ភ្នំពេញៈ ក្រុមជនជាប់ចោទ ១២ នាក់ ក្នុងនោះមានស្ត្រីម្នាក់ផងត្រូវបាននាំមកសាលាដំបូងរាជធានីភ្នំពេញកាលពីថ្ងៃទី ៣ មីនា ដើម្បីបន្តការជំនុំជម្រះលើសំណុំរឿងប៉ុនប៉ងលួចប្រមូលកម្លាំងប្រដាប់អាវុធ និងទិញកាំភ្លើងផ្តួលរំលំរាជរដ្ឋាភិបាលកម្ពុជាដែលប្រព្រឹត្តនៅរាជធានីភ្នំពេញ ខេត្តកំពត និង ខេត្តពោធិ៍សាត់កាលពីឆ្នាំ ២០១៨។
ក្នុងបន្ទប់សវនាការជំនុំជម្រះកាលពីថ្ងៃទី ៣ ខែមីនាគេឃើញមានវត្តមានសមាសភាពចៅក្រម ៣ រូបដែលមានលោកស្រីចៅក្រម ស៊ លីនណា ជាប្រធានក្រុមប្រឹក្សាជំនុំជម្រះ និងមានតំណាងអយ្យការម្នាក់។ រីឯមេធាវីការពារសិទ្ធិឲ្យជនជាប់ចោទគេឃើញមានវត្តមានចំនួន ១០ រូបចូលខ្លួនការពារសិទ្ធិឲ្យជនជាប់ចោទទាំង ១២ នាក់។ សវនាការថ្ងៃទី ៣ មីនា ដែលបានបន្តកាលពីខែមុននោះលោក ប៉េង រ៉ា ជនជាប់ចោទម្នាក់ក្នុងចំណោម ១២ នាក់ ប្រាប់ចៅក្រមថា គាត់មានគ្រឿងចក្រភ្ជួរដី ១ គ្រឿង សម្រាប់ជួល ឬក៏ស៊ីឈ្នួលភ្ជួរដីឲ្យគេ។ លោករស់នៅក្នុងភូមិតេជោដំរី ឃុំតេជោអភិវឌ្ឍន៍ ស្រុកឈូក ខេត្តកំពត។
លោកប្រាប់ទៀតថា ប៉េង សុខា [ជនជាប់ចោទម្នាក់ទៀត] មានដីចម្ការដាំដើមស្វាយចំនួន ២ ហិកតានៅក្នុងស្រុកឈូក ដែលមានព្រំប្រទល់ជាប់នឹងដីរបស់គាត់ ហើយគាត់តែងយកទូរស័ព្ទទៅសាកថ្មនៅក្នុងចម្ការរបស់ឈ្មោះ ប៉េង សុខា។ មុនសមត្ថកិច្ចចាប់ខ្លួនគឺគាត់បានដឹងថា សមត្ថកិច្ចបានរកឃើញកាំភ្លើងវែង ១ ដើមនៅដីចម្ការរបស់ឈ្មោះ ប៉េង សុខា ដែលលាក់ទុកក្នុងដីចម្ការនោះ។
លោកស្រីចៅក្រម ស៊ លីនណា បានសួរទៅលោក ប៉េង រ៉ា អាយុ ៤៥ ឆ្នាំថា ក្នុងចំណោមជនជាប់ចោទទាំង ១២ នាក់ តើលោកស្គាល់ឈ្មោះ ប៉េង សុខា ដែរទេ?
