.jpg)
ពលរដ្ឋចាញ់បោកការទិញដីនៅខេត្តកោះកុងតវ៉ានៅមុខតុលាការពីថៃ្ងទី ៤ ធ្នូ។រូប សហការី
កោះកុងៈ ជនសង្ស័យ ៣ នាក់ ពាក់ព័ន្ធនឹងការលក់ដីឡូត៍បោកប្រាស់យកលុយប្រជាពលរដ្ឋនៅខេត្តកោះកុង ត្រូវបានតុលាការកំណត់អត្តសញ្ញាណ និងចេញដីកាបង្គាប់ឱ្យសមត្ថកិច្ចចាប់ខ្លួន ដែលករណីនេះអាជ្ញាធរខេត្តបាននិងកំពុងស្រាវជ្រាវរកទីតាំងដី និង ស្វែងរកជនប្រព្រឹត្តទាំងនោះ។
លោក សុខ សុទ្ធី អភិបាលរង និងជាអ្នកនាំពាក្យ រដ្ឋបាលខេត្តកោះកុងប្រាប់ ភ្នំពេញ ប៉ុស្តិ៍ កាលពីថ្ងៃទី ៧ ធ្នូ ថា រដ្ឋបាលខេត្តកោះកុងបានទទួលពាក្យដែលពលរដ្ឋដាក់ស្នើសុំឱ្យជួយអន្តរាគមន៍ រឿងឆបោកដីឡូត៍។ ប៉ុន្តែតាមការពិនិត្យមើលលើអង្គហេតុនេះ គឺជាទំនាស់កិច្ចសន្យា ហេតុនេះរដ្ឋបាលខេត្តបានជំរុញឱ្យប្រជាពលរដ្ឋប្តឹងទៅតុលាការ។
បើតាមលោក សុទ្ធី ក្រុមហ៊ុន និងប្រជាពលរដ្ឋគឺសុទ្ធតែមានការលាក់លៀមដូចគ្នា។ ក្រុមហ៊ុនបានមកធ្វើការលើកស្លាកដើម្បីលក់ដីឡូត៍។ ប៉ុន្តែក្រោយពេលអាជ្ញាធរមូលដ្ឋានចុះទៅត្រួតពិនិត្យឃើញថា មិនបានសុំច្បាប់ត្រឹមត្រូវអ្វីទាំងអស់ អាជ្ញាធរខេត្តក៏បញ្ជាឱ្យបញ្ឈប់វិញ។ ការដែលពលរដ្ឋមកចុះកិច្ចសន្យាជាមួយក្រុមហ៊ុនតាមរយៈការផ្សាយពាណិជ្ជកម្មរបស់ជនឆបោកយ៉ាងណានោះ អាជ្ញាធរខេត្តមិនបានដឹងទេ ព្រោះពួកគេបានចុះកិច្ចសន្យាស្ងាត់ៗគ្មានឯកសារគ្មានអ្វីទាំងអស់។
មកដល់រសៀលថ្ងៃទី ៧ ខែធ្នូ អាជ្ញាធរខេត្តកោះកុងមិនបានដឹងថា ក្រុមហ៊ុនដែលឆបោកពលរដ្ឋនោះឈ្មោះអ្វី ហើយថៅកែជានរណានោះទេ សូម្បីអាសយដ្ឋានក៏គ្មានដែរ។ ប៉ុន្តែអាជ្ញាធរមូលដ្ឋាន បាននិងកំពុងស្រាវជ្រាវបន្តដើម្បីស្វែងរកម្ចាស់ដីពិតប្រាកដ។
លោក សុទ្ធី ថ្លែងថា៖ «យើងបានឱ្យអាជ្ញាធរសង្កាត់ និងក្រុងកំពុងស្រាវជ្រាវបន្តថាតើដីដែលកន្លងមក គាត់បានបោះទង់របស់គាត់ធ្វើការលក់ហ្នឹងជាដីរបស់ពីណា»។
លោកបន្ថែមថា៖ «ហើយដើម្បីស្រាវជ្រាវបន្តថា តើគាត់មានទំនាក់ទំនងរបៀបម៉េចជាមួយម្ចាស់ដី ហើយនិងក្រុមហ៊ុនហ្នឹង ដើម្បីជាពន្លឺមួយ ជួយខាងប្រជាពលរដ្ឋសម្រាប់ធ្វើជាសក្ខីកម្មបញ្ជូនទៅតុលាការផង»។
