.jpg)
លោក ហ៊ុន សែន ពេលអញ្ជើញសួរសុខទុក្ខជនរងគ្រោះករណីបាក់អគារនៅខេត្តព្រះសីហនុកាលពីខែមិថុនា។ រូបថត SPM
ព្រះសីហនុៈ ក្រុមមេធាវីស្ម័គ្រចិត្តរបស់លោកនាយករដ្ឋមន្ត្រី ហ៊ុន សែន ដែលការពារក្តីឲ្យជនរងគ្រោះក្នុងការទាមទារសំណងពីការរលំបាក់អគារនៅខេត្តព្រះសីហនុបានចូលបង្ហាញខ្លួននៅតុលាការកាលពីសប្តាហ៍មុន ក្រោយពីប្រធានតុលាការណែនាំឲ្យពួកគេស្វែងរកទ្រព្យសម្បត្តិរបស់ជនជាប់ចោទមាននៅកម្ពុជា ដើម្បីស្នើនីតិវិធីក្នុងការបង្កកទ្រព្យសម្បត្តិចៀសវាងខាតបង់ដល់ជនរងគ្រោះ។
កាលពីអំឡុងខែកក្កដា ជនរងគ្រោះជិត ៥០ គ្រួសារក្នុងឧបទ្ទវហេតុរលំបាក់អគារនៅខេត្តព្រះសីហនុតាមរយៈក្រុមមេធាវីស្ម័គ្រចិត្តបានជំរុញតុលាការឲ្យពន្លឿននីតិវិធីស្វែងរកយុត្តិធម៌ និងទាមទារសំណងជំងឺចិត្តពីក្រុមហ៊ុនចិនក្នុងម្នាក់ៗចន្លោះពី ២ ម៉ឺនដុល្លារដល់ជាង ១០ ម៉ឺនដុល្លារ។
លោក គី តិច ប្រធានក្រុមមេធាវីស្ម័គ្រចិត្តរបស់លោក ហ៊ុន សែន ប្រាប់ភ្នំពេញប៉ុស្តិ៍ពីម្សិលមិញថាកាលពីសប្តាហ៍មុន ក្រុមមេធាវីដែលដឹកនាំដោយលោកស្រី អ៊ូ ធីតាពៅ បានជួបផ្ទាល់ជាមួយប្រធានតុលាការដើម្បីបង្ហាញខ្លួន និងដាក់ភ័ស្តុតាងជុំវិញការទាមទាររបស់កូនក្តី។ លោកបន្តថាការបង្ហាញខ្លួននេះ បន្ទាប់ពីដាក់ពាក្យបណ្តឹងទៅតុលាការពីការទាមទារសំណងជំងឺចិត្តជំនួសកូនក្តីខ្លួនទាំងជាង ៥០ គ្រួសារ។
លោកបញ្ជាក់ថា៖ «យើងបានដាក់ទៅហើយ ហើយសប្តាហ៍មុននេះតុលាការបានកោះអញ្ជើញមេធាវីទៅចូលរួមបំភ្លឺលើពាក្យបណ្តឹង និងបន្ថែមបន្ថយលើចម្លើយរួមទាំងសំណូមពររបស់ខ្លួនរួចហើយ។ នីតិវិធីបន្តទៀតគឺជាសមត្ថកិច្ចរបស់តុលាការ។ អ៊ីចឹងតុលាការបន្តកោះហៅអ្នកណាមកសួរចម្លើយ ឬសាក្សីផ្សេងៗទៀតនៅតុលាការជាបន្តបន្ទាប់ មុនតុលាការសម្រេច»។
បន្ថែមពីនេះលោក គី តិច ក៏បានអះអាងដែរថាចំពោះការការពារក្តីជូនជនរងគ្រោះទាំងនេះគឺជាការស្ម័គ្រចិត្តតាមរយៈការណែនាំពីលោកនាយករដ្ឋមន្ត្រី ហ៊ុន សែន ដែលមានបំណងស្វែងរកយុត្តិធម៌ ជាពិសេសសំណងជំងឺចិត្តដល់ជនរងគ្រោះដែលលោកស្នើកុំឲ្យទាញបញ្ហានេះ ពាក់ព័ន្ធនឹងរឿងនយោបាយ។
លោកស្រី អ៊ូ ធីតាពៅ មេធាវីការពារជនរងគ្រោះមិនអាចសុំការអត្ថាធិប្បាយបន្ថែមជុំវិញបញ្ហានេះបានទេពីម្សិលមិញ ព្រោះទូរស័ព្ទចូលមិនមានអ្នកទទួល។
