេត្តព្រៃវែង។
លោក ឡុង ផារី បន្តថា ក្រោយពីគណបក្សត្រូវបានតុលាការកំពូលរំលាយមកគឺលោកមិនដែលទាក់ទងទៅមនុស្សក្នុងបក្សទេហើយលោកបានមករត់ម៉ូតូឌុបនៅរាជធានីភ្នំពេញ។ សមត្ថកិច្ចបានចាប់លោកនៅរាជធានីភ្នំពេញដើមឆ្នាំ ២០២០ ពេលលោកអង្គុយផឹកកាហ្វេ។
លោក ផារី ថា៖ «ពេលខ្ញុំអង្គុយផឹកកាហ្វេខ្ញុំជជែកគ្នាពីកប៉ាល់វេស្ទើដាមចូលចតនៅខេត្តព្រះសីហនុដែលមានអ្នកផ្ទុកមេរោគកូវីដ ១៩ ផង។ លោកនាយករដ្ឋមន្ត្រី ហ៊ុន សែន បានបើកឱ្យកប៉ាល់នោះចូលចត។ ក្រៅពីនេះខ្ញុំមិនដែលទាក់ទងរឿងគណបក្សដែរ។ ពេលនេះខ្ញុំមិនដឹងថាខ្ញុំមានទោសអ្វីមួយទេ»។
លោក ផារី និយាយប្រាប់ចៅក្រមថា លោកលេងហ្វេសប៊ុក ប៉ុន្តែលោកមិនដែលហ្វ្រេនជាមួយអតីតថ្នាក់ដឹកនាំគណបក្សសង្គ្រោះជាតិណាម្នាក់ទេ។ លោកបានដឹងពីការបង្កើតចលនាសង្គ្រោះជាតិនៅសហរដ្ឋអាមេរិកនៅថ្ងៃទី ២៨ មករា ឆ្នាំ ២០១៨ តាមរយៈការស្តាប់វិទ្យុអាស៊ីសេរី និងវិទ្យុ VOA ប៉ុន្តែ លោកមិនដែលចូលរួមក្នុងចលនានេះទេ។ ដោយឡែកទាក់ទងនឹងថ្ងៃទី ៩ វិច្ឆិកា ឆ្នាំ ២០១៩ ដែលលោក សម រង្ស៊ី ប្រកាសវិលចូលប្រទេសវិញ កាលនោះមន្ត្រីបក្សសង្គ្រោះជាតិខេត្តព្រៃវែងបានឱ្យលោកដើរប្រមូលមនុស្សទៅទទួលដែរតែលោកមិនធ្វើតាម។
បើតាមលោក ងិន ឃាង អាយុ ៣២ ឆ្នាំ ដែលជាជនត្រូវចោទម្នាក់ទៀតបានឆ្លើយប្រាប់ចៅក្រមពីម្សិលមិញដែរថា លោកត្រូវបានសមត្ថកិច្ចចាប់ខ្លួននៅរាជធានីភ្នំពេញនៅថ្ងៃទី ១៧ មីនា ឆ្នាំ ២០២០។ មុនចាប់ខ្លួនលោកបានសរសេរសារក្នុងក្រុមដែលជាមិត្តភកិ្តអំពីជំងឺកូវីដ ១៩ ប៉ុន្តែលោកគ្មានទំនាក់ទំនងជាមួយអតីតគណបក្សសង្គ្រោះជាតិទេ។ ប៉ុន្តែលោកបានចូលរួមដង្ហែក្បួនឃោសនាបោះឆ្នោតគណបក្សសង្គ្រោះជាតិក្នុងឆ្នាំ ២០១៣ តែលោកមិនដែលគិតថាស្រឡាញ់គណបក្សនោះទេ។
លោក ងិន ឃាង និយាយថា៖ «ខ្ញុំបាននិយាយហ្វេសប៊ុកក្នុងក្រុមអំពីជំងឺកូវីដថា រដ្ឋាភិបាលកម្ពុជាបណ្តោយឱ្យយន្តហោះចូលក្នុងប្រទេស និងរិះគន់ក្រសួងសុខាភិបាលកម្ពុជា»។
បន្ទាប់ពីចៅក្រមសាកសួរ ជនត្រូវចោទ ងិន ឃាង ចប់ ហើយម្យ៉ាងដោយសារតែជនជាប់ចោទមានចំនួនច្រើនផងនោះលោកចៅក្រម រស់ ពិសិដ្ឋ បានប្រកាសលើកពេលសវនាការទៅថ្ងៃទី ២២ ខែមករាបន្តទៀត។
លោក នី សុខា ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុកបានផ្តល់សម្ភាសន៍ជាមួយក្រុមអ្នកសារព័ត៌មាននៅក្រៅបន្ទប់សវនាការថា បើមើលទៅអ្នកដែលពាក់ព័ន្ធនឹងគណបក្សសង្គ្រោះជាតិគឺរឿងនេះកើតមានក្រោយតុលាការរំលាយគណបក្ស។ ជាធម្មតាអាចមានការមិនសុខចិត្តនឹងការរំលាយគណបក្សនេះព្រោះអតីតសកម្មជនរបស់គណបក្សសង្គ្រោះជាតិមួយចំនួន គឺពួកគាត់មិនសុខចិត្តនឹងការរំលាយបក្ស។
លោកបន្តថា៖ «ខ្ញុំគិតថា ជារឿងនយោបាយទេ។ មិនមែនថាការរំលាយនេះរចនាសម្ព័ន្ធវារលាយបាត់ទៅឯណាតែវានៅតែមានការទាមទារ»។
លោក នី សុខា អះអាងថា ដំណោះស្រាយរឿងនេះគួរតែពាក់ព័ន្ធជាមួយមេបក្សធំៗជាអ្នកដឹងពីបញ្ហានេះហើយសវនាការដែលមានមេបក្សធំៗចូលប្រហែលជាមានការសួរដេញដោលបានច្បាស់លាស់ជាងនេះព្រោះនៅក្នុងកម្រិតពួកគាត់មានគម្លាតឆ្ងាយពីរចនាសម្ព័ន្ធដឹកនាំធំៗក្នុងគណបក្ស។ «ខ្ញុំគិតថាបើអាចឱ្យមេបក្សធំៗដែលកំពុងជាប់ចោទមកឆ្លើយចំពោះតុលាការខ្ញុំគិតថាជារឿងល្អ»៕