លោក ប៉េង រ៉ា បានប្រាប់ចៅក្រមថាក្រោយពីសមត្ថកិច្ចរកឃើញកាំភ្លើងហើយ ក៏ចាប់កម្មកររបស់ឈ្មោះ ប៉េង សុខា ម្នាក់។ ដោយសារភ័យខ្លាចសមត្ថកិច្ចចាប់គាត់ទៀត គាត់ក៏រត់ទៅខេត្តកំពង់ចាមហើយត្រឡប់មករាជធានីភ្នំពេញវិញស្នាក់នៅផ្ទះ ប៉េង សុខា បាន ២ ថ្ងៃក៏ត្រូវបានសមត្ថកិច្ចចាប់ខ្លួននៅថ្ងៃទី ១៩ ខែតុលា ឆ្នាំ ២០១៨។ លោកប្រាប់ថាស្គាល់ឈ្មោះ ប៉េង សុខា ព្រោះឈ្មោះនេះត្រូវជាបងថ្លៃរបស់ខ្លួនក្រៅពីនោះលោកមិនបានស្គាល់ជនជាប់ចោទផ្សេងទៀតទេ។
លោក ប៉េង រ៉ា បន្តថា៖ «តែខ្ញុំមិនជាប់ពាក់ព័ន្ធនឹងក្រុមប៉ងផ្តួលរំលំរាជរដ្ឋាភិបាលកម្ពុជាទេ ហើយខ្ញុំទៅខេត្តកំពង់ចាមព្រោះខ្ញុំទៅមើលម្តាយឈឺ និងយកកូនមកព្យាបាលនៅភ្នំពេញផង ហើយខ្ញុំក៏មិនដែលទៅប្រទេសថៃដែរ»។
ទោះយ៉ាងណាលោកចៅក្រម ១ រូបបានប្រាប់លោក ប៉េង រ៉ា វិញក្នុងពេលសវនាការថា តុលាការសួរលោកបែបនេះដើម្បីចង់ផ្ទៀងផ្ទាត់បញ្ជាក់ពីចម្លើយរបស់លោកដែលបានឆ្លើយប្រាប់នគរបាលយុត្តិធម៌ និងនៅដំណាក់កាលតុលាការដែលលោកត្រូវបានចាប់ខ្លួនដំបូង។ ព្រោះចម្លើយរបស់លោកកាលពីនៅដំណាក់កាលនគរបាល និងនៅតុលាការលោកឆ្លើយថាការដែលលោកទៅខេត្តកំពង់ចាម ដោយសារតែលោកមានការភ័យព្រួយ បន្ទាប់ពីដឹងថា សមត្ថកិច្ចចាប់កម្មកររបស់ឈ្មោះ ប៉េង សុខា។
លោកចៅក្រមថ្លែងថា៖ «លោកឆ្លើយយ៉ាងម៉េចក៏បានដែរ ប៉ុន្តែតុលាការក៏មានសិទ្ធិជឿ ឬមិនជឿលើចម្លើយរបស់លោកដែរ»។
ដោយឡែកឈ្មោះ សៀង វ៉ាន់ឌឿន ជាជនជាប់ចោទម្នាក់ទៀតត្រូវបានចៅក្រមហៅឡើងឆ្លើយបន្តពីឈ្មោះ ប៉េង រ៉ា ដែលថាពាក់ព័ន្ធនឹងក្រុមជនប្រដាប់អាវុធនេះគឺលោកឆ្លើយថា មិនបានចូលរួមជាមួយទេ។
ដោយសារតែជនជាប់ចោទមានចំនួនច្រើនដែលតុលាការមិនអាចសួរដេញដោលគ្រប់គ្នានោះត្រូវបានលោកស្រីចៅក្រមប្រកាសថា តុលាការនឹងលើកពេលទៅជំនុំជម្រះសំណុំរឿងនេះនៅពេលក្រោយទៀត។
ជនជាប់ចោទ ១២ នាក់នេះ ត្រូវបាននគរបាលនៃនាយកដ្ឋានព្រហ្មទណ្ឌក្រសួងមហាផ្ទៃស្រាវជ្រាវចាប់ខ្លួនបានជាបន្តបន្ទាប់ក្នុងអំឡុងខែកញ្ញា ឆ្នាំ ២០១៨ នៅរាជធានីភ្នំពេញ ខេត្តកំពត ពោធិ៍សាត់ និងខេត្តកំពង់ចាម និងឆែកឆេរឃើញកាំភ្លើងអាកាចំនួន ២៥ ដើមរួមទាំងសម្ភារមួយចំនួនទៀត។
ចៅក្រមសាលាដំបូងរាជធានីភ្នំពេញបានចោទប្រកាន់ជនទាំង ១២ នាក់ ពីបទរៀបចំចាត់តាំងក្រុមជនប្រដាប់អាវុធ និងបទធ្វើសន្និធិអាវុធដោយគ្មានការអនុញ្ញាតតាមមាត្រា ៤៨៥ មាត្រា ៤៨៦ និងមាត្រា ៤៨៨ នៃក្រមព្រហ្មទណ្ឌ៕