ព្រៃវែងៈ សាលាដំបូងខេត្តព្រៃវែងនឹងប្រកាសសាលក្រមលើជនជាប់ចោទម្នាក់នៅចុងខែនេះ បន្ទាប់ពីបានបើកសវនាការជំនុំជម្រះកាលពីថ្ងៃទី ៨ ខែកញ្ញា លើសំណុំរឿងចាប់ស្ត្រីម្នាក់រំលោភនៅក្នុងឃុំច្រេស ស្រុកមេសាង កាលពីខែមេសា។
លោក ចាន់ វណ្ណៈ អ្នកនាំពាក្យសាលាដំបូងខេត្តព្រៃវែងបានប្រាប់ភ្នំពេញប៉ុស្តិ៍ពីម្សិលមិញថា សំណុំរឿងនេះមានជនជាប់ចោទឈ្មោះ ខុន រិត អាយុ ២៩ ឆ្នាំ ជាអ្នកបើករថយន្តឈ្នួលពាក់ព័ន្ធចាប់រំលោភស្ត្រីម្នាក់ជាអ្នកជិះរថយន្តប្រព្រឹត្តកាលពីកាលថ្ងៃទី ២៥ ខែ មេសា ឆ្នាំ ២០២០ ក្នុងឃុំច្រេស ស្រុកមេសាង ខេត្តព្រៃវែង។
លោក វណ្ណៈ បានថ្លែងឲ្យដឹងថា៖ «នៅថ្ងៃទី ៨ កញ្ញា សំណុំរឿងនេះបានជំនុំជម្រះមែនហើយ»។
ទោះយ៉ាងណាបើតាមលោកនាយនគរបាលប៉ុស្តិ៍ឃុំច្រេស រំឭកប្រាប់កាលពីម្សិលមិញថានៅយប់ថ្ងៃទី ២៥ ខែ មេសា ឆ្នាំ ២០២០ ស្ត្រីរងគ្រោះឈ្មោះមានអាយុ ៣៣ ឆ្នាំ រស់នៅស្រុករមាសហែក ខេត្តស្វាយរៀងបានជិះរថយន្តរបស់ជនជាប់ចោទពីរាជធានីភ្នំពេញទៅខេត្តព្រៃវែង។
លុះដល់ចំណុចកើតហេតុឃុំច្រេស ស្រុកមេសាង ខណៈដាក់ម៉ូយពីក្នុងរថយន្តអស់ហើយនោះ ជនសង្ស័យបានចាប់ស្ត្រីរងគ្រោះរំលោភសេពសន្ថវៈរហូតបានសម្រេចនៅលើរថយន្តរបស់ខ្លួន។ បន្ទាប់មកជនជាប់ចោទបានដាក់ស្ត្រីរងគ្រោះចោល រីឯជនជាប់ចោទបានបើករថយន្តគេចខ្លួនបាត់។
លោកបន្តថា ករណីនេះនគរបាលប៉ុស្តិ៍បានទទួលពាក្យបណ្តឹងពីស្ត្រីរងគ្រោះ។ ស្ត្រីរងគ្រោះបានប្តឹងសមត្ថកិច្ចរបស់លោកនៅថ្ងៃទី ២៦ មេសា ឆ្នាំ ២០២០។ បើតាមបណ្តឹងនោះបានរៀបរាប់ឲ្យដឹងថា គាត់បានហៅរថយន្តរបស់បុរសឈ្មោះ ខុន រិត ម៉ាកសាំងយ៉ុង ពណ៌សម្បកឪឡឹកពាក់ស្លាកលេខភ្នំពេញ 2AR-5640 ជិះ ប៉ុន្តែមិនទាន់ដល់គោលដៅផងក៏យប់ងងឹតរីឯអ្នកជិះក្នុងរថយន្តក៏ចុះអស់ទៀត។ ពេលនោះអ្នកបើករថយន្តនោះបានចាប់ស្ត្រីរងគ្រោះរំលោភបានសម្រេចតែម្តង។
ក្រោយទទួលបានពាក្យបណ្តឹងភ្លាមសមត្ថកិច្ចបានរាយការណ៍ទៅលោកអធិការនគរបាលស្រុកមេសាង ហើយលោកអធិការបានបញ្ជាឲ្យប្រតិបត្តិការស្រាវជ្រាវចាប់ជនសង្ស័យបានដែលជនម្នាក់នេះរស់នៅភូមិបឹង ឃុំច្រេស ស្រុកមេសាង ខេត្តព្រៃវែងនាំយកមកសាកសួរនៅប៉ុស្តិ៍នគរបាលឃុំច្រេស។ ក្រោយសាកសួរជនសង្ស័យបានសារភាពថា ខ្លួនពិតជាបានចាប់ស្ត្រីរងគ្រោះរំលោភពិតមែនហើយសមត្ថកិច្ចបានធ្វើកំណត់ហេតុបញ្ជូនទៅស្នងការដ្ឋាននគរបាលខេត្តព្រៃវែង៕