រតនគីរីៈ លោក ខាំ នីន អាយុ ៣៩ ឆ្នាំ ជាជនជាតិដើមទំពួនត្រូវបានបង្គាប់ឲ្យចូលបំភ្លឺក្នុងសាលាដំបូងខេត្តរតនគិរី នៅខែកុម្ភៈ ដោយត្រូវចោទពីបទ កាប់គាស់ រុករានដីព្រៃ ឆ្ការ ដុតនិងឈូសឆាយព្រៃដើម្បីយកមកធ្វើជាកម្មសិទ្ធិ។ យោងតាមដីកាបង្គាប់ឲ្យចូលខ្លួនរបស់ចៅក្រមស៊ើបសួរចេញកាលពីខែមករា ហើយភ្នំពេញប៉ុស្តិ៍ទើបទទួលបានកាលពីម្សិលមិញ។
ដីកាបង្គាប់នេះបានឲ្យដឹងថាលោក នីន កំពុងកាន់កាប់ផ្ទៃដីសរុបជាង ៣៩ ហិកតា ស្ថិតក្នុងភូមិកែងសាន់ ឃុំសេដា ស្រុកលំផាត់ ខេត្តរតនគិរី កាលពីខែកញ្ញា ឆ្នាំ ២០១៨ ត្រូវចោទពីបទល្មើសមានចែងនៅក្នុងបញ្ញត្តិនៃច្បាប់ស្ដីពីតំបន់ការពារធម្មជាតិ ដែលត្រូវបង្គាប់ឲ្យចូលទៅកាន់សាលាដំបូងខេត្តរតនគិរីនៅថ្ងៃទី ១២ ខែកុម្ភៈ ឆ្នាំ ២០១៩។
លោក ខាំ នីន ប្រាប់កាសែតភ្នំពេញប៉ុស្ដិ៍កាលពីម្សិលមិញ ដោយបានបដិសេធ និងអះអាងថាសំណុំរឿងចោទប្រកាន់នេះគឺកើតឡើងពីការសងសឹករបស់មេភូមិកែងសាន់ឈ្មោះ ញ អង្គួត ដោយសារតែគាត់ត្រូវទទួលរងបណ្ដឹងបរិហារផ្លូវការ កាលពីឆ្នាំ ២០១៧ ជុំវិញការឃុបឃិតគ្នាលក់ដីរដ្ឋនិងបើកដៃឱ្យជនជាតិវៀតណាមកាប់បំផ្លាញព្រៃឈើក្នុងតំបន់អភិរក្ស។
លោក ខាំ នីន បានអះអាងថាកាលពីឆ្នាំ ២០១៤ បានឲ្យលោកមេភូមិ ញ អង្គួតខ្ចីលុយចំនួន ២០ លានរៀលជាបណ្ដោះអាសន្នដើម្បីសាងសង់សាលាភូមិហើយបានសន្យាសងវិញនៅពេលថ្នាក់លើទម្លាក់ថវិកាឲ្យភូមិ។ ប៉ុន្តែនៅពេលដែលគ្មានលុយសងលោកមេភូមិបានធ្វើលិខិតកាន់កាប់ដីមួយកន្លែងជាថ្នូរក្នុងការសងលុយ។
លោក នីន ថ្លែងថា៖ «ចុងក្រោយគាត់ (មេភូមិ) ធ្វើលិខិតឱ្យខ្ញុំកាន់កាប់ដីនេះ ដល់ពេលឥឡូវ គាត់ប្ដឹងថាខ្ញុំកាប់រានដីនេះទៅទៀត»។
ទោះជាយ៉ាងណាលោក នីន អះអាងថា នឹងបង្ហាញខ្លួនតាមកាលកំណត់របស់ដីកាតុលាការ។ លោកញ អង្គួត កាលពីម្សិលមិញបានបដិសេធមិនឆ្លើយតបក្នុងការសុំអត្ថាធិប្បាយ។ លោកអង់ ប៊ុនធៀង មេឃុំសេដាក៍បានឆ្លើយប្រហាក់ប្រហែលនឹងលោក អង្គួតដែរ។
