ភ្នំពេញៈ សាលាដំបូងរាជធានីភ្នំពេញ កាលពីម្សិលមិញបានបើកសវនាការកំបាំងមុខ ជំនុំជម្រះសំណុំរឿងរបស់លោក សម រង្ស៊ី និងអ្នកជាប់ពាក់ព័ន្ធចំនួន ២ នាក់ទៀត ក្រោមការចោទប្រកាន់ពីបទបង្កការញុះញង់ឲ្យមានភាពវឹកវរដល់សង្គម ហើយការប្រកាសសាលក្រមនៃសំណុំរឿងនេះនឹងត្រូវធ្វើនៅថ្ងៃទី ៣០ ធ្នូ។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់តាមរយៈប្រព័ន្ធតេឡេក្រាមថា តុលាការនៅថ្ងៃទី ២១ ខែធ្នូបានលើកយកសំណុំរឿងលោក សម រង្ស៊ី មកធ្វើការជំនុំជម្រះជាសាធារណៈ។ នៅក្នុងសំណុំរឿងនេះមានឈ្មោះជនត្រូវចោទចំនួន ៣ នាក់គឺទី ១ លោក សម រង្ស៊ី មេដឹកនាំអតីតគណបក្សសង្គ្រោះជាតិទី ២ ព្រះតេជព្រះគុណ ប៊ុត ប៊ុនតិញ និងទី ៣ ឈ្មោះ ទុំ ប៊ុនថន។ លោកថ្លែងថា៖ «ជនទាំង ៣ នាក់ត្រូវចោទប្រកាន់ពីបទបង្កការញុះញង់ឲ្យមានភាពវឹកវរដល់សង្គម។ ចំពោះសាលក្រមនេះនឹងប្រកាសនៅថ្ងៃទី ៣០ ធ្នូខាងមុខ»។
លោក គុជ គឹមឡុង មិនបានប្រាប់ពីសមាសភាពនៃចៅក្រមក្នុងអង្គសវនាការជំនុំជម្រះក្នុងសំណុំរឿងនេះទេ តែបើតាមព្រះរាជអាជ្ញារងមួយរូបសុំមិនបញ្ចេញឈ្មោះប្រាប់ថា ប្រធានក្រុមប្រឹក្សាជំនុំជម្រះក្នុងរឿងនេះមានលោក រស់ ពិសិដ្ឋ និងលោក សេង ហៀង ជាតំណាងអយ្យការ។
ក្នុងបទចោទនេះ ប្រសិនបើតុលាការរកឃើញថា ពួកគេពិតជាបានប្រព្រឹត្តដូចការចោទប្រកាន់មែននោះនឹងត្រូវជាប់ពន្ធនាគារពី ៦ ខែដល់ ២ ឆ្នាំ និងពិន័យប្រាក់ពី ១ លានដល់ ៤ លានរៀល។
លោក គុជ គឹមឡុង មិនបានបញ្ជាក់លម្អិតពីអង្គហេតុនៃការជំនុំជម្រះនេះទេ តែបើតាមលោកព្រះរាជអាជ្ញារងខាងលើបានប្រាប់ថា សំណុំរឿងនេះពាក់ព័ន្ធនឹងករណីដែលលោក សម រង្ស៊ី បំភ្លៃព័ត៌មានពាក់ព័ន្ធនឹងការស្លាប់របស់ លោក ហុក ឡង់ឌី អតីតអគ្គស្នងការនគរបាលជាតិ និងករណីដែលលោក សម រង្ស៊ី បានញុះញង់ប្រជាពលរដ្ឋកុំឲ្យសងលុយដែលជំពាក់ធនាគារ។
បើតាមមន្ត្រីសាលាដំបូងរាជធានីភ្នំពេញកាលពីខែមិថុនា ឆ្នាំ ២០២០ លោក សម រង្ស៊ី ត្រូវបានតុលាការព្រហ្មទណ្ឌទីក្រុងប៉ារីសប្រទេសបារាំងដាក់ឲ្យស្ថិតនៅក្រោមការចោទប្រកាន់ពីបទ «បរិហារកេរ្តិ៍ជាសាធារណៈលើបុគ្គល» ទៅតាមបណ្ដឹងរបស់លោក ឌី វីជ្ជា កូនប្រុសរបស់លោក ហុក ឡង់ឌី។
ក្រៅពីសំណុំរឿងនេះលោក សម រង្ស៊ី ដែលកំពុងរស់នៅនិរទេសខ្លួនដោយខ្លួនឯងនៅក្រៅប្រទេសមានជាប់រឿងក្តីក្តាំជាច្រើនទៀតនៅតុលាការ។
មេធាវីការពារក្តីលោក សម រង្ស៊ី គឺលោក សំ សុគង់ មិនអាចទាក់ទងសុំអត្ថាធិប្បាយលើបញ្ហានេះបានទេកាលពីម្សិលមិញ៕
វីដេអូ៖