.jpg)
លោក កឹម សុខា ពេលនាំមកសាលាដំបូងពីខែមករា។ ហេង ជីវ័ន
ភ្នំពេញ៖ សាលាដំបូងរាជធានីភ្នំពេញ បានបន្តពន្យារពេលបន្តសវនាការសំណុំរឿងសន្ទិដ្ឋភាពជាមួយបរទេសរបស់លោក កឹម សុខា បើទោះបីជាមានសំណើពីក្រុមមេធាវីការពារលោកក្ដី ដោយសារបារម្ភរឿងកូវីដ ១៩ ខណៈសំឡេងសន្ទនាចាស់រវាងលោក កឹម សុខា និងលោកនាយករដ្ឋមន្ត្រី ហ៊ុន សែន ត្រូវបានអ្នកលេងហ្វេសប៊ុកយកមកបង្ហោះឡើងវិញ ធ្វើឲ្យមានការចាប់អារម្មណ៍។
លោក កូយ សៅ ប្រធានក្រុមជំនុំជម្រះសំណុំរឿង «សន្ទិដ្ឋភាពជាមួយបរទេស» ដែលមានលោក កឹម សុខា ជាជនជាប់ចោទ បានសម្រេចបន្តពន្យារពេលបន្តសវនាការលើសំណុំរឿងនេះ ដោយយល់ឃើញថាស្ថានភាពឆ្លងជំងឺកូវី ១៩ ហាក់មិនទាន់ធូរស្រាលនៅឡើយ។
យោងតាមលិខិតចុះថ្ងៃទី ២៣ មិថុនា ដែលជាការឆ្លើយតបមកសហមេធាវីការពារក្ដីឲ្យលោក កឹម សុខា ចៅក្រម កូយ សៅ បានលើកឡើងថា ក្រុមប្រឹក្សាជំនុំជម្រះយល់ឃើញថា គប្បីបន្តផ្អាកតទៅទៀត ដោយសារស្ថានភាពកូវីដ ១៩។
លោកចៅក្រមបានបញ្ជាក់ក្នុងលិខិតថា៖ «ជាក់ស្ដែងគ្រប់គ្នានៅមានអារម្មណ៍ភ័យខ្លាចអំពីមេរោគកូវីដ ១៩ ដែលមានចរិតចម្លងរាលដាលដ៏កាចសាហាវ និងមានលក្ខណៈធ្ងន់ធ្ងរជាសកល។ ម្យ៉ាងវិញទៀត សាលសវនាការជំនុំជម្រះមិនអាចផ្ទុកអ្នកចូលរួមពី ៣០ នាក់ ទៅ ៤០ នាក់ ដោយតម្រូវឲ្យមានគម្លាតរវាងគ្នានូវចម្ងាយ ២ ម៉ែត្រ ឬ ៣ ម៉ែត្រនោះបានឡើយ»។
លោក កូយ សៅ បន្តថា ការបន្តផ្អាកសវនាការនេះក្នុងគោលបំណងរក្សានូវបរិយាកាសសវនាការឲ្យមានភាពរលូន ទទួលខុសត្រូវ និងប្រកបដោយសុវត្ថិភាពគ្រប់ភាគីពាក់ព័ន្ធ និងសាធារណជនជាតិ និងអន្តរជាតិដែលចូលរួមស្ដាប់ដោយមិនភ័យខ្លាចពីមេរោគកូវីដ ១៩។
លោកចៅក្រមថ្លែងថា៖ «ភាពប្រថុយប្រថានដំណើរការសវនាការឡើងវិញក្នុងគ្រាមិនច្បាស់លាស់នេះ អាចនាំឲ្យអន្តរាយដល់សវនាការទាំងមូល និងធ្វើឲ្យប៉ះពាល់ដល់សិទ្ធិរបស់ភាគីពាក់ព័ន្ធ បើមានការចម្លងមេរោគដ៏កាចសាហាវនេះជាយថាហេតុ។ ដូច្នេះការបន្តសវនាការឡើងវិញគប្បីត្រូវធ្វើឡើងនៅក្នុងពេលវេលាសមស្របណាមួយ...»។
