.jpg)
លោក ប៉ែន ប៊ុណ្ណារ៍ មន្ត្រីសិទ្ធិមនុស្សអាដហុកឈរនៅមុខតុលាការខេត្តរតនគិរីនាពេលកន្លងមក។ ហ្វេសប៊ុក
រតនគិរីៈ ចៅក្រមស៊ើបសួរនៃសាលាដំបូងខេត្តរតនគិរីលោក សេង ស៊ីមសុរិយា សម្រេចបញ្ចប់សំណុំរឿងលោក ប៉ែន ប៊ុណ្ណារ៍ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្ស (ADHOC) និងប្រជាសហគមន៍ ឃុំសេដា ចំនួន ៩ នាក់ផ្សេងទៀតក្នុងសំណុំរឿងញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយមិនតម្រូវឲ្យជនជាប់ចោទមកបង្ហាញខ្លួននៅតុលាការទៀតទេ។
តាមលិខិតជូនដំណឹងរបស់លោកចៅក្រម សេង ស៊ីមសុរិយា ចុះថ្ងៃទី ៦ ខែមករា ឆ្នាំ ២០២០ ដែលភ្នំពេញប៉ុស្ដិ៍ទទួលបានពីថ្ងៃទី ១០ កុម្ភៈ គឺលោកជូនដំណឹងទៅឈ្មោះ ស៊ីថាន់ ញ៉ាន់ ភេទប្រុស អាយុ ៦៣ ឆ្នាំ ជនជាតិទំពួន ឈ្មោះ ប៉ែន ប៊ុណ្ណារ៍ ភេទប្រុស អាយុ ៥៦ ឆ្នាំ រស់នៅខណ្ឌជ្រោយចង្វារ រាជធានីភ្នំពេញ ឈ្មោះ ឆន ផល្លា ភេទប្រុស អាយុ ៤១ ឆ្នាំ ជនជាតិខ្មែរ ឈ្មោះ មុន ឌៀ ភេទប្រុស អាយុ ៤៣ ឆ្នាំ ជនជាតិទំពួន ឈ្មោះ កូន តាម៉ូ ភេទប្រុស អាយុ ៣២ ឆ្នាំ ឈ្មោះ ឡាត ប្រាញ់ ភេទប្រុស ៣៩ ឆ្នាំ ឈ្មោះ តឺវ ពុំ អាយុ ៣៦ ឆ្នាំ ជនជាតិទំពួន ឈ្មោះ នួន ណែន ភេទប្រុស អាយុ ៥៥ ឆ្នាំ ឈ្មោះ ស្មាន ថងពី ភេទប្រុស អាយុ ២៨ ឆ្នាំ និងឈ្មោះ ប៉ាង ញ៉យ ភេទប្រុស។ ពួកគេទាំង ៩ នាក់រស់នៅឃុំសេដា ស្រុកលំផាត់ ខេត្តរតនគិរី។
លិខិតលោក សេង ស៊ីមសុរិយា បានបញ្ជាក់ប្រាប់ទៅឈ្មោះ ប៉ែន ប៊ុណ្ណារ៍ ភេទប្រុស អាយុ ៥៦ ឆ្នាំរស់នៅខណ្ឌជ្រោយចង្វារ រាជធានីភ្នំពេញដែលជាជនត្រូវចោទឲ្យជ្រាបថាចៅក្រមស៊ើបសួរ យល់ឃើញថា ការស៊ើបសួរសំណុំរឿងខាងលើបានបញ្ចប់ហើយ។ អាស្រ័យហេតុនេះសូមឈ្មោះ ប៉ែន ប៊ុណ្ណារ៍ ជ្រាបជាព័ត៌មានតាមបញ្ញត្តិមាត្រា ២៤៦ នៃក្រមនីតិវិធីព្រហ្មទណ្ឌ។
