ភ្នំពេញៈ សាលាដំបូងរាជធានីភ្នំពេញកាលពីព្រឹកថ្ងៃពុធម្សិលមិញបានបើកសវនាការជំនុំជម្រះសំណុំរឿង «ប្រមាថ» និង «ញុះញង់ឲ្យប្រព្រឹត្តបទល្មើសជាអាទិ៍» ដែលមានជនជាប់ចោទលោក សម រង្ស៊ី ហូរ វ៉ាន់ កាក់ កុម្ភារ និង គង់ ម៉ាស់។ ប៉ុន្តែលើកពេលប្រកាសទៅថ្ងៃក្រោយ។
សំណុំរឿងនេះតុលាការចោទប្រកាន់លោក សម រង្ស៊ី អតីតតំណាងរាស្ត្រ ហូរ វ៉ាន់ និងអតីតសមាជិកអតីតគណបក្សសង្គ្រោះជាតិ កាក់ កុម្ភារ ពីបទផ្ដើមគំនិតក្នុងការប្រព្រឹត្តបទប្រមាថ និងញុះញង់ឲ្យប្រព្រឹត្តបទល្មើសជាអាទិ៍។
ចំណែក គង់ ម៉ាស់ ជាប់ចោទពីបទ ប្រមាថ និងញុះញង់ឲ្យប្រព្រឹត្តបទល្មើសជាអាទិ៍។
នៅក្នុងសវនាការមានតែជនជាប់ចោទ គង់ ម៉ាស់ និងមេធាវីការពារ លោក សំ សុគង់ ប៉ុណ្ណោះ ខណៈជនជាប់ចោទ ៣ នាក់ផ្សេងទៀតអវត្តមាន។
លោកចៅក្រមជំនុំជម្រះ ពេជ្រ វិជ្ជាធរ បានលើកឡើងពីសំណុំរឿងនេះដោយបញ្ជាក់ថា ជនជាប់ចោទ គង់ ម៉ាស់ បានសរសេរនៅលើអាខោនហ្វេសប៊ុករបស់គាត់ចំនួន ៥ ចាប់ពីខែមេសាដល់ខែតុលា ឆ្នាំ ២០១៨ ដែលសារនៅលើអាខោនទាំងនោះមានខ្លឹមសារប្រមាថថា្នក់ដឹកនាំរាជរដ្ឋាភិបាល និងញុះញុង់ឲ្យមានភាពវឹកវរក្នុងសង្គម និងប៉ះពាល់ដល់សណ្ដាប់ធ្នាប់។
លោកចៅក្រមថ្លែងថា៖ «លោកបានសរសេរថា ហ៊ុន សែន បំផ្លាញព្រៃឈើនៅកម្ពុជា លោកអំពាវនាវឲ្យពលរដ្ឋងើបឡើងប្រឆាំងរដ្ឋាភិបាល ហើយគ្រោងបោះខិត្តប័ណ្ណ ១០ ម៉ឺនសន្លឹកដោយអំពាវនាវពលរដ្ឋកុំឲ្យទៅបោះឆ្នោត។ លោកថា គោ ក្រោលលោក ហ៊ុន សែន ចូលរួមបំផ្លាញលទ្ធិប្រជាធិបតេយ្យនៅកម្ពុជា។ តើការអំពាវនាវឲ្យពលរដ្ឋងើបឡើង លោកចង់មានន័យយ៉ាងម៉េច?»។
គង់ ម៉ាស់ បានឆ្លើយថា៖ «ខ្ញុំចង់ឲ្យប្រជាពលរដ្ឋផ្លាស់ប្ដូររាជរដ្ឋាភិបាលតាមរយៈការបោះឆ្នោត មិនមែនតាមរយៈរដ្ឋប្រហារ ឬមធ្យោបាយហិង្សាទេ»។
គង់ ម៉ាស់ បានបន្តថាលោកបានគេចខ្លួនទៅប្រទេសថៃមួយរយៈដោយសារបារម្ភពីសុវត្ថិភាពផ្ទាល់ខ្លួន ក្រោយពេលអតីតគណបក្សសង្គ្រោះជាតិត្រូវបានរំលាយកាលពីថ្ងៃទី ១៦ វិច្ឆិកា ២០១៧។ លោកបានស្នើសុំសិទ្ធិជ្រោកកោនក្នុងឋានៈជាជនភៀសខ្លួននៅការិយាល័យអង្គការសហប្រជាជាតិផ្នែកជនភៀសខ្លួន (UNHCR) ប៉ុន្តែសំណើសុំត្រូវបានច្រានចោល។
ចំណែកលោក សម រង្ស៊ី ត្រូវបានព្រះរាជអាជ្ញារង សេង ហ៊ាង ចោទថាជាអ្នកបញ្ជាទៅលើឈ្មោះ គង់ ម៉ាស់ ឲ្យបោះខិត្តប័ណ្ណ ១០ ម៉ឺនសន្លឹកដែលអំពាវនាវកុំឲ្យពលរដ្ឋទៅបោះឆ្នោត។
