.jpg)
លោក សម រង្ស៊ី នាពេលកន្លងមក។ ហេង ជីវ័ន
ភ្នំពេញៈ ចៅក្រមស៊ើបសួរសាលាដំបូងរាជធានីភ្នំពេញ កាលពីចុងខែមុន បានបិទការស៊ើបសួរសំណុំរឿងចំនួន ២ ករណី លើលោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិ គឺករណីញុះញង់កុំឲ្យកងទ័ពស្ដាប់បង្គាប់ និងការប្រមាថចំពោះអង្គព្រះមហាក្សត្រ ខណៈតុលាការមិនទាន់កំណត់ថ្ងៃជម្រះ។
តាមលិខិតជូនព័ត៌មានចុះថ្ងៃទី ២៨-២៩ ខែមករា ស្តីពីការបញ្ចប់ការស៊ើបសួរ ដែលត្រូវបានយកទៅបិទនៅស្នាក់ការអតីតគណបក្សសង្គ្រោះជាតិនៅចាក់អង្រែលើ ខណ្ឌមានជ័យ ពីម្សិលមិញ លោក ហម ម៉េងសែ ចៅក្រមស៊ើបសួរបានបញ្ចប់នីតិវិធីស៊ើបសួរលើសំណុំរឿង ២ គឺញុះញង់កុំឲ្យយោធិនស្ដាប់បង្គាប់និងធ្វើឲ្យខូចទឹកចិត្តកងទ័ពប្រព្រឹត្តកាលពីថ្ងៃទី ៥ ខែធ្នូ ឆ្នាំ ២០១៧ និងបទប្រមាថអង្គព្រះមហាក្សត្រ ប្រព្រឹត្តកាលពីថ្ងៃទី ៦,៧ និង ១០ មិថុនា ២០១៨។
ករណីញុះញង់កុំឲ្យយោធិនស្ដាប់បង្គាប់ ត្រូវបានប្ដឹងដោយកងយោធពលខេមរភូមិន្ទ ក្រោយពេលលោក សម រង្ស៊ី កាលពីថ្ងៃទី ៥ ធ្នូ ឆ្នាំ ២០១៧ បានអំពាវនាវតាមហ្វេសប៊ុករបស់លោកឲ្យកងកម្លាំងប្រដាប់អាវុធឈប់ស្ដាប់បង្គាប់មេដឹកនាំរបស់ពួកគេ ដោយលោកថ្លែងថា៖ «សូមកងកម្លាំងប្រដាប់អាវុធ ពលទាហាន និងនគរបាលកុំធ្វើតាមបញ្ជាពីមេដឹកនាំផ្តាច់ការបើគេបញ្ជាឲ្យបាញ់ប្រហារនិងសម្លាប់ប្រជាពលរដ្ឋស្លូតត្រង់»។
បទល្មើស «ញុះញង់កុំឲ្យយោធិនស្ដាប់បង្គាប់» មានចែងក្នុងមាត្រា ៤៧១ ដែលកំណត់ផ្ដន្ទាទោសដាក់ពន្ធនាគារពី ២ ទៅ ៥ ឆ្នាំ ឯបទ «ធ្វើឲ្យខូចទឹកចិត្តកងទ័ព» មានចែងក្នុងមាត្រា ៤៧២ នៃក្រមព្រហ្មទណ្ឌដែលកំណត់ដាក់ពន្ធនាគារពី ២ ទៅ ៥ ឆ្នាំដូចគ្នា រួមនឹងការពិន័យប្រាក់បន្ថែម។
ចំពោះបទប្រមាថអង្គព្រះមហាក្សត្រ ក្រសួងយុត្តិធម៌បានចេញអធិបញ្ជាឲ្យអយ្យការអមសាលាដំបូងរាជធានីភ្នំពេញចាត់វិធានការផ្លូវច្បាប់ ពាក់ព័ន្ធនឹងការអះអាងរបស់លោក សម រង្ស៊ី ដែលកំពុងនិរទេសខ្លួន ដែលថា លិខិតព្រះមហាក្សត្រគឺជាលិខិតក្លែងក្លាយឬត្រូវធ្វើឡើង «ក្រោមការគំរាមកំហែង»។
លោកថ្លែងដូច្នេះកាលពីថ្ងៃទី ៦,៧ និង ១០ មិថុនា ឆ្នាំមុន ក្រោយពេលព្រះមហាក្សត្រ បានចេញសារលិខិតឲ្យពលរដ្ឋទៅចូលរួមបោះឆ្នោត។ សារលិខិតព្រះមហាក្សត្រត្រូវបានផ្សព្វផ្សាយនៅថ្ងៃទី ៥ ខែមិថុនា គឺក្រោយពេលដែលលោក សម រង្ស៊ី បានសរសេរលិខិតមួយថ្វាយព្រះមហាក្សត្រកាលពីថ្ងៃទី ២៣ ខែឧសភា ដោយស្នើព្រះអង្គកុំអំពាវនាវឲ្យពលរដ្ឋទៅបោះឆ្នោត។ ប៉ុន្តែ សារលិខិតរបស់ព្រះមហាក្សត្រត្រូវបានចុះកាលបរិច្ឆេទ ១៨ ឧសភា គឺ៥ថ្ងៃមុនលិខិតលោក សម រង្ស៊ី។
