ភ្នំពេញៈ លោក កឹម សុខា ប្រធានអតីតគណបក្សសង្គ្រោះជាតិបានបញ្ជាក់នៅក្នុងសវនាការពីថ្ងៃម្សិលមិញថា សកម្មភាព និងចេតនារបស់លោកគឺធ្វើនយោបាយ ដោយអហិង្សា និងមិនមានបំណងធ្វើបដិវត្តន៍ពណ៌បង្ហូរឈាមខ្មែរឡើយ ហើយអ្នកណាដែលដើរផ្ទុយពីនេះគឺលោកមិនសហការជាមួយនោះទេ។
ការបញ្ជាក់នេះធ្វើឡើង បន្ទាប់ពីមេធាវីរដ្ឋាភិបាលបង្ហាញភ័ស្ដុតាងជាវីដេអូដែលអះអាងថា លោក សម រង្ស៊ី មានបំណងប្រើកម្លាំងប្រដាប់អាវុធដើម្បីផ្ដួលរំលំរដ្ឋាភិបាលសព្វថ្ងៃ។
នៅក្នុងសវនាការឈានចូលថ្ងៃទី ១១ សប្ដាហ៍ទី ៦ លើសំណុំរឿងសន្ទិដ្ឋភាព ជាមួយបរទេសរបស់លោក កឹម សុខា គឺបានពិភាក្សាដេញដោលលើអង្គហេតុបង្កើតគណបក្សសង្គ្រោះជាតិ។ ក្រុមមេធាវីរបស់រដ្ឋាភិបាលបានចោទសួរលោក សុខា អំពីមូលហេតុដែលលោកទៅចូលរួមសហការជាលោក សម រង្ស៊ី ដើម្បីបង្កើតអតីតគណបក្សសង្គ្រោះជាតិ ខណៈក្រុមមេធាវីទាំងនេះ អះអាងថាលោក សម រង្ស៊ី ជាអ្នកមានគំនិតចង់ផ្ដួលរំលំរដ្ឋាភិបាល។
លោក សុខា បានឆ្លើយថា ការបង្កើត CNRP គឺភាគីទាំង ២ បានព្រមព្រៀងគ្នា ដើម្បីអនុវត្តតាមលក្ខន្តិកៈគណបក្សនេះដែលមានគោលដៅពិតប្រាកដ និងមានបញ្ជាក់ក្នុងសេចក្ដីថ្លែងការណ៍រួម គឺការធ្វើដំណើរឆ្ពោះទៅរកការបោះឆ្នោតដោយសេរី ត្រឹមត្រូវ និងយុត្តិធម៌ ហើយមិនធ្វើសង្គ្រាមបង្ហូរឈាមខ្មែរជាដាច់ខាត។
លោកថា៖ «ខ្ញុំធ្វើនយោបាយដោយអហិង្សា អត់យកខ្មែរណាជាសត្រូវ អត់ធ្វើបដិវត្តន៍ពណ៌ អត់បង្ហូរឈាមខ្មែរ ហើយបើអ្នកណាដែលដើរផ្ទុយពីនេះ ខ្ញុំអត់ធ្វើជាមួយទេ ហើយអ្នកណាប្រើហិង្សា គឺសុំចៀសឱ្យឆ្ងាយពីខ្ញុំ»។
ការអះអាងរបស់លោក សុខា គឺបន្ទាប់ពីមេធាវីរដ្ឋាភិបាលបានស្នើសុំចាក់បញ្ចាំងខ្សែវីដេអូមួយម្ដងទៀត ដែលបង្ហាញអំពីការថ្លែងរបស់លោក សម រង្ស៊ី ទៅកាន់អ្នកគាំទ្រដែលកាលនោះលោកនៅធ្វើជាប្រធានគណបក្សសង្គ្រោះជាតិ។ ក្នុងវីដេអូនោះលោក សម រង្ស៊ី បានប្រើពាក្យមួយចំនួនដូចជា កងកម្លាំងប្រដាប់អាវុធដែលភាគច្រើនកើតចេញពីគ្រួសារខ្មែរក្រីក្រនឹងងើបផ្ដួលរំលំរដ្ឋាភិបាលលោក ហ៊ុន សែន។ ពាក្យសម្ដីខ្លះទៀតបញ្ជាក់ថា លោកមិនចរចាជាមួយលោក ហ៊ុន សែន ឡើយ ហើយចង់ឱ្យលោក ហ៊ុន សែន ចុះចេញពីតំណែងកាន់តែឆាប់គឺកាន់តែល្អជាដើម។
ប៉ុន្តែលោក កឹម សុខា បានបញ្ជាក់ថាការព្រមព្រៀងគ្នាបង្កើតអតីតគណបក្សសង្គ្រោះជាតិគឺដោយសារមានការព្រមព្រៀងគ្នារវាងលោក និងលោក សម រង្ស៊ី ដើម្បីដើរតាមរដ្ឋធម្មនុញ្ញ និងអនុវត្តអ្វីដែលជាលក្ខន្ដិកៈរបស់គណបក្សសង្គ្រោះជាតិប៉ុណ្ណោះ។
លោកបន្តថា កន្លងមកក្រុម ប៉ុល ពត និងគណបក្សហ៊្វុនស៊ិនប៉ិច ដែលធ្លាប់ប្រើប្រាស់អាវុធប្រឆាំងគ្នាជាមួយរដ្ឋាភិបាលលោក ហ៊ុន សែន ប៉ុន្តែចុងក្រោយក៏ត្រូវបានរដ្ឋាភិបាលអាចធ្វើសមាហរណកម្មជាមួយក្រុមមន្ត្រី ប៉ុល ពត និងចងសម្ព័ន្ធភាពជាមួយគណបក្សហ៊្វុនស៊ិនប៉ិចដែរ។ នៅក្នុងសវនាការដដែលតំណាងអយ្យការ និងក្រុមមេធាវីរបស់រដ្ឋាភិបាលក៏បានសួរដេញដោលលោក សុខា អំពីដំណើរការជួបចរចាជាមួយលោក សម រង្ស៊ី នៅក្នុងទីក្រុងម៉ានីល ប្រទេសហ្វីលីពីនកាលពីខែកក្កដាឆ្នាំ ២០១២ ដើម្បីឈានទៅព្រមព្រៀងគ្នាបង្កើតអតីតគណបក្សសង្គ្រោះជាតិ។
ពួកគេបានសួរថា តើអ្នកណាជាអ្នកឧបត្ថម្ភថវិកាឱ្យមានការជួបចរចានេះរួមទាំងអ្នកដែលបានសម្រេចឱ្យបង្កើតគណបក្សដាក់ឈ្មោះ «គណបក្សសង្គ្រោះជាតិ» និងការប្រើប្រាស់រូបព្រះអាទិត្យ រួមទាំងអ្នកជួយបង្កើតគោលនយោបាយ និងយុទ្ធសាស្ដ្ររបស់គណបក្សនេះជាដើម។
លោក សុខា បញ្ជាក់ថា គណបក្សសង្គ្រោះជាតិត្រូវបានបង្កើតឡើងដោយឆន្ទៈពលរដ្ឋ និងឆន្ទៈរបស់លោកជាមួយលោក សម រង្ស៊ី និងមិនមែនបង្កើតឡើងដោយសារមានសម្ពាធពីបរទេសណាមួយឡើយ៕