ភ្នំពេញៈ សាលាដំបូងរាជធានីភ្នំពេញគ្រោងនឹងបើកសវនាការដាច់ដោយឡែកពីគ្នានៅក្នុងខែមករានេះ លើសំណុំរឿងឃាតកម្មចំនួន ២ ពាក់ព័ន្ធអតីតឧកញ៉ាថោង សារ៉ាត់ និងអតីតអភិបាលខេត្តតាកែវលោក ឡាយ វណ្ណៈ រួមជាមួយបក្ខពួកចំនួន ៣ នាក់។
លោក សួស វីទ្យារ៉ាន់ឌី អ្នកនាំពាក្យរងសាលាដំបូងរាជធានីភ្នំពេញបានប្រាប់កាសែតភ្នំពេញប៉ុស្ដិ៍ឲ្យដឹងកាលពីថ្ងៃម្សិលមិញថា សំណុំរឿងជនសង្ស័យ ថោង សារ៉ាត់ នឹងបើកការជំនុំជម្រះចាប់ពីថ្ងៃទី ១៥-១៧ ខែមករា ឆ្នាំ ២០១៩។
លោក សួស វីទ្យារ៉ាន់ឌី បានឲ្យដឹងផងដែរថា សំណុំរឿង ជនសង្ស័យថោង សារ៉ាត់ និងជនសង្ស័យជាបក្ខពួកចំនួន ៦ នាក់ផ្សេងទៀតជាប់ចោទ ពីបទបាញ់ សម្លាប់លោកឧកញ៉ា អ៊ឹង ម៉េងជឺ ថៅកែស៊ីម៉ងត៍សញ្ញាត្បូងពេជ្រ នៅក្នុងសង្កាត់ ទួលស្វាយព្រៃ ខណ្ឌចំការមន កាលពីអំឡុងចុងឆ្នាំ ២០១៤ នឹងបើកជំនុំជម្រះ នៅថ្ងៃទី ១៥ ទី ១៦ និងទី ១៧ ខែមករាឆ្នាំ ២០១៩។
ជនសង្ស័យក្នុងសំណុំរឿងនេះត្រូវបានបញ្ជូនទៅឃុំខ្លួនបណ្ដោះអាសន្នពីបទផ្តើមគំនិតក្នុងអំពើឃាតកម្មគិតទុកជាមុន តាមមាត្រា ២៨ និងមាត្រា ២០០ នៃក្រមព្រហ្មទណ្ឌ នៅពន្ធនាគារព្រៃសកាលពីថ្ងៃទី ១៧ មេសា ឆ្នាំ ២០១៥។
ជនសង្ស័យ ថោង សារ៉ាត់ ធ្លាប់មានឋានៈជាឧត្តមសេនីយ៍ទោនៃកងយោធពលខេមរភូមិន្ទ ជាថៅកែសាច់ប៉ាត់តេ ៩៩៩ ជាម្ចាស់បុរី ៩៩៩ និង ជាប្រធានក្រុមហ៊ុន Meanchey International Investment ដែលជាមេខ្លោងក្នុងការបាញ់សម្លាប់ ឧកញ៉ា អ៊ឹង ម៉េងជឺ។
ជនសង្ស័យ ៤ នាក់ផ្សេងទៀតរួមមាន ឈ្មោះ សៀង វាសនា ភេទប្រុស អាយុ ៤៤ ឆ្នាំ និង ឈ្មោះ លី សៅ ហៅ វី ភេទប្រុស អាយុ ៤៣ ឆ្នាំ ត្រូវបានតុលាការសម្រេចចោទប្រកាន់ពីបទ «ឃាតកម្មគិតទុកជាមុន» តាមមាត្រា ២០០ នៃក្រមព្រហ្មទណ្ឌ និងឈ្មោះ មាស សម្បត្តិ ភេទប្រុស អាយុ ២៧ ឆ្នាំ និងឈ្មោះ កូយ ចាន់ថុល ភេទប្រុស អាយុ ២៩ ឆ្នាំ ត្រូវបានចោទប្រកាន់ពីបទ «សមគំនិតក្នុងអំពើឃាតកម្មគិតទុកជាមុន» តាមមាត្រា ២៩ នៃក្រមព្រហ្មទណ្ឌកាលពីខែធ្នូ ឆ្នាំ ២០១៤។
