.jpg)
បុរសម្នាក់ត្រូវបានសមត្ថកិច្ចឃាត់ខ្លួន ករណីរំលោភកូនស្រីបង្កើតបានសម្រេចជាច្រើនដង ចាប់តាំងពីយប់ថ្ងៃទី ១៦ ខែមីនា រហូតដល់យប់ថ្ងៃទី ៦ ខែឧសភា ឆ្នាំ ២០២១។ រូបថត ប៉ូលិស
ភ្នំពេញៈ បុរសជាមេភូមិម្នាក់ត្រូវបានតុលាការរាជធានីភ្នំពេញសម្រេចឃុំខ្លួនដាក់ពន្ធនាគារនៅថ្ងៃនេះពាក់ព័ន្ធករណីចាប់បង្ខំរំលោភសេពសន្ថវៈលើកូនស្រីបង្កើតបានសម្រេចជាច្រើនដង ប្រព្រឹត្តនៅផ្ទះក្នុងភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
លោក ជា សុវណ្ណ អធិការរងខណ្ឌពោធិ៍សែនជ័យទទួលបន្ទុកផ្នែកព្រហ្មទណ្ឌ បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៩ ខែឧសភានេះថាបុរសសង្ស័យឈ្មោះ ប៊ិន ផាត អាយុ ៥៦ ឆ្នាំជាប្រធានភូមិខ្វែនៃសង្កាត់ត្រពាំងក្រសាំង ខណ្ឌពោធិ៍សែន ។ ជននេះត្រូវបានឃាត់ខ្លួនភ្លាមៗតាមបណ្ដឹងរបស់ជនរងគ្រោះកាលពីយប់ថ្ងៃទី ៦ ខែឧសភា ក្រោយពីគាត់បានធ្វើសកម្មភាពចាប់បង្ខំរំលោភសេពសន្ថវៈលើកូនស្រីបង្កើតវ័យ ២២ ឆ្នាំ ដែលជាស្ត្រីមានប្ដីទៅហើយនោះ។
លោក សុវណ្ណ បានបញ្ជាក់ថា៖ «តាមបណ្ដឹងរបស់ស្ត្រីរងគ្រោះជាកូន ជនសង្ស័យដែលជាឪពុកបង្កើតរបស់នាងបានចាប់បង្ខំរំលោភសេពសន្ថវៈលើរាងកាយរបស់នាងរហូតសម្រេចជាច្រើនដង នៅក្នុងបន្ទប់ទឹកខាងក្រោយផ្ទះ គឺចាប់តាំងពីយប់ថ្ងៃទី ១៦ ខែមីនា រហូតដល់យប់ថ្ងៃទី ៦ ខែឧសភា ឆ្នាំ ២០២១។
លោកថា តាមរយៈការរៀបរាប់របស់នាងក្នុងពាក្យបណ្ដឹងគឺគ្រប់ពេលដែលជនសង្ស័យរូបនេះចាប់បង្ខំរំលោភសេពសន្ថវៈលើរាងកាយនាងម្ដងៗគឺឪពុកនាងតែងតែ «គំរាមកំហែងថានឹងសម្លាប់» ប្រសិនបើនាងហ៊ានប្រាប់ម្ដាយ និងប្ដីព្រមទាំងប្អូនៗរបស់នាងណាម្នាក់ឲ្យបានដឹងអំពីរឿងនេះ។
លោកបានស្រង់យកសម្ដីរបស់ស្ត្រីរងគ្រោះមកបញ្ជាក់ទៀតថា៖ «១ លើកជា ២ លើកខ្ញុំស៊ូអត់ទ្រាំ ព្រោះខ្លាចប្ដី និងអ្នកជិតខាងដឹងរឿងដ៏អាស្រូវនេះ គេមាក់ងាយដល់ក្រុមគ្រួសារខ្ញុំ ហើយសង្ឃឹមថាឪពុករបស់ខ្ញុំ ដែលគាត់ជាមេភូមិផងនេះមានការកែប្រែកំហុសឆ្គងរបស់គាត់។ ប៉ុន្តែថ្ងៃបន្តបន្ទាប់មកទៀតគឺចន្លោះ ៣-៤ ថ្ងៃម្ដង គឺគាត់តែងតែលបលួចចូលទៅចាប់រំលោភខ្ញុំនៅក្នុងបន្ទប់ទឹកនោះដោយពោលពាក្យគំរាមសម្លាប់»។
លោកថា ស្ត្រីរងគ្រោះបានបញ្ជាក់នៅក្នុងពាក្យបណ្ដឹងទៀតថា៖ «នៅយប់ថ្ងៃទី ៦ ខែឧសភា ឆ្នាំ ២០២១ ខ្ញុំបានសម្រេចចិត្តកាត់ភាពខ្មាសអៀន ហើយប្រថុយនឹងការគំរាមសម្លាប់របស់គាត់ ដោយស្រែកប្រាប់ម្ដាយខ្ញុំ និងអ្នកជិតខាងឲ្យបានដឹង និងជួយអន្តរាគមន៍ចាប់ខ្លួនគាត់ទៅអប់រំណែនាំតាមនីតិវិធីច្បាប់ដែលបានកំណត់»។
បើតាមលោក សុវណ្ណ ក្រោយចាប់ខ្លួនយកទៅសួរនាំ ជនសង្ស័យមុនដំបូងបានឆ្លើយដោះសាថា មកពីខ្លួនស្រវឹងស្រា ហើយច្រឡំស្ត្រីរងគ្រោះជាកូនថាជាប្រពន្ធរបស់ខ្លួន ព្រោះពេលយប់ងងឹតមើលមិនច្បាស់។ លុះបន្ទាប់មកជនសង្ស័យក៏បានសារភាព និងបានសុំការអធ្យាស្រ័យពីប្រពន្ធ និងកូនស្រី។
លោកបានបញ្ជាក់ថា៖ «ជនសង្ស័យត្រូវបានបញ្ជូនទៅកាន់តុលាការនៅព្រឹកថ្ងៃទី ៩ ខែឧសភាឆ្នាំ ២០២១ ហើយនៅរសៀលថ្ងៃដដែលនេះ តុលាការបានសម្រេចឃុំខ្លួនជនសង្ស័យដាក់ពន្ធនាគារព្រៃសជាបណ្ដោះអាសន្នដោយចោទប្រកាន់ពីបទរំលោភសេពសន្ថវៈមានស្ថានទម្ងន់ទោសតាមបញ្ញត្តិមាត្រា ២៤១ នៃក្រមព្រហ្មទណ្ឌ»។
យោងតាមបទចោទ និងមាត្រា ២៤១ នៃក្រមព្រហ្មទណ្ឌនេះ ជនសង្ស័យនឹងត្រូវប្រឈមការផ្ដន្ទាទោសឲ្យជាប់ពន្ធនាគារពី ៧ ឆ្នាំដល់ ១៥ ឆ្នាំ ៕
