.jpg)
លោក James Ricketson ពេលត្រូវនាំទៅពន្ធនាគារព្រៃសវិញ។ ផា លីណា
ភ្នំពេញៈ ការជុំនំជម្រះផលិតករភាពយន្តជនជាតិអូស្ត្រាលីពាក់ព័ន្ធរឿង «ចារកម្ម» បានបញ្ចប់ហើយកាលពីម្សិលមិញដោយត្រូវរង់ចាំការប្រកាសសាលក្រមនៅថ្ងៃសុក្រនេះ។
លោក James Ricketson ត្រូវបានឃុំខ្លួនអស់រយៈពេល ៤៥៤ ថ្ងៃមកហើយបន្ទាប់ពីគាត់ត្រូវបានចាប់ខ្លួនកាលពីខែមិថុនា ឆ្នាំ ២០១៨។ គាត់ត្រូវបានចោទប្រកាន់ពីបទប្រមូលព័ត៌មានដែលធ្វើឱ្យអន្តរាយដល់ការការពារជាតិរបស់កម្ពុជាដោយយោងតាមមាត្រា ៤៤៦ នៃក្រមព្រហ្មទណ្ឌ។
លោក សៀង សុខ ព្រះរាជអាជ្ញាបានធ្វើសេចក្តីសន្និដ្ឋានកាលពីម្សិលមិញថា លោក Ricketson បានប្រមូលព័ត៌មានដែលធ្វើឱ្យប៉ះពាល់ដល់ការការពារជាតិកម្ពុជាចាប់តាំងពីឆ្នាំ ១៩៩៥ មក។
លោក សៀង សុខ ថ្លែងថា៖ «ចាប់តាំងពីឆ្នាំ ១៩៩៥ មកគាត់បានចូលមកប្រទេសកម្ពុជាដើម្បីប្រមូលព័ត៌មានអំពីស្ថានភាពសង្គម សន្តិសុខ និងផ្តល់ទៅឱ្យជនបរទេសម្តងហើយម្តងទៀត»។
លោក សៀង សុខ បញ្ជាក់ថាលោក Ricketson បានប្រើប្រាស់ទិដ្ឋាការទេសចរណ៍ និងមានទំនាក់ទំនងយ៉ាងជិតស្និទ្ធជាមួយមេដឹកនាំគណបក្សសង្គ្រោះជាតិរួមមានទាំងលោក សម រង្ស៊ី លោក កឹម សុខា លោក យឹម សុវណ្ណ លោកស្រី ជូឡុង សូមូរ៉ា និងស្រី មូរ សុខហួ ជាដើម។
លោក សៀង សុខ បន្តថា៖ «ដើម្បីបិទបាំងសកម្មភាពចារកម្មរបស់គាត់ ជនជាប់ចោទបានបង្ហាញខ្លួនថាជាបុគ្គលិកមនុស្សធម៌ ប៉ុន្តែសកម្មភាពនេះគឺដើម្បីប្រមូលព័ត៌មានដោយខុសច្បាប់ដោយគ្មានការអនុញ្ញាតពីអាជ្ញាធររដ្ឋ»។ «ជនជាប់ចោទបានញុះញង់ឱ្យប្រទេសក្រៅស្អប់កម្ពុជាជាពិសេសស្អប់សម្តេចតេជោដែលជាមេដឹកនាំកំពូលរបស់ប្រទេសកម្ពុជា»។
លោក សៀង សុខ ថ្លែងថាលោក Ricketson បានផលិតខ្សែវីដេអូចំនួន ៥ ស្តីអំពីប្រទេសកម្ពុជាដោយមានបំណងធ្វើឱ្យប្រជាពលរដ្ឋស្អប់រដ្ឋាភិបាលកម្ពុជា និងផ្លាស់ប្តូរអ្នកដឹកនាំប្រទេស។
ព្រះរាជអាជ្ញាបានស្នើថា៖ «សកម្មភាពរបស់ជនជាប់ចោទទាំងនោះគឺបានរំលោភលើមាត្រា ៤៣៩ និងមាត្រា ៤៤៦ នៃក្រមព្រហ្មទណ្ឌ។ ខ្ញុំចង់ឱ្យក្រុមប្រឹក្សាជំនុំជម្រះផ្តន្ទាទោសជនជាប់ចោទតាមផ្លូវច្បាប់»។
លោក គង់ សំអុន មេធាវីការពារក្តីរបស់លោក Ricketson បាននិយាយថា លោក Ricketson ត្រូវបានចោទប្រកាន់អំពីបទល្មើសដែលគាត់មិនប្រព្រឹត្តពីព្រោះក្រមព្រហ្មទណ្ឌនេះទើបតែមានកាលពីឆ្នាំ ២០១០ ប៉ុណ្ណោះ។
លោកបាននិយាយថា ច្បាប់មិនអាចធាក់ថយក្រោយទេ។
មេធាវីរូបនេះបានថ្លែងថា ប្រសិនបើលោក Ricketson នៅសមរភូមិប្រយុទ្ធ ហើយគាត់បានប្រមូលព័ត៌មានដោយសម្ងាត់អំពីកម្ពុជា នោះវាស័ក្តិសមឲ្យគាត់ទទួលខុសត្រូវចំពោះបទចោទប្រកាន់នេះ។
លោក សំអុន បានសួរថាគាត់សរសេរអត្ថបទផលិតភាពយន្ត ហើយបង្ហាញទៅសាធារណជន តើអំពើចារកម្មគឺជាការធ្វើដូចនេះឬ?
លោកបានថ្លែងថា៖ «ខ្ញុំសូមឲ្យចៅក្រមអនុញ្ញាតឲ្យកូនក្តីរបស់ខ្ញុំរួចផុតពីបទចោទប្រកាន់តាមមាត្រា ៤៤៦ ហើយឲ្យគាត់មានសេរីភាព ហើយប្រគល់របស់របររបស់គាត់ទៅគាត់វិញ»។
ជាពាក្យចុងក្រោយរបស់លោក Ricketson បានចំណាយពេលប្រហែល ៣០ នាទីពន្យល់អំពីករណីរបស់លោក។
លោកបានសុំទោសអំពីពាក្យសម្តីអាក្រក់របស់លោកអំពីកម្ពុជានៅក្នុងអ៊ីមែលដែលលោកបានសរសេរទៅអតីតនាយករដ្ឋមន្ត្រីអូស្ត្រាលី។
លោកបានថ្លែងថា៖ «ជាការបញ្ចប់ ខ្ញុំមិនគិតថាអ្វីដែលខ្ញុំបានធ្វើជាបទល្មើសនោះទេ លើកលែងតែវិជ្ជាជីវៈអ្នកកាសែតជាបទល្មើស»។
លោកថ្លែងថា៖ «ខ្ញុំសង្ឃឹមថានឹងមានយុត្តិធម៌ដោយផ្អែកទៅលើការពិត ភ័ស្តុតាង និងសេចក្តីពិត។ សេចក្តីពិតនឹងផ្តល់យុត្តិធម៌ដល់អ្នក» ហើយខ្ញុំសូមថ្លែងអំណរគុណចៅក្រម។ ប្រធានចៅក្រមលោក សេង លាង បានថ្លែងថា សាលក្រមនឹងចេញនៅព្រឹកថ្ងៃសុក្រ (៣១ ខែសីហា វេលាម៉ោង ៨:៣០)៕ NS&PS
