មណ្ឌលគិរី: ចៅក្រមស៊ើបសួរនៃសាលាដំបូងខេត្តមណ្ឌលគិរីបានកំណត់អត្តសញ្ញាណជនសង្ស័យចំនួន ១០ នាក់ទៀត ពាក់ព័ន្ធសំណុំរឿងឧត្តមសេនីយ៍ទោ ពៅ សុធារ៉ាន់ បន្ទាប់ពីចាប់ឃុំខ្លួន ៤ នាក់ ជុំវិញការឈូសឆាយដីព្រៃនៅស្រុកអូររាំង ខណៈសមាជិកព្រឹទ្ធសភាម្នាក់ សារភាពកំហុសក្នុងករណីស្នើសុំសិទ្ធិកាន់កាប់ដីធ្លីជាង ៥០០ ហិកតានៅស្រុកអូររាំង ខេត្តមណ្ឌលគិរីផងដែរ។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីបានថ្លែងពីថ្ងៃទី ៧ តុលា ថា ជនសង្ស័យ ១០ នាក់ ដែលពាក់ព័ន្ធសំណុំរឿងឧត្តមសេនីយ៍ទោ ពៅ សុធារ៉ាន់ អនុប្រធាននាយកដ្ឋាននគរបាលការពារព្រំដែនគោកក្នុងករណីទន្ទ្រានដីខុសច្បាប់នៅចំណុចភ្នំរហាំង ភូមិពូឆប ឃុំដាក់ដាំ ស្រុកអូររាំង ត្រូវបានកំណត់អន្តសញ្ញាណ។
លោកបញ្ជាក់ថា៖ «ចៅក្រមគាត់ស៊ើបរកឃើញ ១០ នាក់ហើយ ប៉ុន្ដែខ្ញុំមិនអាចបង្ហាញអត្តសញ្ញាណច្បាស់លាស់បានទេ ព្រោះវាជានីតិវិធីរបស់តុលាការ។ សូមរង់ចាំរហូតដល់ការចាប់ខ្លួនបញ្ជូនមកតុលាការសិន ចាំដឹងរឿងទាំងអស់នេះ ព្រោះឥឡូវយើងកំពុងធ្វើការ។ ចំពោះអ្នកដែលពាក់ព័ន្ធជាមួយឈ្មោះ ពៅ សុធារ៉ាន់ គឺយើងបានឃុំខ្លួនសរុប ៤ នាក់រួចរាល់»។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីថ្លែងថា មន្ត្រីជំនាញនៃមន្ទីរបរិស្ថានបានសហការជាមួយមន្ត្រីជំនាញថ្នាក់ជាតិចុះធ្វើការស្រាវជ្រាវករណីនេះ ប៉ុន្ដែលោកមិនទាន់អាចបង្ហាញរបាយការណ៍នេះបានទេ ដោយរង់ចាំការបញ្ចប់សំណុំរឿងទាំងអស់សិន។
លោកបញ្ជាក់ថា៖ «ចំពោះករណីលោក ពៅ សុធារ៉ាន់ នេះ គឺខ្ញុំទទួលព័ត៌មានថា តុលាការបានឃុំខ្លួនមនុស្សពាក់ព័ន្ធចំនួន ៤ នាក់ហើយ។ ក្នុងនោះមានចាងហ្វាងកាសែតម្នាក់ពលរដ្ឋ ២ នាក់ និងឧត្តមសេនីយ៍ទោម្នាក់និយាយរួម គឺពួកគាត់ត្រូវបានឃុំខ្លួនអស់ហើយ។ យើងនៅបន្តស្រាវជ្រាវអ្នកពាក់ព័ន្ធផ្សេងៗទៀត»។
ជុំវិញករណីដីធ្លីនេះដែរលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្ងៃទី ៦ ខែតុលា បានស្នើឲ្យលោក សាយ ឈុំ ប្រធានព្រឹទ្ធសភាធ្វើការអប់រំ ណែនាំដល់លោក ណយ ស្រូន សមាជិកព្រឹទ្ធសភាភូមិភាគ ៨ ដែលមានពាក់ព័ន្ធនឹងការកាប់រាន ដុតឆ្ការ ទន្ទ្រានកាន់កាប់ដីព្រៃខុសច្បាប់ដែលមានផ្ទៃដីរហូតដល់ ៥៣១ ហិកតា នៅភូមិពូហ្សាម ឃុំសែនមនោរម្យ ស្រុកអូររាំង។
