The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​យល់ព្រម​ប្រគល់​ឯកសារ​រឹបអូស​ ឲ្យ​អតីត​បុគ្គលិក​វិទ្យុ​អាស៊ីសេរី​ម្នាក់ និង​ម្នាក់ទៀត​បដិសេធ




តុលាការ​យល់ព្រម​ប្រគល់​ឯកសារ​រឹបអូស​ ឲ្យ​អតីត​បុគ្គលិក​វិទ្យុ​អាស៊ីសេរី​ម្នាក់ និង​ម្នាក់ទៀត​បដិសេធ

Content image - Phnom Penh Post
លោក​ អ៊ួន ឈិន (​ឆ្វេង​) និង លោក​ យាង សុធារិន្ទ (​ស្ដាំ​) នៅ​តុលាការ​កំពូល​ម្សិលមិញ​។ ហុង មិនា

តុលាការ​យល់ព្រម​ប្រគល់​ឯកសារ​រឹបអូស​ ឲ្យ​អតីត​បុគ្គលិក​វិទ្យុ​អាស៊ីសេរី​ម្នាក់ និង​ម្នាក់ទៀត​បដិសេធ

ភ្នំពេញៈ តុលាការ​កំពូល​ប្រកាស​សាលដីកា​ភ្លាមៗ​ពី​ម្សិលមិញ ដោយ​សម្រេច​ប្រគល់​អត្តសញ្ញាណប័ណ្ណ​ឲ្យ​លោក​ អ៊ួន ឈិន វិញ តែ​បដិសេធ​ប្រគល់​លិខិត​ឆ្លងដែន​ឲ្យ​លោក​ យាង សុធារិន្ទ ដែល​អ្នក​ទាំង​ ២ ​អតីត​ជា​បុគ្គលិក​វិទ្យុ​អាស៊ីសេរី បន្ទាប់ពី​ជំនុំជម្រះ​លើ​បណ្តឹង​ជំទាស់​នឹង​ដីកា​សម្រេច​រក្សាទុក​ឯកសារ​របស់​សាលាឧទ្ធរណ៍ ដែល​សមត្ថកិច្ច​ឃាត់​ខ្លួន​នៅ​រាជធានី​ភ្នំពេញ កាលពី​ឆ្នាំ​ ២០១៧​។

ក្នុង​បន្ទប់​សវនាការ​ពី​ម្សិលមិញ​លោក​ និល ណុន ប្រធាន​ក្រុមប្រឹក្សា ជំនុំជម្រះ បាន​អាន​សាលដីកា​នៅ​ចំពោះ​មុខ​លោក​ អ៊ួន ឈិន និង​លោក​ យាង សុធារិន្ទ ហៅ​ យាង សុជាមេត្តា ថា សភា​ព្រហ្មទណ្ឌ​សាលាឧទ្ធរណ៍​កាលពី​ថ្ងៃទី​ ៣១ ​មីនា ឆ្នាំ​ ២០២០ ​បាន​ប្រកាស​ច្រានចោល​បណ្តឹង​ជំទាស់​របស់​លោក​ អ៊ួន ឈិន និង​លោក​ យាង សុធារិន្ទ ចំពោះ​ឯកសារ​រឹបអូស​យក​រួមមាន​លិខិត​ឆ្លងដែន​របស់​លោក​ យាង សុធារិន្ទ ១ ​ច្បាប់ និង​អត្តសញ្ញាណប័ណ្ណ​របស់​លោក​ អ៊ួន ឈិន ចំនួន​ ១ ​ពាក់ព័ន្ធ​បទចោទ​ «​ប្រគល់​ឲ្យ​រដ្ឋ​បរទេស​នូវ​ព័ត៌មាន​ជាអាទិ៍​ដែល​អាច​ធ្វើឲ្យ​អន្តរាយ​ការការពារ​ជាតិ​»​។

លោក និល ណុន បន្ត​ថា​លោក​ទាំង​ ២ ​នាក់​បាន​ប្តឹង​សារទុក្ខ​មក​តុលាការ​កំពូល ដើម្បី​ទាមទារ​យក​ឯកសារ​ខាងលើ​វិញ​ទុក ដើម្បី​ប្រើប្រាស់​ហើយ​នៅ​ថ្ងៃទី​ ២៧ ​ឧសភា ឆ្នាំ​ ២០២០ ​នេះ​តុលាការ​កំពូល​បាន​លើក​យក​សំណុំ​រឿងនេះ​មក​ជំនុំជម្រះ​។

លោក​ថា ក្រោយពី​បាន​ស្តាប់​ការសន្និដ្ឋាន​ពី​លោក​ សំ ចំរើន មេធាវី​ការពារ​សិទ្ធិ​ឲ្យ​ជន​ទាំង​ ២ ​នាក់ និង​ក្រោយពី​ស្តាប់​ការឆ្លើយ​របស់​លោក​ អ៊ួន ឈិន និង​លោក​ យាង សុធារិន្ទ ព្រមទាំង​សេចក្តី​សន្និដ្ឋាន​របស់​តំណាង​មហាអយ្យការ​មក​តុលាការ​កំពូល​យល់ឃើញ​ថា តុលាការ​បដិសេធ​ការស្នើសុំ​លិខិតឆ្លងដែន ដោយ​លោក​ យាង សុធារិន្ទ និង​សម្រេច​តម្កល់​សាលដីកា​របស់​សភា​ព្រហ្មទណ្ឌ​សាលាឧទ្ធរណ៍​ទុក​ជា​បាន​ការ​ដដែល​។ លើកលែងតែ​លោក​ អ៊ួន ឈិន គឺ​តុលាការ​កំពូល​សម្រេច​ប្រកាស​សាលដីកា​ប្រគល់​អត្តសញ្ញាណប័ណ្ណ​ជូន​ម្ចាស់​ដើម​វិញ​។

