កណ្ដាល: សាលាដំបូងខេត្តកណ្ដាលបានសម្រេចឃុំខ្លួនជនសង្ស័យម្នាក់នៅពន្ធនាគារខេត្តដោយចោទពីបទ «ក្លែងបន្លំឯកសារសាធារណៈ» បន្ទាប់ពីសមត្ថកិច្ចឃាត់ខ្លួនពីថ្ងៃទី ២ ខែកក្កដា ពាក់ព័ន្ធការបន្លំត្រាមេឃុំទៅបោកប្រាស់ពលរដ្ឋ ដើម្បីដាក់បញ្ចាំទ្រព្យសម្បត្តិ និងធ្វើលិខិតខ្ចីលុយពីធនាគារចំនួន ៣ ម៉ឺនដុល្លារនៅភូមិធំ ឃុំភូមិធំ ស្រុកកៀនស្វាយ ខេត្តកណ្តាល។
លោក ទិន សុចិត្រា ព្រះរាជអាជ្ញារង និងជាអ្នកនាំពាក្យសាលាដំបូងខេត្តកណ្ដាលបានថ្លែងកាលពីថ្ងៃទី ៥ មិថុនា ថា ចៅក្រមស៊ើបសួរនៃសាលាដំបូងខេត្តកណ្ដាលនៅថ្ងៃទី ៥ ខែកក្កដា បានសម្រេចឃុំខ្លួនជនសង្ស័យម្នាក់ឈ្មោះ ម៉ៃ វណ្ណៈ ភេទប្រុសអាយុ ៣១ ឆ្នាំ ជនជាតិខ្មែរមុខរបរបុគ្គលិកធនាគារ រស់នៅក្នុងភូមិធំ ឃុំភូមិធំ ស្រុកកៀនស្វាយ ខេត្តកណ្តាល។
លោកបញ្ជាក់ថា៖ «យើងឃុំខ្លួនគាត់ហើយគឺចោទពីបទក្លែងបន្លំឯកសារសាធារណៈ ប៉ុន្ដែខ្ញុំអត់ចាំមាត្រាទេ ព្រោះម្សិលមិញជាថ្ងៃសម្រាក អ៊ីចឹងខ្ញុំអត់មានឯកសារមើល។ ខ្ញុំគ្រាន់តែដឹងថាលោកចៅក្រមបានឃុំខ្លួនហើយ...»។
លោក វង សែ អធិការរងនគរបាលស្រុកកៀនស្វាយបានថ្លែងពីថ្ងៃ ៥ មិថុនា ថា មន្ត្រីនគរបាលបានឃាត់ខ្លួនឈ្មោះ ម៉ៃ វណ្ណៈ កាលពីថ្ងៃទី ២ ខែកក្កដា ក្រោយពីលោក មាន ណាត មេឃុំភូមិធំ ប្ដឹងពីករណីបន្លំត្រាមេឃុំទៅបោកប្រាស់ពលរដ្ឋ។
លោកបន្តថា ក្រោយពីនគរបាលប៉ុស្តិ៍រដ្ឋបាលឃុំ ទទួលព័ត៌មានពីករណីមានគេបន្លំធ្វើលិខិតផ្ទេរសិទ្ធិកាន់កាប់ ប្រើប្រាស់ដីធ្លី និងផ្ទះសម្បែងមានទាំងឈ្មោះហត្ថលេខា និងត្រាក្លែងក្លាយភ្លាមគឺមន្ត្រីនគរបាលប៉ុស្តិ៍ឃុំភូមិធំបានសហការជាមួយមន្ត្រីនគរបាលយុត្តិធម៌ស្រុកកៀនស្វាយកោះហៅជនសង្ស័យមកសាកសួរនៅប៉ុស្តិ៍នគរបាលរដ្ឋបាលឃុំភូមិធំ និងឃាត់ខ្លួនតែម្ដង។
លោកបញ្ជាក់ថា៖ «យើងបានបញ្ជូនខ្លួនទៅតុលាការខេត្តកណ្ដាលនៅថ្ងៃទី ៤ ខែកក្កដា ប៉ុន្ដែខ្ញុំមិនទាន់ដឹងតុលាការគេសម្រេចបែបណាទេ។ រឿងនេះ យើងបានសាកសួរគាត់ហើយគឺគាត់ជួលគេធ្វើត្រាក្លែងក្លាយ យកមកធ្វើលិខិតខ្លួនគាត់ បោះត្រាខ្លួនគាត់ ស៊ីញ៉េខ្លួនគាត់ហើយទៅខ្ចីលុយពីធនាគារ។ ខ្ញុំយល់ថា រឿងនេះមិនពិបាកទេ ព្រោះគាត់ជាអ្នកធ្វើការនៅធនាគារស្រាប់ អ៊ីចឹងគាត់យល់កិច្ចការអស់ហ្នឹងច្បាស់ហើយ»។
លោក មាន ណាត មេឃុំភូមិធំ មិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។
តាមរបាយការណ៍របស់ស្នងការដ្ឋាននគរបាលខេត្តកណ្ដាលបានឲ្យដឹងនៅថ្ងៃទី ៣ ខែកក្កដា ថា ជនសង្ស័យបានឆបោកពលរដ្ឋ ២ នាក់ ក្នុងនោះឈ្មោះ មៀច ផៃ អាយុ ៦៧ ឆ្នាំ មុខរបរជំទប់ទី ១ មានលំនៅក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល និងឈ្មោះ ឡាងថុល អាយុ ៦៧ ឆ្នាំ មុខរបរមេភូមិមានលំនៅក្នុងភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល។
របាយការណ៍បន្ថែមថា នៅចំពោះមុខសមត្ថកិច្ចជនសង្ស័យឈ្មោះ ម៉ៃ វណ្ណៈ បានសារភាពថា ខ្លួនបានឆាត [Chat] ទៅកន្លែងឆ្លាក់ត្រាតាមរយៈ Facebook ឲ្យធ្វើត្រាឃុំភូមិធំ និងត្រាឈ្មោះឲ្យខ្លួនក្នុងតម្លៃ ២០ ដុល្លារ ដោយផ្ញើលុយតាមធនាគារ ហើយ ១ សប្ដាហ៍ក្រោយមកទើបអ្នកឆ្លាក់ត្រាជួលឲ្យម៉ូតូឌុបយកមកឲ្យខ្លួន។
ក្រោយទទួលបានត្រា (មូល) រួចខ្លួនក៏រៀបចំឯកសារក្លែងលើលិខិតផ្ទេរសិទ្ធិកាន់កាប់ប្រើប្រាស់ដីធ្លី និងផ្ទះសម្បែងដើម្បីយកទៅដាក់នៅធនាគារខ្ចីប្រាក់ ៣ ម៉ឺនដុល្លារ ដើម្បីយកមកប្រកបមុខរបរផ្សេងទៀត។ ប៉ុន្ដែលោកមេឃុំភូមិធំមានការសង្ស័យហើយបានប្ដឹងសមត្ថកិច្ចឲ្យឃាត់ខ្លួនតែម្ដង៕