បន្ទាប់ពីមានការស្នើនេះអ្នកនាំពាក្យព្រឹទ្ធសភាបានចេញលិខិតបំភ្លឺ ១ កាលពីល្ងាចថ្ងៃទី ៦ ខែតុលា ថា ដោយអនុវត្តតាមចំណាររបស់លោកនាយករដ្ឋមន្ត្រី ហ៊ុន សែន ចុះថ្ងៃទី ២ ខែ កញ្ញា ឆ្នាំ ២០២០ ស្ដីពីការពាក់ព័ន្ធជាមួយលោក ណយ ស្រូន ក្នុងការរៀបចំឯកសារកាន់កាប់ដីទំហំ ៥៣១ ហិកតា នៅភូមិពូហ្សាម ឃុំសែនមនោរម្យ។ លោក សាយ ឈុំ ប្រធានព្រឹទ្ធសភា លោក ស៊ឹម កា អនុប្រធានទី ១ ព្រឹទ្ធសភា និងលោក ទេព ងន អនុប្រធានទី ២ ព្រឹទ្ធសភា បានជួបប្រជុំពីបញ្ហានេះជាមួយលោក ណយ ស្រូន តាំងពីថ្ងៃទី ២៣ កញ្ញា ឆ្នាំ ២០២០។
អ្នកនាំពាក្យបញ្ជាក់ថា ក្រោមមតិណែនាំរបស់ថ្នាក់ដឹកនាំព្រឹទ្ធសភាលោក ណយ ស្រូន បានសុំខន្តីអភ័យទោសរាល់កំហុសខុសឆ្គង ទោះចេតនាក្ដី ឬអចេតនាក្ដីពីថ្នាក់ដឹកនាំ និងដែលបានធ្វើឲ្យថ្នាក់ដឹកនាំមានការលំបាកដោយសារខ្លួន។ ជាមួយនេះក៏បានទទួលយកការអប់រំណែនាំទាំងអស់របស់ប្រធាន និងអនុប្រធានទាំង ២ នៃព្រឹទ្ធសភាដោយបានធ្វើលិខិតបញ្ជាក់ចុះថ្ងៃទី ២៣ កញ្ញា ឆ្នាំ ២០២០ ឈប់ពាក់ព័ន្ធជាមួយដី ៥៣១ ហិកតានេះបន្តទៀតហើយ។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុកបានថ្លែងថា នៅពេលដែលរកឃើញថា មន្ត្រីធ្វើខុស តែបែរជាមិនផ្តន្ទាទោសទៅតាមច្បាប់ ហើយឲ្យសុំទោសបញ្ចប់រឿងគឺវាបង្ហាញឲ្យឃើញនូវការអនុវត្តច្បាប់មួយដែលមានស្ដង់ដា២ ពោលគឺមិនអាចដាក់ទោសមន្ត្រីជាន់ខ្ពស់បាន រីឯអ្នកដែលបានប្រព្រឹត្តដូចគ្នានេះដែរ ប៉ុន្ដែគ្មានឋានៈ បុណ្យស័ក្ដិ បែរជាត្រូវទទួលទោសតាមច្បាប់យ៉ាងតឹងរ៉ឹងទៅវិញ។
លោកបញ្ជាក់ថា៖ «ការកាប់រុករានដីព្រៃនេះគឺជាបទឧក្រិដ្ឋមជ្ឈិម មិនអាចលើកលែងតាមរយៈសុំទោសដាក់ពិន័យតិចតួច ឬសារភាពកំហុសបញ្ចប់រឿងនោះទេ។ ខ្ញុំឃើញព័ត៌មានចុងក្រោយនេះគឺមានមន្ត្រីជាន់ខ្ពស់ពាក់ព័ន្ធបទល្មើសគឺបានត្រឹមតែសុំទោសចប់រឿង ខ្ញុំមិនគាំទ្រទេ ព្រោះវាផ្ទុយនឹងនីតិវិធីច្បាប់»។
លោក ម៉ម ប៊ុននាង អ្នកនាំពាក្យព្រឹទ្ធសភាមិនអាចទាក់ទងសុំការបញ្ជាក់បន្ថែមជុំវិញករណីនេះបានទេ។ ចំណែកលោក ណយ ស្រូន ក៏មិនទាន់អាចស្វែងរកប្រភពទាក់ទងសុំបញ្ជាក់ករណីនេះបានដែរ។
ប៉ុន្តែព្រឹទ្ធសភាកាលពីថ្ងៃទី ៧ ខែតុលា បានចេញសេចក្ដីបំភ្លឺ ១ ទៀតថាលោក ណយ ស្រូន ពុំទាន់បានគ្រប់គ្រង និងប្រើប្រាស់ដីទំហំ ៥៣១ ហិកតា ខាងលើនេះនៅឡើយទេ គឺទើបតែក្នុងដំណើរការដំបូងនៃការដាក់ពាក្យស្នើសុំសិទ្ធិកាន់កាប់ដីនេះទៅអាជ្ញាធរមានសមត្ថកិច្ចប៉ុណ្ណោះ ហើយអាជ្ញាធរមានសមត្ថកិច្ចក៏ពុំទាន់អនុញ្ញាតនៅឡើយដែរ៕