ភ្នំពេញៈ តុលាការយោធានៅថ្ងៃអង្គារនេះ បានជំនុំជម្រះអតីតយោធា ២ នាក់ ពាក់ព័ន្ធករណីបង្កើតកម្លាំងប្រដាប់អាវុធខុសច្បាប់ ប្រព្រឹត្តកាលពីឆ្នាំ ២០១៦ ដល់ឆ្នាំ ២០១៨ នៅខេត្តកំពង់ឆ្នាំង កំពង់ស្ពឺ និង នៅរាជធានីភ្នំពេញ ក៏ប៉ុន្តែសាលក្រមនៃសំណុំរឿងនេះត្រូវបានមន្ត្រីតុលាការនេះថា នឹងប្រកាសនៅថ្ងៃទី ៧ ឧសភា ខាងមុខ។
បើតាមលោក តូ វីរៈ ជាមេធាវីម្នាក់ក្នុងចំណោមមេធាវី ២ នាក់បានប្រាប់ថា អង្គសវនាការនេះ មានសមាសភាពចៅក្រម ៣ រូប ដោយមាន លោក ប៉ោក ប៉ន ជាប្រធានក្រមប្រឹក្សាជំនុំជម្រះ និង លោក ម៉ែន ហុង ជាព្រះរាជអាជ្ញារងនិងជាតំណាងអយ្យការផង។
លោក តូ វីរៈ ជាមេធាវី ការពារសិទ្ធិឲ្យជនជាប់ចោទឈ្មោះ សុខ ប៊ុនធឿន អាយុ ៦៤ ឆ្នាំ បានប្រាប់ភ្នំពេញប៉ុស្តិ៍ថា នៅក្នុងអង្គសវនាការកូនក្តីរបស់លោកបានឆ្លើយប្រាប់ចៅក្រមថា គាត់បានស្គាល់គ្នាជាមួយឈ្មោះ រ័ត្ន ច័ន្ទមន្នី អាយុ ៤៧ ឆ្នាំ ជាច្រើនខែ។ លុះដល់ឆ្នាំ ២០១៦ គាត់ត្រូវបានលោក រ័ត្ន ច័ន្ទមន្នី ប្រាប់ថាគេ (រ័ត្ន ច័ន្ទមន្នី) មានបំណងជ្រើសរើសកម្លាំងប្រដាប់អាវុធ ដូច្នេះត្រូវដើររកមនុស្សដើម្បីចូលកងទ័ព ។
លោកបានបន្តថា បន្ទាប់មកកូនក្តីរបស់លោកបានដើរជ្រើសរើសមនុស្សដោយមានយកប្រាក់ផង ដើម្បីរត់ការចូលក្នុងក្របខ័ណ្ឌកងយោធពលខេមរភូមិន្ទ។ បញ្ហានេះមុនដំបូងឡើយជនជាប់ចោទលោក រ័ត្ន ច័ន្ទមន្នី ខំបដិសេធទៅនឹងចម្លើយកូនក្តីរបស់ លោក ប៉ុន្តែដោយមានសាក្សី ២ នាក់ដែលជាពលរដ្ឋចាញ់បោកអស់ប្រាក់ពីការជ្រើសរើសទ័ពនេះឡើងឆ្លើយបញ្ជាក់ប្រាប់ចៅក្រមបន្ថែម និង បង្ហាញភ័ស្ដុតាងទើបឈ្មោះ រ័ត្ន ច័ន្ទមន្នី ទទួលស្គាល់ថា ខ្លួនពិតជាជាប់ពាក់ព័ន្ធនឹងការប្រមូលប្រាក់ពីជនរងគ្រោះមែន។
លោក មេធាវី តូ វីរៈ បញ្ជាក់ប្រាប់ថា ការជ្រើសរើសកងកម្លាំងប្រដាប់អាវុធខុសច្បាប់នេះពួកគេគ្មានក្រុមឬមេកើយច្បាស់លាស់ទេ។ ប៉ុន្តែ ពួកគេមានពាក្យសុំចូលកងទ័ពដោយបញ្ជាក់អំពីប្រវត្តិរូបនិងអត្តចរិករបស់ជនដែលត្រូវជ្រើសរើសនោះ។
លោកបានបញ្ជាក់ថា៖ «ពេលចៅក្រមសួរបញ្ជាក់ មុនដំបូងគាត់ (រ័ត្ន ច័ន្ទមន្នី) បានបដិសេធ តែក្រោយមកគាត់ទទួលស្គាល់ថាគាត់ពិតជាបានទទួលលុយពីឈ្មោះ សុខ ប៊ុនធឿន មែន»។
លោកមេធាវីបានសន្និដ្ឋានក្នុងអង្គសវនាការនេះថា កូនក្តីរបស់លោកមានវ័យចាស់ជរា ហើយមុនឃាត់ខ្លួនគាត់ក៏បានចូលបម្រើយោធាដែរ តាំងពីឆ្នាំ ១៩៧៩ មក។ ដូច្នេះគាត់មានអតីតភាពការងារយូរ ប៉ុន្តែដោយសារមានភាពលោភលន់ពីក្មួយស្រីរបស់គាត់ដែលប្រាប់ថា ឈ្មោះ រ័ត្ន ច័ន្ទមន្នី ជ្រើសរើសមនុស្ស ១១៤ នាក់ ឲ្យចូលបម្រើកងទ័ព ទើបកូនក្តីរបស់លោកដែលមិនបានគិតដិតដល់ក៏មានបញ្ហាទៅ។
លោកថ្លែងថា៖ «កូនក្តីខ្ញុំក៏ជាជនរងគ្រោះដែរ ដូច្នេះខ្ញុំស្នើសុំតុលាការដោះលែងគាត់ឲ្យមានសេរីភាពវិញផង»។
តាមកំណត់ហេតុរបស់តុលាការបង្ហាញថា ជនទាំង ២ នាក់ខាងលើបានប្រព្រឹត្តនៅខេត្ត កំពង់ឆ្នាំង កំពង់ស្ពឺ និង រាជធានីភ្នំពេញ កាលពីអំឡុងឆ្នាំ ២០១៦ ដល់ខែ មិថុនា ឆ្នាំ ២០១៨ ។
បន្ទាប់មកអ្នកទាំង ២ នាក់ ត្រូវបានតុលាការយោធាចោទប្រកាន់ពីបទ «បង្កើតដោយខុសច្បាប់នូវកងកម្លាំងប្រដាប់អាវុធដោយគ្មានសិទ្ធិនិងគ្មានការអនុញ្ញាតពីអាជ្ញាធរស្របច្បាប់» តាមមាត្រា ៤៦៣ នៃក្រមព្រហ្មទណ្ឌ ហើយត្រូវបានតុលាការនេះ ចេញដីកាបង្គាប់ឲ្យឃុំខ្លួនក្នុងពន្ធនាគារយោធា កាលពីថ្ងៃទី ២៩ ខែ ឧសភា ឆ្នាំ ២០១៩។
យ៉ាងណាក្ដី សាលក្រមនៃសំណុំរឿងនេះនឹងប្រកាស នៅថ្ងៃទី ៧ ខែ ឧសភា ខាងមុខ ។ នេះបើតាមលោក ឧត្តមសេនីយ៍ទោ សរ សារ៉េត អ្នកនាំពាក្យនៃតុលាការយោធាបានប្រាប់ភ្នំពេញ ប៉ុស្តិ៍តាមទូរស័ព្ទនៅថ្ងៃអង្គារនេះ ៕