កាលពីខែតុលា ឆ្នាំ ២០១៧ កន្លងទៅនេះ ទាំងលោក ញ អង្គួត និងលោក អង់ ប៊ុនធៀង គឺសុទ្ធតែមានឈ្មោះរួមជាមួយមន្ត្រីពាក់ព័ន្ធខេត្តរតនគីរីចំនួន ៨ នាក់ទៀត ក្នុងពាក្យបណ្ដឹងបរិហារផ្លូវការមួយ ពីក្រុមលោក ខាំ នីន និងមន្ត្រីសមាគមអាដហុក ដែលបានប្ដឹងទៅតុលាការថា មន្ត្រីទាំងនេះបានឃុមឃិតគ្នាយកដីរដ្ឋនិងដីព្រៃលក់ឱ្យឈ្មួញឈូសឆាយកម្ទេចជាបន្តបន្ទាប់ តាំងពីឆ្នាំ ២០១៤ រហូតដល់ឆ្នាំ ២០១៧ ហើយនឹងមិនអើពើករណីបទល្មើសមួយទៀតដែលជនជាតិវៀតណាម នាំគ្នាចូលមកកាប់បំផ្លាញឈើប្រណីតដូចជា គគី កកោះ សុគ្រម ពពាល ត្បែងជាដើមស្ថិតក្នុងភូមិកែងសាន់ ហើយបានដឹកតាមរថយន្តធំឆ្ពោះទៅកាន់ប្រទេសវៀតណាមក្នុងមួយថ្ងៃៗប្រហែល ២០ រថយន្ត កាលពីអំឡុងខែមីនាដល់ខែមេសាឆ្នាំ ២០១៧។
លោក ប៉ែន ប៊ុណ្ណារ៌ មន្ត្រីកម្មវិធីពង្រឹងសិទ្ធិអំណាចសហគមមូលដ្ឋាននៃអង្គការអាដហុក (Adhoc) ថ្លែងថាតុលាការគួរតែពិនិត្យលើបណ្ដឹងបរិហារផ្លូវការច្រើនរបស់ពលរដ្ឋ ដែលបានប្ដឹងអាជ្ញាធរខេត្តនេះ ជុំវិញការបណ្ដែតបណ្ដោយឱ្យបាត់បង់ព្រៃឈើអស់រាប់ម៉ឺនហិកតា។
លោក ថ្លែងថា៖ «វាអយុត្តិធម៌ណាស់ ឥឡូវបើយើងនិយាយថាបើសិនជាគាត់ (នីន) ជាអ្នកកាប់រានឆ្ការដៃព្រៃមែន មិនមែនតែគាត់ទេ ហើយអ្វីដែលយើងទាមទារសុំឱ្យមានវិធានការតាមផ្លូវច្បាប់ទៅលើអ្នករានដីព្រៃដោយខុសច្បាប់មិនតិចជាងសែនហិកតាទេ ដែលកាប់រានដោយមិនមានការអនុញ្ញាតពីច្បាប់ មានន័យថាអត់មានអនុប្រយោគទេបម្លែងទ្រព្យសម្បត្តិរដ្ឋទៅឯកជនទេ ហើយបើនិយាយទៅគឺជាបទល្មើសឧក្រិដ្ឋហើយ។ អ៊ីចឹងបើសិនគេដាក់ទណ្ឌកម្មលើគាត់ (នីន) តុលាការក៏ត្រូវដាក់ទោសអ្នកកាប់រានព្រៃរាប់ម៉ឺនហិកតានោះដែរ»។
លោក កែវ ពិសុទ្ធ មន្រ្តីនាំពាក្យសាលាដំបូងខេត្តរតនគិរី ប្រាប់នៅថ្ងៃម្សិលមិញដែរថា លោកមិនទាន់ដឹងច្បាស់អំពីករណីនេះទេ ហើយក៏មិនអាចបកស្រាយបានដែរ៕