ពលរដ្ឋរងគ្រោះ លោក ពិច បាក់ បានប្រាប់ថា ពលរដ្ឋប្រមាណជា ៣០ គ្រួសារ បាននាំគ្នាផ្តិតមេដៃស្នើសុំឱ្យអាជ្ញាធរខេត្តជួយដោះស្រាយបញ្ហា ព្រមទាំងបានដាក់ពាក្យបណ្តឹងទៅកាន់សាលាដំបូងខេត្តកោះកុងផងដែរ។
ប៉ុន្តែមកដល់ថ្ងៃទី ៧ ខែធ្នូនេះ នៅមិនទាន់បានទទួលលទ្ធផលយ៉ាងណានោះទេក្នុងរឿងនេះ។ ពលរដ្ឋរូបនេះមានចំណាប់អារម្មណ៍ចង់ទិញដី ដើម្បីធ្វើផ្ទះដោយក្នុងនោះមានប្រូម៉ូសិនទិញ ២ ឡូត៍ បង់មុនតែជាង ៦ ពាន់ដុល្លារ និងអាចបង់រំលស់តែ ៣០០ ដុល្លារ ក្នុង ១ ខែ ក្នុងរយៈពេល ២០ ខែ បានដីមានប្លង់ចេញពីក្រសួងដែនដី។
លោក ពិច បាក់ និយាយថា៖ «ខ្ញុំបង់ ១ ខែ ៣០០ ជាង ខ្ញុំបង់បាន ៨ ខែ។ បើគិតទៅអស់ជាង ៨ ពាន់ដុល្លារ គិតទាំងប្រាក់បង់មុនចំនួន ៦ ពាន់ជាង»។
បើតាមបុរសរូបនេះមានពលរដ្ឋ ទិញដីទាំងអស់ប្រមាណជា ២០០ ឡូតិ៍ បើគិតជាគ្រួសារប្រហែលជា ៧០ គ្រួសារ។ ព្រោះក្នុង ១ គ្រួសារ ខ្លះទិញយក ២ ឡូត៍ ខ្លះយក ៤ ឡូត៍ និង ៦ ឡូត៍ខ្លះ។ លោកបាក់ថ្លែងថា៖ «ចំនួន ៧០ គ្រួសារហ្នឹង ប្រហែលភាគច្រើនមិនទាន់បានដឹងពីរឿងក្រុមហ៊ុនឆបោករត់បាត់នោះទេ។ ព្រោះអ្នកខ្លះនៅប៉ោយប៉ែត ខ្លះកំពង់សោម ខ្លះទៅធ្វើការនៅថៃ ខ្លះនៅតាកែវក៏មានដែរ។ ពួកគាត់ចង់មានដីរស់នៅរកស៊ីនៅកោះកុង ចេះតែបង់រំលស់ៗឱ្យគេអ៊ីចឹងទៅ»។
លោក ហេង ភារក្ស ជនរងគ្រោះ ១ រូបទៀតដែលត្រូវបានគេបោកឱ្យទិញដីឡូត៍ បានឱ្យដឹងថា ក្រុមហ៊ុន Business Independent Distributor Co,Ltd ហៅកាត់ថា B.I.D. ជាក្រុមហ៊ុនបោកប្រាស់។ ព្រោះក្រុមហ៊ុននេះអះអាងថា បានពុះដីឡូត៍លក់នៅចំណុចភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង លើទំហំដីជិត ៥ ម៉ឺនម៉ែត្រការ៉េ។ ប៉ុន្តែក្រោយដំណើរការលក់បានប៉ុន្មានខែប៉ុណ្ណោះពោលគឺ ចាប់ពីខែកុម្ភៈ ឆ្នាំ ២០២០ ប្រមូលលុយបានច្រើនទើបពលរដ្ឋដឹងថា ក្រុមហ៊ុន B.I.D. គ្មានដីឡូត៍ពិតប្រាកដ ប្រគល់ជូនអតិថិជន ហើយអគ្គនាយកក្រុមហ៊ុនក៏បានរត់គេចខ្លួនបាត់។
