.jpg)
កាំភ្លើងកែច្នៃ ដែលបានបង្កអោយក្មេងប្រុសម្នាក់ស្លាប់កាលពីថ្ងៃទី ៩ ខែ មេសា។ សហការី
បាត់ដំបង: ក្មេងប្រុសអាយុ ១៤ ឆ្នាំម្នាក់ត្រូវបានសាលាដំបូងខេត្តបាត់ដំបងដោះលែងកាលពីម្សិលមិញ បន្ទាប់ពីរូបគេបានលេងកាំភ្លើងកែច្នៃបណ្តាលឲ្យរាលកៃត្រូវក្មេងប្រុសម្នាក់អាយុ ៩ ឆ្នាំ ស្លាប់កាលពីថ្ងៃទី ៩ ខែ មេសា ស្ថិតនៅភូមិដូនត្រិត ឃុំតាសាញ់ ស្រុកសំឡូត។
លោកស្រី ទៀង សំបូរ អ្នកនាំពាក្យសាលាដំបូងខេត្តបាត់ដំបង បានប្រាប់ភ្នំពេញប៉ុស្ដិ៍កាលពីម្សិលមិញថា ក្មេងប្រុស អាយុ ១៤ ឆ្នាំម្នាក់ ដែលកាន់កាំភ្លើងកែច្នៃ ហើយរាលកៃបណ្ដាលឲ្យក្មេងប្រុសអាយុ ៩ ឆ្នាំម្នាក់ស្លាប់នោះត្រូវបានលោក ធ្ធាំ ប៊ុណ្ណា ចៅក្រមស៊ើបសួរ ដោះលែងដោយសារជនសង្ស័យជាអនីតិជន។
លោកស្រីថា៖ «សមត្ថកិច្ចបានបញ្ជូនមកដល់តុលាការភ្លាម ក៏ត្រូវបានលោក ធ្ធាំ ប៊ុណ្ណា ចៅក្រមស៊ើបសួរជាអ្នកចាត់ចែង ក្រោយមកក៏ត្រូវបានដោះលែងគាត់វិញដោយសារ តែគាត់នៅតូចពេកគឺអនីតិជនមិនអាចឃុំខ្លួនគាត់ទេ»។
លោក ឈឿង គឹមសុង ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបងថ្លែងថា បន្ទាប់ពីទទួលសំណុំរឿងនេះ ពីអធិការដ្ឋាននគរបាលស្រុកសំឡូត លោកបានរៀបចំកសាងសំណុំរឿងបញ្ជូនបន្តទៅសាលាដំបូងខេត្តភ្លាមៗដែរ ប៉ុន្តែលោកមិនទាន់ដឹងថា តុលាការសម្រេចបែបណានោះទេ។
លោកបញ្ជាក់ថា៖ «ការសម្រេចឃុំខ្លួន ឬដោះលែង គឺជាការសម្រេចរបស់តុលាការ អានេះ គឺផុតដៃសមត្ថកិច្ចខ្ញុំហើយ»។
មន្ត្រីនគរបាលស្រុកសំឡូតសុំមិនបញ្ចេញឈ្មោះម្នាក់ឲ្យដឹងថា ក្មេងប្រុសរងគ្រោះបានស្លាប់ភ្លាមៗ កាលពីថ្ងៃទី ៩ ខែ មេសា បន្ទាប់ពីក្មេងប្រុសម្នាក់ទៀតអាយុ ១៤ ឆ្នាំ បានទាញយកកាំភ្លើងកែច្នៃ ១ ដើម ដែលនៅក្រោមគ្រែមកកាន់លេង ប៉ុន្ដែក្នុងអំឡុងពេលទាញមកនោះ បានប៉ះចំកៃវារេចុងកាណុង តម្រង់ទៅក្មេងរងគ្រោះនោះ ធ្វើឲ្យចេញគ្រាប់ពីដាងកង់ត្រូវចំមាត់ ធ្លាយទៅត្រចៀកម្ខាងទៀតបណ្ដាលឲ្យស្លាប់ភ្លាម។
លោកបន្តថា ក្រោយពេលកើតហេតុ សមត្ថកិច្ចបានចុះពិនិត្យដល់កន្លែងដោយរកឃើញថា ការបង្កឲ្យស្លាប់នេះកើតឡើងដោយអចេតនា ហើយបង្កដោយក្មេងអាយុ ១៤ ឆ្នាំនោះពិតមែន។ សមត្ថកិច្ចបានរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត បាត់ដំបង ដើម្បីចាត់ចែងតាមនីតិវិធី។
លោកបានបញ្ជាក់ថា៖ «ក្មេងហ្នឹងគ្មានបំណងអ្វីទៅបាញ់ក្មេងរងគ្រោះហ្នឹងទេ ព្រោះគាត់ជាអ្នកជិតខាងនឹងគ្នា ហើយពួកគេតែងតែលេងជាមួយគ្នារាល់ថ្ងៃ ឪពុកម្ដាយគាត់ថា តាំងពីមុនមក ពួកគេមិនដែលឈ្លោះគ្នាទេ ហើយផ្ទះគាត់នៅក្បែរគ្នាហ្នឹង»៕
