.jpg)
លោក ម៉ៅ ប៊ុនធូរ ត្រូវបានចោទពីបទប៉ុនប៉ងឃាតកម្ម។ រូបថត នគរបាល
សៀមរាបៈ ចៅក្រមស៊ើបសួរសាលាដំបូងខេត្តសៀមរាបបានសម្រេចឃុំខ្លួនបណ្តោះអាសន្ន លោក ម៉ៅ ប៊ុនធូ នាយកទីចាត់ការអន្តរវិស័យនៃសាលាខេត្តកំពង់ធំពាក់ព័ន្ធករណីយកកាំបិតចាក់បំពង់កលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំពីបទប៉ុនប៉ងឃាតកម្ម។
យោងតាមដីកាបង្គាប់ឱ្យឃុំខ្លួនចេញដោយលោក នូ វាសនា ចៅក្រមស៊ើបសួរសាលាដំបូងខេត្តសៀមរាបចុះថ្ងៃទី ១៨ ខែវិច្ឆិកា លើកឡើងថា លោក ម៉ៅ ប៊ុនធូ ត្រូវបានចោទប្រកាន់ពីបទ «ប៉ុនប៉ងឃាតកម្ម» តាមមាត្រា ២៧ និងមាត្រា ១៩៩ នៃក្រមព្រហ្មទណ្ឌប្រព្រឹត្តនៅចំណុចក្នុងភោជនីយដ្ឋានជ្រោះពេជ្រចិន្តាស្ថិតនៅភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែនកាលពីថ្ងៃទី ១៦ ខែ វិច្ឆិកា ឆ្នាំ ២០២០។
បន្ទាប់ពីឃើញដីកាសន្និដ្ឋានសុំឱ្យឃុំខ្លួនបណ្តោះអាសន្នរបស់តំណាងអយ្យការ និងយោងតាមមាត្រាច្បាប់លោក នូ វាសនា បានសម្រេចថា៖ «បញ្ជាឱ្យភ្នាក់ងារមានសមត្ថកិច្ច និងកម្លាំងសាធារណៈធ្វើការនាំខ្លួនជនត្រូវចោទឈ្មោះ ម៉ៅ ប៊ុនធូ ទៅពន្ធនាគារ ឬមណ្ឌលឃុំខ្លួនខេត្តសៀមរាបដោយអនុវត្តឱ្យបានត្រឹមត្រូវតាមនីតិវិធីច្បាប់។ បង្គាប់ឱ្យប្រធានពន្ធនាគារ ឬមណ្ឌលឃុំខ្លួនខេត្តសៀមរាបទទួល និងឃុំជននេះរហូតដល់មានសេចក្តីសម្រេចថ្មីផ្សេងពីនេះ»។
លោក ម៉ៅ ប៊ុនធូ អាយុ ៤១ ឆ្នាំ មានស្រុកកំណើតនៅស្រុកកៀនស្វាយ ខេត្តកណ្តាល និងលំនៅនៅកន្លែងកើតហេតុខាងលើត្រូវបានតំណាងអយ្យការខេត្តសៀមរាបសម្រេចចោទប្រកាន់កាលពីថ្ងៃទី ១៨ វិច្ឆិកា បន្ទាប់ពីលោក កើត រិទ្ធ រដ្ឋមន្ត្រីក្រសួងយុត្តិធម៌បានសម្រេចផ្ទេរសមត្ថកិច្ចសំណុំរឿងប៉ុនប៉ងឃាតកម្មនេះពីអយ្យការអមសាលាដំបូងខេត្តកំពង់ធំទៅអយ្យការអមសាលាដំបូងខេត្តសៀមរាបវិញ។
លោក កើត រិទ្ធ បញ្ជាក់ថា ការផ្ទេរសមត្ថកិច្ចតុលាការនេះគឺដើម្បីធានាប្រយោជន៍សាធារណៈ និងដំណើរការល្អនៃយុត្តិធម៌តុលាការ និងដោយអនុវត្តតាមមាត្រា ១៩ នៃច្បាប់ស្តីពីការរៀបចំអង្គការតុលាការ។
លោក សាយ វាសនា បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៧ វិច្ឆិកា ថា ក្នុងពេលកើតហេតុលោករួមជាមួយមន្ដ្រី កងរាជអាវុធហត្ថខេត្ត និងមិត្ដភក្ដិមួយចំនួនទៀតកំពុងហូបអាហារជុំគ្នានៅភោជនីយដ្ឋានដែលជាកន្លែងកើតហេតុនោះ។ លោកបន្តថា រហូតដល់ម៉ោងប្រហែលជាង ៩ យប់ ជនត្រូវចោទ ប្រដាប់ដោយកាំបិតចុងស្រួចពណ៌សប្រវែងប្រហែល ៤ តឹក លាក់ទុកក្នុងដៃដើរចូលក្នុងបន្ទប់ជាប់គ្នា។
លោក វាសនា ឱ្យដឹងទៀតថា៖ «បន្ទាប់មកលោក ម៉ៅ ប៊ុនធូ បានដើរមកកៀកខ្ញុំ ហើយទាញកាំបិតចាក់សំដៅបំពង់ករបស់ខ្ញុំ ប៉ុន្ដែត្រូវខ្ញុំរងជាប់មិនបណ្ដាលឱ្យរងរបួសឡើយ»។
តាមរបាយការណ៍របស់សមត្ថកិច្ច ជនត្រូវចោទ និងជនរងគ្រោះអាចមានគំនុំគ្នាដោយហេតុថា លោក សាយ វាសនា បានទទួលបន្ទុកក្នុងសំណុំរឿងជនត្រូវចោទរូបនេះបានដឹកនាំកម្លាំងគ្មានបញ្ជាពីព្រះរាជអាជ្ញាចុះទៅចាប់គ្រឿងចក្ររបស់ឈ្មោះ ជុត ថាន ដែលមានច្បាប់អនុញ្ញាតត្រឹមត្រូវពីអភិបាលខេត្ត និងមន្ទីរជំនាញពាក់ព័ន្ធដោយទាំងខ្លួនមិនមានសម្បទាជាមន្ត្រីនគរបាលយុត្តិធម៌។
កំណត់ហេតុដដែលបានបន្តថា ក្នុងហេតុការណ៍នោះជនត្រូវចោទស្នើសុំឱ្យលោក សាយ វាសនា កុំចាត់ការរឿងនេះ ប៉ុន្តែលោក សាយ វាសនា បានអនុវត្តនីតិវិធីច្បាប់ ដោយសារថាឈ្មោះ ជុត ថាន មិនព្រមចរចា៕