លោក ភារក្ស និយាយថា៖ «ខ្ញុំបាននាំបងប្អូនទិញដីឡូត៍ចំនួន ៤ ប្លង់ឱ្យលុយដាច់ចំនួន ២ ប្លង់ ហើយ ២ ប្លង់ទៀតបង់ប្រចាំខែក្នុង ១ ខែ ៥០០ ដុល្លារ ខ្ញុំបង់បាន ៣ ខែ ក្រុមហ៊ុនដាក់មេប្រូចបាត់»។
បើតាមលោក ភារក្ស បុគ្គលិក ២ នាក់ នៃក្រុមហ៊ុននោះត្រូវបានចាប់ខ្លួន និងបានបញ្ជូនពួកគេទៅតុលាការខេត្តកោះកុង។ ប៉ុន្តែពួកគេត្រូវបានតុលាការដោះលែងវិញដោយសម្អាងថា គ្រាន់តែជាបុគ្គលិកមិនមានការពាក់ព័ន្ធ។
លោក អ៊ុន សុវណ្ណធានី ព្រះរាជអាជ្ញារងសាលាដំបូងខេត្តកោះកុងឱ្យដឹងថា ក្រោយពីបានទទួល និងពិនិត្យសំណុំរឿង ក៏ដូចជាការសាកសួរជនពាក់ព័ន្ធទាំងបុគ្គលិក ក្រុមហ៊ុន និងដើមបណ្តឹង តុលាការ ឃើញថា ពុំមានភ័ស្តុតាងដាក់បន្ទុកថា បុគ្គលិកក្រុមហ៊ុនមានចេតនា និងបានចូលរួមក្នុងការប្រព្រឹត្តបទល្មើសនោះឡើយ។
លោកថ្លែងថា៖ «រាល់ឯកសារទិញលក់ និងលិខិតស្នាមផ្សេងៗធ្វើឡើងរវាងអតិថិជន និងម្ចាស់ក្រុមហ៊ុន។ ចំពោះបុគ្គលិកក្រុមហ៊ុនដែលបានបញ្ជូនមកនោះ គឺគាត់ធ្វើការងារទៅតាមតួនាទី និងភារកិច្ចរបស់គាត់ ដោយទទួលបានត្រឹមតែប្រាក់ខែតែប៉ុណ្ណោះ ហើយក៏មិនមានភ័ស្តុតាងណាមួយបញ្ជាក់ថា គាត់ពាក់ព័ន្ធនឹងករណីនេះទេ»។
ផ្អែកតាមគោលការណ៍នៃការទទួលខុសត្រូវព្រហ្មទណ្ឌ បុគ្គលម្នាក់ៗ ទទួលខុសត្រូវព្រហ្មទណ្ឌតែចំពោះអំពើដែលខ្លួនបានធ្វើប៉ុណ្ណោះ។ ហេតុនេះមិនមែនមានន័យថា ម្ចាស់ក្រុមហ៊ុនប្រព្រឹត្តបទល្មើសហើយរត់គេចខ្លួន បែរជាត្រូវចាប់ និងឃុំខ្លួនបុគ្គលិកជំនួសវិញទេ បើទោះបីបុគ្គលិកនោះជាញាតិ ឬមិនមែនជាញាតិក្តី។ អ្វីដែលសំខាន់គឺត្រូវពិនិត្យថាគាត់មានចេតនាទុច្ចរិត និងបានចូលរួមប្រព្រឹត្តបទល្មើសដែរឬអត់។ នេះបើតាមការបញ្ជាក់របស់លោក សុវណ្ណធានី។
លោកបន្តថា៖ «ចំណុចសំខាន់ថា ក្នុងសំណុំរឿងនេះតុលាការបានកំណត់អត្តសញ្ញាណជនល្មើស និងចេញដីកាបញ្ជាឱ្យចាប់ខ្លួនជនសង្ស័យចំនួន ៣ នាក់ ដែលជាអ្នកទទួលខុសត្រូវក្នុងករណីនេះរួចរាល់ហើយ ដែលជនទាំងនោះមានឈ្មោះបាន បញ្ញា ឈ្មោះ ភន ទីគា និងឈ្មោះ លី ប៊ុនរដ្ឋថី។ បច្ចុប្បន្នអាជ្ញាធរកំពុងតែធ្វើការយ៉ាងសកម្ម ដើម្បីស្វែងរក និងចាប់ខ្លួនបញ្ជូនជនទាំងនោះមកផ្តន្ទាទោសតាមច្បាប់»៕