លោក សេង ហ៊ាង ថ្លែងថាបន្ទាប់មកឈ្មោះ គង់ ម៉ាស់ បានរៀបចំសារសម្រាប់បោះលើខិត្តប័ណ្ណ ហើយបានស្នើសុំថវិកាសម្រាប់បោះខិត្តប័ណ្ណនោះពីលោក សម រង្ស៊ី ឆ្លងតាមរយៈលោក ហូរ វ៉ាន់។ ចំណែកជនជាប់ចោទ កាក់ កុម្ភារ ត្រូវបានចោទថាជាអ្នកបញ្ជាឲ្យ គង់ ម៉ាស់ កាត់តសំឡេង ធី សុវណ្ណ ថា។ ប៉ុន្តែ គង់ ម៉ាស់ បានឆ្លើយថា លោកមិនបានទទួលបញ្ជាពីអ្នកផ្សេងទេ បន្ទាប់ពីគណបក្សត្រូវបានរំលាយ ហើយរាល់សារដែលលោកបង្ហោះគឺធ្វើឡើងដោយចិត្តខ្លួនឯង។
លោកថ្លែងថា៖ «ខ្ញុំរៀបចំខិត្តប័ណ្ណដោយខ្លួនឯង ដោយមិនមានការបញ្ជាពីណាទេ។ ខ្ញុំគ្រោងចែកចាយដើម្បីឲ្យរដ្ឋាភិបាលគិតពិចារណាម្ដងទៀតពីការរំលាយគណបក្សសង្គ្រោះជាតិ។ ខ្លឹមសារដែលខ្ញុំសរសេរ គឺខ្ញុំយកពីហ្វេសប៊ុករបស់លោកប្រធាន សម រង្ស៊ី ដែលសរសេរថា សូមពលរដ្ឋកុំទៅបោះឆ្នោតថ្ងៃទី ២៩ កក្កដា ២០១៨»។
គង់ ម៉ាស់ បដិសេធថាលោកមិនដែលវាយប្រហារ ឬប្រមាថលោក នាយករដ្ឋមន្ត្រី ហ៊ុន សែន ជាលក្ខណៈបុគ្គលទេ។ ទោះយ៉ាងណាតំណាងអយ្យការលោក សេង ហ៊ាង បានសន្និដ្ឋានថា ទង្វើរបស់ គង់ ម៉ាស់ និងជនជាប់ចោទ ៣ នាក់ទៀតគឺចូលក្នុងបទល្មើសប្រមាថ និងញុះញង់ ហើយលោកស្នើសុំឲ្យតុលាការផ្តន្ទាទោសពួកគេទៅតាមច្បាប់។
ប៉ុន្តែលោក សំ សុគង់ មេធាវីការពារ គង់ ម៉ាស់ ថ្លែងថាអ្វីដែល គង់ ម៉ាស់ បានសរសេរគឺមិនមែនជាការប្រមាថទេ ប៉ុន្តែជាការរិះគន់ដែលពលរដ្ឋក្នុងប្រទេសកាន់លទ្ធិប្រជាធិបតេយ្យអាចធ្វើបាន។
លោកថ្លែងថា៖ «ខ្ញុំពិនិត្យមើលសាររបស់គាត់គឺជាការរិះគន់ ប៉ុន្តែសារខ្លះមានពាក្យដែលធ្វើឲ្យយល់ច្រឡំ ដូចជាពាក្យថា ផ្លាស់ប្ដូរ។ ប៉ុន្តែអ្វីដែលគាត់ចង់មានន័យគឺការផ្លាស់ប្ដូរតាមរយៈការបោះឆ្នោត។ អត្ថន័យនៃសារទាំងនោះមិនមានខ្លឹមសារញុះញង់ទេ»។ លោកស្នើសុំឲ្យតុលាការអនុញ្ញាតឲ្យ គង់ ម៉ាស់ រួចផុតពីបទចោទ។ ជាពាក្យសម្ដីចុងក្រោយ គង់ ម៉ាស់ ក៏បានស្នើសុំឲ្យតុលាការទម្លាក់ការចោទប្រកាន់ដោយអះអាងថា អ្វីដែលលោកសរសេរគឺដើម្បីស្ថាបនាចំណុចអវិជ្ជមានរបស់រដ្ឋាភិបាល។
យោងតាមក្រមព្រហ្មទណ្ឌ ជនជាប់ចោទទាំង ៤ ប្រឈមមុខជាប់ពន្ធនាគារពី ៦ ខែ ដល់ ២ ឆ្នាំ។
លោកចៅក្រម ពេជ្រ វិជ្ជាធរ បានលើកពេលប្រកាសសាលក្រមទៅថ្ងៃទី ១៨ ខែតុលានេះ៕