លោក ចាន់ ចេន និងអ្នកស្រី ម៉េង សុភារី មេធាវី ២ រូប ក្នុងចំណោម ៤ រូប បានថ្លែងពីម្សិលមិញថា សហមេធាវីការពារលោក កឹម សុខា បានដាក់ពាក្យស្នើសុំបន្តសវនាការលើសំណុំរឿងនេះកាលពីថ្ងៃទី ១៧ មិថុនា ដោយសារមើលឃើញថា ស្ថានភាពជំងឺកូវីដ ១៩ ហាក់បានធូរស្រាលឡើងវិញហើយ។
បើតាមលិខិតស្នើសុំបន្តសវនាការរបស់សហមេធាវីការពារក្ដីលោក កឹម សុខា បានលើកឡើងថា «ដើម្បីធានាបាននូវការគោរពសិទ្ធិ ក៏ដូចជាយុត្តិធម៌សម្រាប់កូនក្ដី យើងខ្ញុំជាសហមេធាវី ស្នើសុំតុលាការពិចារណាបន្តសវនាការរឿងក្ដីក្នុងសំណុំរឿងព្រហ្មទណ្ឌលេខ ៥៦៤២/I ចុះថ្ងៃទី ០៣/០៩/២០១៧ របស់សាលាដំបូងរាជធានីភ្នំពេញឡើងវិញ ប៉ុន្តែរក្សាគម្លាតតាមការណែនាំរបស់ក្រសួងសុខាភិបាល»។
សវនាការលើសំណុំរឿងនេះបានចាប់ផ្ដើមកាលពីពាក់កណ្ដាលខែមករា និងបានបន្តរហូតដល់សប្ដាហ៍ទី ២ នៃខែមីនា ប៉ុន្តែត្រូវបានផ្អាកតាមការស្នើសុំរបស់សហមេធាវីតំណាងរាជរដ្ឋាភិបាល និងសហមេធាវីការពារក្ដីជនជាប់ចោទ ដោយសារបញ្ហាកូវីដ ១៩។
កាលពីដើមខែឧសភា កន្លងទៅ លោក កឹម សុខា បានទៅចូលរួមបុណ្យសពម្ដាយក្មេករបស់លោក ហ៊ុន សែន ធ្វើឲ្យមន្ត្រីទូតបរទេសចាត់ទុកថា ជាជំហានវិជ្ជមានមួយ។ បន្ទាប់ពីពេលនោះមក មន្ត្រីទូតប្រទេសលោកខាងលិច និងជប៉ុន បានទៅសួរសុខទុក្ខលោក កឹម សុខា ជាញឹកញាប់។
ស្របពេលជាមួយគ្នានេះកាលពីម្សិលមិញគេហទំព័រហ្វេសប៊ុកមួយឈ្មោះថា «យុត្តិធម៌សង្គម» បានយកសំឡេងចាស់នៃការសន្ទនាតាមទូរស័ព្ទរវាងលោកនាយករដ្ឋមន្ត្រី ហ៊ុន សែន និងលោក កឹម សុខា មកបង្ហោះឡើងវិញ។
ហ្វេសប៊ុកដែលមានដាក់ប្រូហ្វាល់ ថា «ដោះលែង កឹម សុខា» បានសរសេរថា «ស្តាប់លោកប្រធាន កឹម សុខា ជជែកជាមួយលោក ហ៊ុន សែន ទើបដឹងច្បាស់ថា លោកប្រធាន កឹម សុខា យើងមិនត្រឹមតែមិនគាំទ្រនយោបាយឆ្កួតឡប់ៗរបស់ សម រង្ស៊ី ប៉ុណ្ណោះទេ ថែមទាំងមិនកំសាករត់ចោលស្រុក អត់ស្វាងដូច សម រង្ស៊ី នោះដែរ»។