លោក ប៉ែន ប៊ុណ្ណារ៍ និងប្រជាសហគមន៍ឃុំសេដាចំនួន ៩ នាក់ទៀតត្រូវបាន ចៅក្រម សេង ស៊ឹមសូរិយា ដាក់ឲ្យស្ថិតក្រោមការត្រួតពិនិត្យពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» កាលពីខែតុលា ឆ្នាំ ២០១៩ កន្លងទៅ។ ម្ចាស់បណ្ដឹងក្នុងរឿងក្តីនេះគឺក្រុមអាជ្ញាធរចាប់ពីថ្នាក់មូលដ្ឋានរហូតដល់មន្ត្រីជំនាញថ្នាក់ខេត្តដែលបានប្តឹងលោក ប៉ែន ប៊ុណ្ណារ៍ និងប្រជាពលរដ្ឋ ក្រោយពីលោក ប៊ុណ្ណារ៍ និង ពលរដ្ឋប្ដឹងបរិហារក្រុមអាជ្ញាធរ ករណីបណ្ដែតបណ្ដោយឲ្យមានបទល្មើសកាប់រានដីព្រៃជាង ៨០០ ហិកតាក្នុងដែនជម្រកសត្វព្រៃលំផាត់ ខេត្តរតនគិរី។
លោក កែវ ពិសុទ្ធ អ្នកនាំពាក្យតុលាការខេត្តរតនគិរីបានថ្លែងនាថ្ងៃទី ១០ កុម្ភៈថា ករណីនេះលោក សេង ស៊ីមសុរិយា ចៅក្រមស៊ើបសួរបានប្រកាសបិទបញ្ចប់ការសាកសួរដេញដោលទាំងស្រុងហើយចំពោះសំណុំរឿងលោក ប៉ែន ប៊ុណ្ណារ៍ និងពលរដ្ឋ ៩ នាក់នេះ។ ជនជាប់ចោទទាំង ១០ នាក់នេះមិនចាំបាច់មកបង្ហាញខ្លួនតុលាការក្នុងរយៈពេល ២ ខែម្ដងទៀតទេ។
លោកបញ្ជាក់ថា៖ «អ៊ីចឹងគាត់ក៏លែងសួរដេញដោល ឬតម្រូវឲ្យមកបង្ហាញខ្លួននៅតុលាការទៀតដែរ ព្រោះចៅក្រមគាត់បញ្ជាក់ប្រាប់ទៅជនជាប់ចោទរួចហើយ ហើយយើងមិនអាចសាកសួរទៅពលរដ្ឋណា ឬសាក្សីណាបន្ថែមទៀតទេពោលគឺយើងបិទបញ្ចប់ទាំងអស់តែម្ដង»។
លោក ប៉ែន ប៊ុណ្ណារ៍ ឲ្យដឹងថា លោកទើបតែទទួលបានលិខិតជូនដំណឹងស្ដីពីការបិទការស៊ើបសួរសំណុំរឿងនេះកាលពីសប្ដាហ៍មុនប៉ុណ្ណោះពោលគឺនៅពេលលោកទៅបង្ហាញខ្លួនតាមការបង្គាប់របស់ចៅក្រមស៊ើបសួរ។
លោកបន្តថា លោក និងប្រជាសហគមន៍ ៩ នាក់ផ្សេងទៀតមានការរីករាយ ដោយសារតុលាការឈប់កោះហៅពួកលោកឲ្យទៅបំភ្លឺរយៈពេល ២ ខែម្ដង។ ការបិទបញ្ចប់នេះដោយសារក្រុមលោកមិនមានកំហុសឆ្គងអ្វីដែលធ្វើឲ្យដើមបណ្ដឹងចាប់កំហុសបាន។ ម្យ៉ាងទៀតតុលាការក៏មិនមានភ័ស្តុតាងដាក់បន្ទុកមកលើពួកលោកដែរ។
មន្ត្រីសិទ្ធិមនុស្សរូបនេះបញ្ជាក់ថា៖ «ការបង្ហាញខ្លួនកន្លងមក មន្ត្រីតុលាការគ្រាន់តែឲ្យពួកខ្ញុំបំពេញលិខិតស្នាម និងចុះវត្តមានមិនមានការសួរនាំពាក់ព័ន្ធនឹងសំណុំរឿងនេះទេ។ បើទោះជារងបណ្ដឹង ឬត្រូវតុលាការដាក់ឲ្យស្ថិតក្រោមការត្រួតពិនិត្យបែបណាក្តី ក៏ខ្ញុំមិនរាថយក្នុងការចុះបង្រៀនសហគមន៍មូលដ្ឋាន និងដាក់បណ្ដឹងបរិហារប្រឆាំងនឹងបទល្មើសព្រៃឈើ និងធនធានធម្មជាតិនោះដែរ»៕
