.jpg)
លោក អួន ឈិន និង យាង សុជាមេត្តា នៅមុខតុលាការក្រុងពីម្សិល។ ហេង ជីវ័ន
ភ្នំពេញៈ សាលាដំបូងរាជធានី-ភ្នំពេញពីម្សិលមិញបានប្រកាសសាលក្រមចាត់របៀប (ស៊ើបអង្កេតបន្ត) លើសំណុំរឿងអតីតបុគ្គលិកវិទ្យុអាស៊ីសេរី ២ រូបក្រោយតុលាការបានពន្យារពេលប្រកាសសាលក្រមម្តងរួចមកហើយ ក្រោយពីជំនុំជម្រះកាលពីខែសីហាដែលនីតិវិធីនេះជនត្រូវចោទថាធ្វើឱ្យពួកគេសោកស្តាយខ្លាំង ដោយសារសំណុំរឿងនេះត្រូវតុលាការបិទការស៊ើបអង្កេតម្តងរួចទៅហើយ។
ក្នុងបន្ទប់សវនាការនៅសាលាដំបូងរាជធានីភ្នំពេញពីម្សិលមិញ ខណៈមានវត្តមានពីអ្នកសង្កេតការណ៍ស្ថានទូតសហរដ្ឋអាមេរិកប្រចាំកម្ពុជាពីអ្នកសង្កេតការណ៍អង្គការសមាគមការពារសិទ្ធិមនុស្ស (អាដហុក) ក៏មានភ្នាក់ងាររាយការណ៍ឲ្យអង្គភាពព័ត៌មានក្នុង និងក្រៅប្រទេសមួយចំនួនផងដែរ។
លោកចៅក្រម អ៊ឹម វណ្ណៈ បានអានសេចក្តីសម្រេចនៅចំពោះមុខលោក អ៊ួន ឈិន និង លោក យាង សុធារិន្ទ ហៅ យាង សុជាមេត្តា ថាក្រោយពីបានស្តាប់ចម្លើយរបស់ជនត្រូវចោទទាំង ២ រូប និងបន្ទាប់ពីបានស្តាប់សេចក្តីសន្និដ្ឋានរបស់មេធាវីការពារសិទ្ធិឲ្យជនត្រូវចោទ និងក្រោយពីស្តាប់សេចក្តីសន្និដ្ឋានរបស់តំណាងអយ្យការកាលពីថ្ងៃជំនុំជម្រះមក ក្រុមប្រឹក្សាជំនុំជម្រះយល់ឃើញថា សំណុំរឿងនេះនៅមិនទាន់មានភ័ស្តុតាងគ្រប់គ្រាន់ដើម្បីអាចឲ្យតុលាការធ្វើការសម្រេចសេចក្តីក្នុងការផ្តន្ទាទោសទៅលើជនត្រូវចោទទាំង ២ រូបបាននៅឡើយទេ។
ដូច្នេះតុលាការនឹងត្រូវធ្វើការចាត់របៀប ដើម្បីសិក្សាឲ្យបានល្អិតល្អន់ទៅលើវត្ថុតាងដែលសង្ស័យថាជាប់ពាក់ព័ន្ធបទល្មើសបន្ថែមទៀត។
លោកចៅក្រម អ៊ឹម វណ្ណៈ ថ្លែងថា៖ «ភ័ស្តុតាងដែលសង្ស័យថាពាក់ព័ន្ធបទល្មើសដែលមានកន្លងមកនៅមិនទាន់មានភាពច្បាស់លាស់។ ដើម្បីរកភ័ស្តុតាងថ្មីបន្ថែមទៀតក្នុងការបំពេញកិច្ចការនោះតុលាការនឹងធ្វើការចាត់របៀបក្នុងសំណុំរឿងនេះបន្តទៀត»។
ជនត្រូវចោទលោក យាង សុធារិន្ទ ប្រាប់ភ្នំពេញប៉ុស្តិ៍បន្ទាប់ពីចូលស្តាប់ក្នុងសវនាការថា ប្រការដែលតុលាការរាជធានីភ្នំពេញប្រកាសសាលក្រមចាត់របៀបលើសំណុំរឿងរបស់លោក និង លោក អ៊ួន ឈិន គឺជាការធ្វើឲ្យពួកលោកមានការខកចិត្ត និងមានការសោកស្តាយយ៉ាងខ្លាំងចំពោះសេចក្តីសម្រេចនេះ។
លោកប្រាប់ថា៖ «ពួកខ្ញុំមិនយល់ ព្រោះថាសំណុំរឿងរបស់ពួកខ្ញុំត្រូវតុលាការបិទការស៊ើបអង្កេតរួចរាល់ ហើយរុញទៅឲ្យចៅក្រមជំនុំជម្រះដែលបានចំណាយពេលប្រកាសសាលក្រមក៏យូរទៀត។ តែចុងបញ្ចប់បែរជាថា ស៊ើបអង្កេតមិនទាន់គ្រប់គ្រាន់ទៅវិញ»។