ទោះបីយ៉ាងណាលោក សុខ កល្យាណ ប្រធានសាលាដំបូងខេត្តព្រះសីហនុ ប្រាប់ភ្នំពេញ-ប៉ុស្តិ៍ថា ក្រោយពីបានសាកសួរមេធាវី នីតិវិធីបន្តបន្ទាប់ តុលាការនឹងធ្វើការកោះអញ្ជើញជនរងគ្រោះម្តងមួយៗចាប់ពីពេលនេះ ដើម្បីពិនិត្យលើការទាមទារ និងការខាតបង់របស់ជនរងគ្រោះទាំងនោះ ខណៈដំណើរការស៊ើបអង្កេតរឿងព្រហ្មទណ្ឌនៅបន្តនីតិវិធីនៅឡើយ។
លោក សុខ កល្យាណ ក៏បានណែនាំឲ្យក្រុមមេធាវីត្រូវស្វះស្វែងស្នើសុំរក្សាការពារនូវទ្រព្យសម្បត្តិ និងស្រាវជ្រាវទ្រព្យសម្បត្តិដែលជនជាតិចិនទាំងនោះមានដើម្បីធានាលើការផ្តល់សំណងរដ្ឋប្បវេណីផងដែរ។
លោកបញ្ជាក់ថា៖ «យើងនឹងពន្លឿនរឿងក្តីហ្នឹងឲ្យបានឆាប់រហ័ស ប៉ុន្តែវាពិបាកដែររឿងសំណងហ្នឹង វាមិនងាយប៉ុន្មានទេ ព្រោះពួកគាត់ (ជនរងគ្រោះ) ទាមទារច្រើន ហើយយើងមិនដឹងថា ទំហំនៃការខូចខាតមានប៉ុន្មានទេ។ យើងធ្វើការស៊ើបអង្កេតវាស់វែង ហើយជនជាតិចិនហ្នឹងកំពុងបន្តនៅឃុំខ្លួននៅឡើយ ដែលយើងមិនទាន់ដឹងនៅឡើយថា ជនជាតិចិនហ្នឹងមានទ្រព្យសម្បត្តិប៉ុន្មាន»។
លោកបានបន្តថា៖ «បើសិនជាយើងដាក់តែក្រដាសអ៊ីចឹង បើជនជាប់ចោទគាត់បណ្តោះទ្រព្យសម្បត្តិគាត់អស់ទៅ ពេលដែលសាលក្រមចេញមកយកទៅអនុវត្តទៅវាលំបាក មិនដឹងយកទៅអនុវត្តលើអី។ អ៊ីចឹងក្រុមមេធាវីហ្នឹង ត្រូវតែគិតគូរជួយដល់ពួកគាត់ហើយ»។
កាលពីខែមិថុនាសំណង់អគារកម្ពស់ ៧ ជាន់ ដែលត្រូវបានអះអាងថា គ្មានច្បាប់អនុញ្ញាតបានបាក់រលំបណ្តាលឲ្យកម្មករដែលសម្រាកបណ្តោះអាសន្នក្នុងអគារនេះចំនួន ២៨ នាក់ស្លាប់ ក្រោមគំនរបាក់បែក។ ឯកម្មករចំនួន ២៦ នាក់ផ្សេងទៀត ត្រូវបានជួយសង្គ្រោះដោយជនរងគ្រោះខ្លះបានជាប់ក្រោមអគារដល់ទៅជាង ៤៨ ម៉ោង។
ពាក់ព័ន្ធនឹងការបាក់រលំអគារនេះ អ្នកទទួលខុសត្រូវ និងម្ចាស់ក្រុមហ៊ុនម៉ៅការសំណង់ដែលជាជនជាតិចិនចំនួន ៤ នាក់ត្រូវបានតុលាការខេត្តព្រះសីហនុចេញដីកា ៤ ផ្សេងគ្នាកាលពីថ្ងៃទី ២៤ ខែមិថុនាដោយសម្រេចឃុំខ្លួនបណ្តោះអាសន្ន។
ជនរងគ្រោះម្នាក់ដែលនៅមានជីវិតក្រោយបាក់រលំអគារលោក អ៊ុក សាវ៉ាត វ័យ ៣១ ឆ្នាំ ប្រាប់ភ្នំពេញប៉ុស្តិ៍ម្សិលមិញថា លោកនៅតែទន្ទឹងរង់ចាំចំណាត់ការរបស់តុលាការក្នុងការផ្តល់សំណងជំងឺចិត្តដល់លោកដើម្បីបន្តអាជីពថ្មីជាកសិករ និងចិញ្ចឹមគោក្របី។
លោកបានបញ្ជាក់តាមទូរស័ព្ទបង្ហាញពីអារម្មណ៍នៅបន្តភ័យខ្លាច និងបានបោះបង់អាជីពជាកម្មករសំណង់ថា៖ «ខ្ញុំសូមសំណូមពរឲ្យជួយដោះស្រាយឲ្យខ្ញុំ ហើយខាងតុលាការឆាប់កាត់ក្តី និងផ្តល់សំណងដើម្បីយកទៅប្រកបមុខរបរផ្សេងពីហ្នឹង។ ព្រោះអីធ្វើការហ្នឹងលែងកើតហើយ សូម្បីតែផ្ទះខ្លួនឯងក៏លែងហ៊ានចង់នៅដែរ ព្រោះវាខ្ពស់ឲ្យតែខ្យល់មកវូៗ នាំគ្នាចុះពីផ្ទះអស់ហើយ»៕
