.jpg)
លោក គង់ រ៉ៃយ៉ា ត្រូវបានតុលាការសម្រេចអោយនៅក្រៅឃុំបណ្តោះអាសន្នកាលពីថ្ងៃទី ២៩ ខែវិច្ឆិកា។ ហុង មិនា
ភ្នំពេញៈ សាលាដំបូងរាជធានីភ្នំពេញនឹងបើកសវនាការជំនុំជម្រះរឿងក្តីលោក គង់ រ៉ៃយ៉ា នាថ្ងៃទី ២០ ខែធ្នូនេះក្នុងសំណុំរឿងចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ក្រោយពីត្រូវបានដោះលែងឲ្យនៅក្រៅឃុំបណ្តោះអាសន្នកាលពីថ្ងៃទី ២៩ ខែវិច្ឆិកា។
លោក សំ សុគង់ មេធាវីការពារសិទ្ធិឲ្យលោក គង់ រ៉ៃយ៉ា ប្រាប់ភ្នំពេញប៉ុស្តិ៍ពីម្សិលមិញថាសំណុំរឿងចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍នេះតុលាការនឹងបើកសវនាការជំនុំជម្រះនៅថ្ងៃទី ២០ ខែធ្នូ ខាងមុខ។ លោកថា ពេលនោះលោកនឹងស្នើសុំតុលាការទម្លាក់បទចោទប្រកាន់កូនក្តីរបស់លោកចោល។
លោកមេធាវី ថ្លែងថាកូនក្តីលោកឈ្មោះ គង់ រ៉ៃយ៉ា ត្រូវបានដោះលែងឲ្យមានសេរីភាពវិញកាលពីថ្ងៃទី ២៩ វិច្ឆិកា ពាក់ព័ន្ធនឹងបទចោទញុះញង់ឲ្យប្រព្រឹត្តបទឧក្រិដ្ឋជាអាទិ៍ ហើយមានលោកស្រី ចៅក្រម អ៊ុករ៉េត គន្ធា បានប្រកាសសាលក្រមនេះ។
លោក សំ សុគង់ ប្រាប់ថា ក្នុងនាមលោកជាមេធាវីការពារលោក គង់ រ៉ៃយ៉ា លោកសប្បាយចិត្តដែលតុលាការដោះលែងកូនក្តីរបស់លោកឲ្យនៅក្រៅឃុំបណ្តោះអាសន្ន។ ព្រោះលោកថា កូនក្តីរបស់លោកគ្មានកំហុសដូចដែលតុលាការបានចោទប្រកាន់ទេ។ ប៉ុន្តែតុលាការបានដាក់លក្ខខណ្ឌមួយចំនួនដល់កូនក្តីដូចជាមិនឲ្យចេញក្រៅប្រទេស កម្ពុជា មិនឲ្យដូរលំនៅឋាន បង្ហាញខ្លួននៅតុលាការនាថ្ងៃទី ២០ ធ្នូ និងហាមបង្ហោះសារទាក់ទងនឹងសំណុំរឿងក្តី។
លោក សុគង់ ថ្លែងថា៖ «ការដែលតុលាការដាក់លក្ខខណ្ឌក្នុងសាលក្រមដោះលែងឲ្យនៅក្រៅឃុំហ្នឹងវាលែងមានសុពលភាពហើយ នៅពេលដែលសាលក្រមក្នុងអង្គសេចក្តីសម្រេចនៅថ្ងៃទី ២០ ខែធ្នូនេះ»។
លោកបញ្ជាក់ថា៖ «ខ្ញុំនៅតែសង្ឃឹមថា តុលាការនឹងទម្លាក់បទចោទដល់កូនក្តីខ្ញុំចោល។ ដោយសារថា ខ្ញុំសិក្សាលើសំណុំរឿងរបស់កូនក្តីខ្ញុំ និងភ័ស្តុតាងមួយចំនួនមិនបង្ហាញថាកូនក្តីខ្ញុំបានប្រព្រឹត្តទេ»។