កិច្ចសន្ទនានោះ ទំនងជាត្រូវបានថតក្រោយឆ្នាំ ២០១៥ ដែលក្នុងនោះមានការនិយាយពីវប្បធម៌សន្ទនា ការព្រមព្រៀងបញ្ហាសំឡេងភាគច្រើន និងភាគតិច នៅរដ្ឋសភា ការវាយតំណាងរាស្ត្រអតីតបក្សប្រឆាំងនៅខែតុលា ឆ្នាំ ២០១៥។ លោក ហ៊ុន សែន ថ្លែងថា លោកមិនអាចអត់ឱនឲ្យលោក សម រង្ស៊ី បានទេ ដោយសារតែលោក សម រង្ស៊ី ប្រៀបធៀបរូបលោកទៅនឹង ហ្គាដាហ្វី អតីតមេដឹកនាំលីប៊ី ដែលគេហៅថា ជនផ្ដាច់ការ។
លោក ឯម សុវណ្ណារ៉ា អ្នកវិភាគនយោបាយបានថ្លែងថា ការបញ្ចេញសំឡេងសន្ទនាចាស់នេះ ទំនងជាអ្នកបង្ហោះមានគោលបំណងអ្វីមួយ។ អ្វីដែលគួរឲ្យចាប់អារម្មណ៍ទៀតនោះ គឺមានសារព័ត៌មានដែលស្និទ្ធនឹងបក្សកាន់អំណាចយកមកផ្សព្វផ្សាយ បើទោះបីជាដឹងថាសំឡេងនេះចាស់ក៏ដោយ។
លោកថា៖ «យើងអាចយល់បានថា គោលបំណងនៃការផ្សព្វផ្សាយហាក់ដូចជាចង់ឲ្យមានការសម្រុះសម្រួល ហើយចង់ឲ្យមានការទទួលយកលោក កឹម សុខា។ នេះជាការស្ទង់មតិមួយក្នុងចំណោមមហាជនទាំងពលរដ្ឋកម្ពុជា និងសហគមន៍អន្តរជាតិ ដើម្បីស្ទង់មើលថា ពួកគេយល់ឃើញបែបណា»។
លោកបន្តថា គោលបំណងមួយទៀត គឺទំនងជាចង់បង្ហាញសហគមន៍អន្តរជាតិឲ្យពន្យារចំណាត់ការផ្សេងៗរឿងដក EBA និងចង់ដឹងពីប្រតិកម្មរបស់សាធារណជនជាតិ និងអន្តរជាតិថា ពួកគេយល់យ៉ាងណា នៅពេលអតីតប្រធានបក្សប្រឆាំងត្រូវបានទាត់ចោល។
ក៏ប៉ុន្តែលោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងពីម្សិលមិញថា លោកយល់ថា ការបង្ហោះសំឡេងសន្ទនានេះ គ្រាន់តែជាការចែករំលែកព័ត៌មាន ហើយការបកស្រាយ និងយល់ឃើញយ៉ាងណានោះ គឺជារឿងផ្ទាល់ខ្លួនរបស់បុគ្គលនីមួយៗ។
លោកបញ្ជាក់ថា៖ «ចំពោះខ្ញុំ ខ្ញុំចាត់ទុកថា នេះគ្រាន់តែជាព័ត៌មាន។ ការសន្ទនាអត់មានអីប៉ះពាល់ដល់សន្តិសុខជាតិទេ គឺរវាងបុគ្គល និងបុគ្គល ទោះបីជានាយករដ្ឋមន្ត្រីក៏មិនមានប៉ះពាល់អី ព្រោះនេះជារឿងផ្ទៃក្នុងរវាងបុគ្គល និងបុគ្គល»៕