មេធាវីការពារលោក ថោង សារ៉ាត់ គឺលោកមេធាវី ទួត លុច មិនអាចទាក់ទងសុំការអត្ថាធិប្បាយបានទេ។
លោក វិទ្យារ៉ាន់ឌី បានឲ្យដឹងផងដែរថា សំណុំរឿងដោយឡែកមួយទៀតពាក់ព័ន្ធជាមួយជនសង្ស័យ ឡាយ វណ្ណៈ អតីតអភិបាលខេត្តតាកែវ និងបក្ខពួក ៣ នាក់ទៀត ជាប់ចោទពីបទឃាតកម្មសម្លាប់នារី ចេវ សុវឌ្ឍនា នឹងត្រូវបើកសវនាការជំនុំជម្រះ នៅថ្ងៃទី ២៣ មករា ឆ្នាំ ២០១៩ នេះដែរ។
លោក វីទ្យារ៉ាន់ឌី បានឲ្យដឹងថា ករណីជនសង្ស័យឡាយ វណ្ណៈ ត្រូវបានស៊ើបសួរអស់រយៈពេលជាង ៩ ខែ។ គួររំឭកដែរថា កាលពីល្ងាចថ្ងៃទី ៣ ខែមេសា ឆ្នាំ ២០១៨ លោក កូយ សៅ ចៅក្រមស៊ើបសួរ សាលាដំបូងរាជធានីភ្នំពេញ បានសម្រេចឃុំខ្លួន លោក ឡាយ វណ្ណៈ និង លោក ឡាយ ណារិទ្ធ អតីតស្នងការរងនគរបាលខេត្តតាកែវ ត្រូវជា បងប្រុស លោក ឡាយ វណ្ណៈ។
ជនសង្ស័យឡាយ វណ្ណៈ បានប្រព្រឹត្តអំពើឃាតកម្មទៅលើ លោកស្រី ចេវ សុវឌ្ឍនា នៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី ២៦ ខែមករា ឆ្នាំ ២០១៨ តាមមាត្រា ១៩៩ នៃក្រមព្រហ្មទណ្ឌខណៈពេលដែល ឈ្មោះ ម៉េន សាម៉ៃ ភេទប្រុស អាយុ ៣៦ ឆ្នាំ និង ឈ្មោះ ជឹម វុធ ហៅថូត ភេទប្រុស អាយុ ៤១ ឆ្នាំ ត្រូវបានចោទប្រកាន់ពីបទលាក់បំបាំងតម្រុយ ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុងក្រុងដូនកែវ ខេត្តតាកែវ កាលពីថ្ងៃទី ២៦ ខែមករា ឆ្នាំ ២០១៨ តាមមាត្រា ៥៣២ នៃក្រមព្រហ្មទណ្ឌ។
លោក ជិន ម៉ាលិន អ្នកនាំពាក្យក្រសួងយុត្តិធម៌បានថ្លែងកាលពីថ្ងៃម្សិលមិញថា ករណីរបស់លោក ថោង សារ៉ាត់ ស៊ីពេលយូរជាងសំណុំរឿងផ្សេងទៀតដោយបណ្តាអង្គហេតុ និងដំណើរការនៃការស៊ើបអង្កេតមានភាពស្មុគស្មាញ ហើយតុលាការត្រូវបំពេញភារកិច្ចរបស់ខ្លួនក្នុងការផ្តល់យុត្តិធម៌គ្រប់ភាគីដែលពាក់ព័ន្ធ។
លោកបានថ្លែងថា៖ «បើភាគីណាមួយយល់ថាមិនមានភាពយុត្តិធម៌ សម្រាប់ខ្លួន តាមគោលការណ៍ច្បាប់ ខ្លួនអាចប្រើប្រាស់សិទ្ធិក្នុងការប្តឹងផ្ដល់ជំទាស់ទៅនឹងសេចក្ដីសម្រេចបាន»៕