លោក​ថា​៖ «​ការមិន​ប្រគល់​លិខិត​ឆ្លងដែន​ដល់​លោក​ យាង សុធារិន្ទ​ នេះ តុលាការ​យល់ថា ដើម្បី​រារាំង​ដល់​ជន​ត្រូវ​ចោទ​ក្នុង​ការចេញ​ទៅ​ក្រៅ​ប្រទេស ព្រោះ​ប៉ះពាល់​ដល់​សន្តិសុខ​ជាតិ​»​។

លោក​ សំ ចំរើន មេធាវី​ការពារ​សិទ្ធិ​ឲ្យ​លោក​ អ៊ួន ឈិន និង​លោក​ យាង សុធារិន្ទ ប្រាប់​នៅក្រៅ​បន្ទប់​សវនាការ​ម្សិលមិញ​ថា លោក និង​កូនក្តី​គឺ​មាន​អារម្មណ៍​ខកចិត្ត​ចំពោះ​សេចក្តី​សម្រេច​របស់​តុលាការ​កំពូល​ទៅនឹង​បណ្តឹង​ស្នើសុំ​លិខិត​ឆ្លងដែន និង​អត្តសញ្ញាណប័ណ្ណ​នេះ​។

លោក​ថ្លែងថា​៖ «​យើង​យល់ថា​ការសម្រេច​បែបនេះ​គឺ​ផ្តល់​តម្លៃ​លើ​សេរីភាព​បុគ្គល​តិច​មិន​ដូច​មាន​បញ្ញតិ្ត​ក្នុង​ច្បាប់​រដ្ឋធម្មនុញ្ញ​»​។

លោក​បន្តថា ឯកសារ​ទាំង​ ២ ​នេះ​ដូចជា​មិនមាន​ភាព​ដាច់​ដោយឡែក​ពី​គ្នា​ខ្លាំង​ទេ ហើយ​បើ​តាម​លក្ខខណ្ឌ​ច្បាប់​លុះត្រាតែ​កូនក្តី​លោក​ត្រូវ​បាន​តុលាការ​ដាក់​ឲ្យ​ស្ថិត​នៅ​ក្រោម​ការត្រួតពិនិត្យ​តាម​ផ្លូវ​តុលាការ ទើប​ការសម្រេច​ដកហូត​យក​វត្ថុ​ទាំង​ហ្នឹង​ជា​រឿង​សមហេតុ​សមផល​។ តែ​នេះ​គ្មាន​ចំណង​ផ្លូវច្បាប់​ដែល​គ្មាន​ទំនាក់ទំនង​ទទួល​ខុសត្រូវ​តាមផ្លូវ​ច្បាប់​ផង​។ ដូច្នេះ​ការសម្រេច​ដកហូត​របស់​តុលាការ​កំពូល​ពេលនេះ​លោក​ថា ជា​រឿង​មួយ​មិនមែន​ជា​ការអនុវត្ត​ច្បាប់​ទេ​។ តែ​អាច​ទៅ​ជា​រឿង​ដាក់​កំហិត ឬ​ក៏​ដូចជា​ដាក់​កូនក្តី​លោក​ទាំង​ ២ ​នាក់​ឲ្យ​ស្ថិត​នៅ​ក្រោម​ការត្រួតពិនិត្យ​របស់​តុលាការ​ទៅវិញ​។

លោក​មេធាវី​បន្តថា បើ​ផ្អែក​តាម​សាលក្រម​ចាត់​របៀប​របស់​សាលា​ដំបូង​រាជធានី​ភ្នំពេញ​កន្លងមក ដែល​សម្រេច​ឲ្យ​មាន​ការស៊ើបអង្កេត​សំណុំរឿង​កូនក្តី​លោក​ឡើង​វិញ​នោះ លោក​យល់​ថា​លិខិត​ឆ្លងដែន​របស់លោក​ យាង សុធារិន្ទ ​ដែល​តុលាការ​កំពូល​មិន​ប្រគល់​ឲ្យ​កូនក្តី​លោក​វិញ​នោះ​ដូចជា គ្មាន​ផលប្រយោជន៍​អ្វី​សម្រាប់​ការស្រាវជ្រាវ ឬ​ក៏​គ្មាន​ផលប្រយោជន៍​អ្វី​សម្រាប់​ស្វែងរក​ការពិត​ក្នុង​រឿងក្តី​នេះ​ទៀត​ទេ​។

គួររំឭក​ថា លោក​ យាង សុធារិន្ទ និង​លោក​ អ៊ួន ឈិន ត្រូវបាន​សមត្ថកិច្ច​ឃាត់ខ្លួន​អំឡុង​ខែ​វិច្ឆិកា ឆ្នាំ​ ២០១៧៕

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។