ដោយយោងលើកាលបរិច្ឆេទនេះ លោក សម រង្ស៊ី ថាលិខិតព្រះមហាក្សត្រជាលិខិតក្លែងក្លាយ។ បទល្មើសប្រមាថអង្គព្រះមហាក្សត្រតាមមាត្រា ៤៣៧ (ស្ទួន) កំណត់ផ្ដន្ទាទោសពី ១ ទៅ ៥ ឆ្នាំ និងពិន័យពី ១០ លានទៅ ៥០ លានរៀល។
លោក សំ សុគង់ មេធាវីការពារលោក សម រង្ស៊ី ថ្លែងកាលពីម្សិលមិញថា លោកមិនទាន់ទទួលបានឯកសារស្ដីពីការបិទការស៊ើបសួរពីតុលាការទេ។
លោក វង្ស ភក្តី មេធាវីតំណាងកងយោធពលខេមរភូមិន្ទ ក៏បានថ្លែងដូចគ្នាថាលោកមិនទាន់បានទទួលឯកសារទេ ប៉ុន្តែលោកបានពន្យល់ពីនីតិវិធីបន្តថា៖ «គេនឹងបង្វិលទៅវិញ ដើម្បីធ្វើការសន្និដ្ឋានស្ថាពរ ពីតំណាងអយ្យការ ពេលគេរកឃើញពីបទល្មើសហើយ គេនឹងបញ្ជូនមកវិញដោយគេដាក់កម្មវិធីចាត់តាំងចៅក្រមជំនុំជម្រះ»។
លោក សម រង្ស៊ី កាលពីពេលថ្មីៗនេះក៏បានអំពាវនាវកុំឲ្យយោធាសម្លាប់ប្រជាពលរដ្ឋស្លូតត្រង់ និងកុំស្ដាប់បង្គាប់លោកនាយករដ្ឋមន្ត្រី ហ៊ុន សែន ដោយលោកអះអាងថាជានាយករដ្ឋមន្ត្រីខុសច្បាប់។ ពាក់ព័ន្ធនឹងការអំពាវនាវនេះ លោកមេធាវី ថ្លែងថា លោកមិនអាចអត្ថាធិប្បាយបានទេដោយសារសំណុំរឿងកំពុងដំណើរការនៅតុលាការ ប៉ុន្តែលោកថា ជានីតិវិធីព្រះរាជអាជ្ញាអាចបន្ថែមការអះអាងខាងលើចូលក្នុងសំណុំរឿងព្រោះគាត់ជាម្ចាស់បណ្ដឹងអាជ្ញា។
លោកថ្លែងថា៖ «នីតិវិធីតុលាការ គាត់នឹងស្វែងរកឲ្យឃើញទៀតទៅ អាហ្នឹងខាងតុលាការ។ គាត់ (សម រង្ស៊ី) ថ្លែងជាសាធារណៈ អ៊ីចឹងតំណាងអយ្យការគាត់អាចមើលឃើញហើយ។ អ៊ីចឹងការនៅជំរុញនឹងដាក់ទម្ងន់លើការងាររបស់គាត់បន្តទៀត»។
លោក អ៊ី រិន្ទ អ្នកនាំពាក្យសាលាដំបូងរាជធានី ថ្លែងថា នីតិវិធីបន្ទាប់គឺត្រូវធ្វើតាមមាត្រា ២៤៦ នៃក្រមនីតិវិធីព្រហ្មទណ្ឌ ដែលចែងពីនីតិវិធីបន្ទាប់គឺបិទការស៊ើបសួរ។ មាត្រានេះចែងថា ក្នុងរយៈពេល ១ ខែព្រះរាជអាជ្ញាបង្វិលសំណុំរឿងទៅចៅក្រមស៊ើបសួរវិញដោយមានដីកាសន្និដ្ឋានស្ថាពរភ្ជាប់ជាមួយ។
កថាខណ្ឌចុងក្រោយនៃមាត្រានេះចែងថា «ប្រសិនបើព្រះរាជអាជ្ញាយល់ឃើញដូចចៅក្រមស៊ើបសួរ ដែលថា ការស៊ើបអង្កេតត្រូវបញ្ចប់នោះ ព្រះរាជអាជ្ញាធ្វើដីកាសន្និដ្ឋានស្ថាពរជាលាយលក្ខណ៍អក្សរ និងមានសំអាងហេតុ។ ព្រះរាជអាជ្ញាអាចប្ដឹងសុំឲ្យចៅក្រមស៊ើបសួរសម្រេចបញ្ជូនខ្លួនជនត្រូវចោទ ទៅកាន់តុលាការជំនុំជម្រះឬក៏លើកលែងបទចោទ»៕