លោក សំ សុគង់ បញ្ជាក់ថា បន្ទាប់ពីមានការចាប់ខ្លួនលោក គង់ រ៉ៃយ៉ា ពាក់ព័ន្ធនឹងការលក់អាវយឺតដែលមានរូបលោក កែម ឡី នេះលោកជាមេធាវីបានដាក់បណ្តឹងសុំនៅក្រៅឃុំ ហើយត្រូវបានសាលាដំបូងរាជធានីភ្នំពេញបដិសេធ។ ដោយមិនសុខចិត្តលោក គង់ រ៉ៃយ៉ា បានពឹងពាក់ឲ្យលោកប្តឹងសារទុក្ខទៅសាលាឧទ្ធរណ៍ និងតុលាការកំពូលបន្តទៀត។ ប៉ុន្តែត្រូវបានតុលាការទាំង ២ ថ្នាក់បដិសេធមិនឲ្យលោក គង់ រ៉ៃយ៉ា នៅក្រៅឃុំដដែល។
លោកបន្តថា បន្ទាប់ពីត្រូវបានតុលាការទាំង ៣ ថ្នាក់បដិសេធជាលើកទី ១ ហើយនោះកូនក្តីរបស់លោកបានពឹងពាក់លោកឲ្យដាក់ពាក្យប្តឹងសុំនៅក្រៅឃុំជាលើកទី ២ ម្តងទៀតនៅសាលាដំបូងរាជធានីភ្នំពេញ ហើយត្រូវបានតុលាការជំនុំជម្រះកាលពីថ្ងៃទី ១៤ វិច្ឆិកា និងប្រកាសសាលក្រមនៅថ្ងៃទី ២៩ វិច្ឆិកា ដោយសម្រេចដោះលែងកូនក្តីរបស់លោកឲ្យនៅក្រៅឃុំ។
លោក សុគង់ បញ្ជាក់ថា ប៉ុន្តែដោយសារសំណុំរឿងក្តីនេះបានបញ្ជូនដល់ដៃចៅក្រមជំនុំជម្រះហើយនោះ ដូច្នេះតុលាការនឹងធ្វើការជំនុំជម្រះរឿងក្តីនេះនៅក្នុងអង្គសេចក្តីដែលមានន័យថា តើត្រូវផ្តន្ទាទោស ឬក៏ត្រូវទម្លាក់ចោលបទចោទប្រកាន់នេះ។
អ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ មិនអាចទាក់ទងសុំការបញ្ជាក់បានទេពីម្សិលមិញ។
អ្នកស្រី សុខ ស្រីនិច ជាភរិយារបស់លោក គង់ រ៉ៃយ៉ា ប្រាប់ពីម្សិលមិញដែរថាអ្នកស្រីត្រេកអរណាស់នៅពេលដែលសាលាដំបូងរាជធានីភ្នំពេញសម្រេចដោះលែងប្តីរបស់អ្នកស្រីបាននៅក្រៅឃុំបែបនេះ។ ព្រោះចាប់តាំងពីប្តីរបស់អ្នកស្រីជាប់ឃុំរយៈពេលជាង ៧ ខែមកនេះធ្វើឲ្យជីវភាពគ្រួសារអ្នកស្រីជួបការលំបាកដោយសារត្រូវរកលុយចិញ្ចឹមកូនស្រីតូចអាយុ ១ ឆ្នាំ។
អ្នកស្រីនិយាយថា៖ «ទោះយ៉ាងណា ខ្ញុំសង្ឃឹមថាតុលាការនឹងទម្លាក់បទចោទប្រកាន់លើប្តីខ្ញុំនៅថ្ងៃទី ២០ ធ្នូ ខាងមុខ ព្រោះថាគាត់គ្មានកំហុសដែលត្រូវចោទប្រកាន់ទេ»។
លោក គង់ រ៉ៃយ៉ា ត្រូវបានសមត្ថកិច្ចចាប់ឃុំខ្លួននៅថ្ងៃទី ១១ ខែ កក្កដា ឆ្នាំ ២០១៩ ដោយរងការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការអំពាវនាវលក់អាវយឺតមានរូប និងទ្រឹស្តីរបស់លោក កែម ឡី មុនថ្ងៃគម្រប់ខួប ៣ ឆ្នាំ នៃឃាតកម្មលើលោក កែម ឡី ដែលបានកើតឡើងកាលពីថ្ងៃទី ១០ ខែ កក្កដា ឆ្នាំ ២០១៦៕