អតីតអ្នករាយការណ៍ឱ្យវិទ្យុអាស៊ីសេរីរូបនេះបន្តថា ការស៊ើបអង្កេតឡើងវិញយ៉ាងណានោះគឺពួកលោកមិនជំទាស់អ្វីទេ។ បើតុលាការចង់ធ្វើការស៊ើបអង្កេតបន្តក៏តាមតែតុលាការទៅ ប៉ុន្តែបញ្ហាសំខាន់គឺមិនត្រឹមតែពួកលោកទាំង ២ នាក់ទេ ប៉ុន្តែក៏ដូចប្រជាពលរដ្ឋទូទៅដែរគឺតុលាការហាក់ដូចជាមិនឲ្យតម្លៃយុត្តិធម៌ទៅប្រជាពលរដ្ឋខ្លួនឯង ព្រោះបើយោងទៅលើរយៈពេលនៃការស៊ើបអង្កេតក្នុងរឿងរបស់លោកនេះជាង ២ ឆ្នាំមកហើយ។ ដូច្នេះវាលើសពីការគ្រប់គ្រាន់សម្រាប់តុលាការក្នុងការធ្វើការសម្រេចចិត្តចំពោះការចោទប្រកាន់មកលើពួកលោកហើយ។
លោកថា៖ «ពួកខ្ញុំគ្រាន់តែចង់បញ្ជាក់ថា ការរស់នៅរបស់ពួកខ្ញុំបច្ចុប្បន្នមានផលលំបាកដែលរស់នៅក្រោមគំនាបរបស់តុលាការដែលគ្មានសិទ្ធិសេរីភាពពេញលេញដូចគេដូចឯង។ ចំពោះការប្រកបវិជ្ជាជីវៈអ្វីមួយក៏នៅស្ទាក់ស្ទើរទៀត»។
លោក អ៊ួន ឈិន និងលោក យាង សុជាមេត្តា ត្រូវបានសាលាដំបូងរាជធានីភ្នំពេញចោទពីបទ «ប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយដល់ការការពារជាតិ និងបទចោទមួយទៀតអំពីការផលិតភាពយន្តអាសអាភាស»។ ករណីនេះក៏ត្រូវបានសាលាដំបូងរាជធានីភ្នំពេញបដិសេធសំណើសុំនៅក្រៅឃុំបណ្តោះអាសន្នកាលពីថ្ងៃទី ៤ ខែធ្នូ ឆ្នាំ ២០១៧។
បើយោងបទចោទតាមបញ្ញត្តិមាត្រា ៤៤៥ នៃក្រមព្រហ្មទណ្ឌ បើតុលាការរកឃើញនូវកំហុសមែននោះជនត្រូវចោទអាចជាប់ទោសពី ៧ ឆ្នាំ ទៅ ១៥ ឆ្នាំ។
លោក អ៊ួន ឈិន និង លោក យាង សុជាមេត្តា ត្រូវបាននគរបាលរាជធានីភ្នំពេញចាប់ខ្លួនកាលពីយប់ថ្ងៃទី ១៤ វិច្ឆិកា ២០១៧ ខណៈពួកគេកំពុងរៀបចំបន្ទប់ស្ទូឌីយោក្នុងផ្ទះសំណាក់ម៉ារឌីជាន់ទី ៧ នៅសង្កាត់ស្ទឹងមានជ័យ ខណ្ឌមានជ័យក្រោមការសង្ស័យផ្តល់ព័ត៌មានពីកម្ពុជាទៅវិទ្យុអាស៊ីសេរីមានមូលដ្ឋាននៅវ៉ាស៊ីនតោនសហរដ្ឋអាមេរិកដោយគ្មានច្បាប់អនុញ្ញាត។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជាដែលបានចូលស្តាប់ក្នុងសវនាការនោះបានសរសេរលើទំព័រហ្វេសប៊ុកថាលោក អ៊ួន ឈិន និងលោក យាង សុធារិន្ទ ត្រូវបាន ប្រឈមបទចោទ និងជាប់ឃុំអស់រយៈពេល ៩ ខែ។ ក្រោយមកត្រូវបានដោះលែងនៅក្រៅឃុំបណ្តោះអាសន្ន ហើយតុលាការបានជំនុំជំម្រះរឿងក្តីរបស់ពួកគាត់ទាំង ២ កាលពីចុងខែកក្កដានិងដើមខែសីហា ឆ្នាំ ២០១៩។
លោកស្រី សុភាព បានបញ្ជាក់ថា៖ «ឆ្លៀតឱកាសនេះ ខ្ញុំសូមអំពាវនាវដល់តុលាការសូមពិចារណាទម្លាក់រាល់បទចោទប្រកាន់ដល់រូបលោកទាំង ២ និងស្នើដល់រដ្ឋាភិបាលក្នុងការធានាការពារដល់សេរីភាពអ្នកសារព័ត៌មាន ដើម្បីអនុញ្ញាតឲ្យអ្នកសារព័ត៌មានទាំងឡាយអាចបំពេញភារកិច្ចស្របច្បាប់របស់ពួកគាត់ដែលកិច្ចការនេះនឹងចូលរួមលើកកម្ពស់អភិបាលកិច្ចយ៉ាងសំខាន់សម្រាប់សង្គមយើង»៕
