.jpg)
ជនសង្ស័យប្រុស-ស្រី ២ នាក់ ដែលពាក់ព័ន្ធគ្រឿងញៀន ២០០ កញ្ចប់តូច។ រូបថត Phnom Penh Gendarmerie
ភ្នំពេញៈ អយ្យការអមសាលាដំបូងរាជធានីភ្នំពេញកំពុងបន្តសាកសួរស្រ្តីសង្ស័យជាតវៀតណាមម្នាក់ និងបុរសខ្មែរម្នាក់ ពាក់ព័ន្ធករណីជួញដូរគ្រឿងញៀនជាង ២០០ កញ្ចប់តូច ហើយត្រូវបានសមត្ថកិច្ចកងរាជអាវុធហត្ថខណ្ឌឫស្សីកែវ ឃាត់ខ្លួនកាលពីថ្ងៃទី ១២ កក្កដា នៅភូមិផ្សារតូច សង្កាត់ទួលសង្កែ ១ ខណ្ឌឬស្សីកែវ រាជធានីភ្នំពេញ។
លោក គុជ គឹមឡុង អ្នកនាំពាក្យផ្នែកអយ្យការអមសាលាដំបូងរាជធានីភ្នំពេញឲ្យដឹងនៅថ្ងៃ ១៤ កក្កដា នេះថា ករណីស្រ្តីសង្ស័យជាតិវៀតណាមឈ្មោះ ទន់ ចេង និងបុរសខ្មែរឈ្មោះ ស្រី វិចិត្រ គឺអយ្យការកំពុងបន្តសាកសួរពួកគេមិនទាន់ចប់ទេ។
លោកថ្លែងថា៖ «ករណីនេះខាងអយ្យការកំពុងបន្តនីតិវិធីសាកសួរពួកគេនៅឡើយ ហើយប្រសិនបើមានព័ត៌មានអ្វីថ្មីខ្ញុំនឹងជម្រាបជូននៅពេលក្រោយ»។
ពាក់ព័ន្ធការចាប់ជនសង្ស័យខាងលើ ភ្នំពេញប៉ុស្តិ៍មិនអាចសុំការបញ្ជាក់ពី លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានទេដោយសារទូរស័ព្ទលោកមិនមានអ្នកទទួលនៅថ្ងៃទី ១៤ កក្កដា នេះ។
ទោះយ៉ាងណា មន្រ្តីអាវុធហត្ថផ្នែកសេនាធិការនៃបញ្ជាការដ្ឋានកងរាជអាវុធហត្ថរាជធានីភ្នំពេញម្នាក់សុំមិនបញ្ចេញឈ្មោះឲ្យដឹងនៅថ្ងៃទី ១៤ កក្កដា នេះថា ករណីនេះដំបូងសមត្ថកិច្ចរបស់លោកបានឃាត់ខ្លួនមនុស្ស ៣ នាក់ ក្នុងនោះមានក្មេងប្រុសម្នាក់ផង។ ប៉ុន្តែសមត្ថកិច្ចបញ្ជូនតែស្រ្តីឈ្មោះ ទន់ ចេង អាយុ ២៤ ឆ្នាំ និងបុរសឈ្មោះ ស្រី វិចិត្រ អាយុ ២៨ ឆ្នាំ ទៅសាលាដំបូងរាជធានីភ្នំពេញ តាំងពីថ្ងៃទី ១៣ កក្កដា មកម៉្លេះ។
លោកថា មុនពេលបង្ក្រាបករណីនេះ គឺកម្លាំងកងរាជអាវុធហត្ថខណ្ឌឫស្សីកែវបានស្រាវជ្រាវដឹងថា ពួកគេលួចធ្វើចរាចរណ៍លក់គ្រឿងញៀន។ លុះដល់ម៉ោងជាង៧ព្រឹកនៅថ្ងៃទី ១២ កក្កដា សមត្ថកិច្ចជំនាញបានប្រើវិធានញុះញង់ដោយបញ្ជាទិញថ្នាំញៀនពីបក្ខពួកជនសង្ស័យ។ បន្ទាប់ពីចរចាត្រូវគ្នាសមត្ថកិច្ចបានណាត់ដោះដូរទំនិញក៏ឃើញបុរសម្នាក់ ឈ្មោះ ស្រី វិចិត្រ យកថ្នាំញៀនមកលក់តាមការណាត់ ក៏ចាប់ខ្លួនជននោះតែម្ដង។
មន្រ្តីបន្តថា ជនសង្ស័យឈ្មោះ ស្រី វិចិត្រ បានសារភាពថា រូបគេបានទិញថ្នាំញៀនពីស្រ្តីវៀតណាមម្នាក់នៅម្តុំផ្សារតូច។ ក្រោយពីសាកសួររួចសមត្ថកិច្ចបានឲ្យជននោះទៅបង្ហាញទីតាំងចាយគ្រឿងញៀនទើបឈានដល់ចាប់ស្រ្តីវៀតណាមជាក់ស្តែងជាមួយគ្រឿងញៀនម្សៅក្រាមពណ៌សថ្លាប្រភេទមេតំហ្វេតាមីនចំនួន ២០២ កញ្ចប់តូច រួមទាំងជញ្ជីងថ្លឹងគ្រឿងញៀន ១ ផង។
ដោយឡែកក្មេងប្រុសម្នាក់ដែលសមត្ថកិច្ចឃើញក្នុងផ្ទះកើតហេតុពេលបង្ក្រាបនោះ បានដោះលែងវិញហើយ ព្រោះជាអនីតិជន។
ក្នុងរយៈពេល ៦ ខែដើមឆ្នាំនេះ សមត្ថកិច្ចបានបង្ក្រាបបទល្មើសគ្រឿងញៀនជាង ៤ ពាន់ករណី កើនឡើង ២៧ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។ ក្នុងនោះឃាត់ខ្លួនជនល្មើសបានជាង ៨ ពាន់នាក់ កើនឡើងជាង ២៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមរបាយការណ៍ក្រសួងមហាផ្ទៃ។
របាយការណ៍ដដែលបង្ហាញថា ចំពោះអ្នកប្រព្រឹត្តបទល្មើសគ្រឿងញៀនមានជនជាតិផ្សេងៗគ្នារួមមានខ្មែរមានចំនួន ៨ ៣៦៩ នាក់, ជនជាតិវៀតណាម ៩៦ នាក់, ឡាវ ២ នាក់, ថៃ ៣ នាក់, ចិន ១៣ នាក់, មីយ៉ាន់ម៉ា ម្នាក់, ឥណ្ឌូនេស៊ីម្នាក់, សិង្ហបុរីម្នាក់,ជប៉ុនម្នាក់ និងជនជាតិនីហ្សេរីយ៉ាម្នាក់៕
