សៀមរាបៈ ចៅក្រមស៊ើបសួរសាលាដំបូងខេត្តសៀមរាបបានសម្រេចចោទប្រកាន់ និងឃុំខ្លួន យុវជនចំនួន ៦ នាក់នៅពន្ធនាគារខេត្តហើយកាលពីថ្ងៃទី ២៣ ខែសីហាពាក់ព័ន្ធជម្លោះកាប់គ្នាស្លាប់ម្នាក់ ប្រព្រឹត្តនៅផ្លូវ ៦០ សង្កាត់ស្លក្រាមកាលពីថ្ងៃទី ១៩ សីហា។
លោក យិន ស្រាង អ្នកនាំពាក្យសាលាដំបូងខេត្តសៀមរាបប្រាប់ភ្នំពេញ-ប៉ុស្តិ៍ពីម្សិលមិញថា ករណីយុវជនទាំង ៦ នាក់ដែលពាក់ព័ន្ធនឹងការកាប់យុវជនម្នាក់ស្លាប់ត្រូវបានចៅក្រមស៊ើបសួរសាលាដំបូងខេត្តសៀមរាបបញ្ជូនទៅឃុំនៅពន្ធនាគារហើយនៅថ្ងៃទី ២៣ សីហា។
លោកបញ្ជាក់ថា៖ «ជនទាំង ៦ នាក់ត្រូវចោទពីបទឃាតកម្មគិតទុកជាមុន តាមបញ្ញត្តិមាត្រា ២០០ នៃក្រមព្រហ្មទណ្ឌ។ ពួកគេត្រូវចោទប្រកាន់ដោយលោកចៅក្រម អ៊ុង ចាន់ថុល»។
បើយោងតាមមាត្រា ២០០ នៃក្រមព្រហ្មទណ្ឌ បើសិនជាតុលាការរកឃើញថា ក្រុមយុវជនទាំង ៦ នាក់នោះពិតជាបានប្រព្រឹត្តបទល្មើសមែននោះអាចនឹងត្រូវជាប់ពន្ធនាគាររហូតដល់មួយជីវិត។
លោកវរសេនីយ៍ឯក ថា ដាលុច មេបញ្ជាការរងទទួលផែនយុត្តិធម៌នៃកងរាជអាវុធហត្ថខេត្តសៀមរាបបានឲ្យដឹងពីម្សិលមិញថា ជនសង្ស័យទាំង ៦ នាក់ដែលសុទ្ធតែភេទប្រុស ទី១- ឈ្មោះ សឿន សាន់ អាយុ ១៩ ឆ្នាំ គ្មានមុខរបរ និងមានលំនៅភូមិអញ្ចាញ សង្កាត់នគរធំ ក្រុង-ខេត្តសៀមរាប ជាជនដៃដល់។ ទី២- សយ ណុប ហៅ អាស្បែកជ្រូក អាយុ ២១ ឆ្នាំ ជាកម្មករសំណង់ ស្នាក់នៅបន្ទប់ជួលភូមិបន្ទាយចាស់ សង្កាត់ស្លក្រាម (អ្នកបើកម៉ូតូដឹកជនដៃដល់)។ ទី៣- សឿន ឡង់ឌី អាយុ ១៨ ឆ្នាំ ជាកម្មករលក់ស្បែកជ្រូកបំពង រស់នៅភូមិតាវៀន សង្កាត់សាលាកំរើក ក្រុងខេត្តសៀមរាប។ ទី៤- បូរី សីហា អាយុ ២០ ឆ្នាំ ជាកម្មករ ស្នាក់នៅបន្ទប់ជួលក្នុងភូមិខ្នារ សង្កាត់ជ្រាវ ក្រុង-ខេត្តសៀមរាប។ ទី៥- ខន ឃីម ហៅ ភ័ក្រ អាយុ ១៨ ឆ្នាំ គ្មានមុខរបររស់នៅភូមិដំរីឆ្លង ឃុំឫស្សីលក ស្រុកជីក្រែង ជាមិត្តភក្ដិរបស់ជនដៃដល់ និងទី៦- ហ៊ុល សំអូន ហៅពៅ អាយុ ១៧ ឆ្នាំ ជាកម្មករដាក់ឆត្រនៅផ្សារលើមានលំនៅក្នុងភូមិដកពោធិ៍ សង្កាត់ស្វាយដង្គំ ក្រុង-ខេត្តសៀមរាប។
លោកបញ្ជាក់ថា៖ «ជនទាំងអស់នេះបានប្រព្រឹត្តបទល្មើសជាក់ស្តែងកាប់សម្លាប់ជនរងគ្រោះហើយសមត្ថកិច្ចនឹងស្រាវជ្រាវរកអ្នកពាក់ព័ន្ធបន្តទៀតក្នុងចំណោមអ្នកត្រូវចាប់ខ្លួន»។
បើតាមលោក ដាលុច ហេតុការណ៍នេះបានកើតឡើងកាលពីវេលាម៉ោង ៩ កន្លះយប់ថ្ងៃទី ១៩ ខែសីហា នៅ ត្រង់ចំណុចមុខសណ្ឋាគារសុខាសៀមរាប ផ្លូវ ៦០ ស្ថិតក្នុងភូមិទ្រាំង សង្កាត់ស្លក្រាម ក្រុង-ខេត្តសៀមរាប។
ក្រុមជនសង្ស័យមានគ្នាប្រមាណជាង ១០ នាក់បានប្រើប្រាស់ម៉ូតូប្រហែល ៨ គ្រឿងបានធ្វើសកម្មភាពកាប់ទៅលើជនរងគ្រោះមួយក្រុមដែលមានគ្នា ៥ នាក់ជិះម៉ូតូចំនួន ៣ គ្រឿង។ យុវជនរងគ្រោះដែលសុទ្ធតែភេទប្រុសដែរនោះ មានឈ្មោះទី១- ឆាត មុត អាយុ ១៨ ឆ្នាំ ជាជាងឈើ រស់នៅភូមិសួង ឃុំត្រពាំងធំ ស្រុកប្រាសាទបាគង ត្រូវជនសង្ស័យឈ្មោះ សឿន សាន់ ប្រើដាវកាប់ចំកញ្ចឹងក បណ្តាលឲ្យស្លាប់ភ្លាមៗនៅនឹងកន្លែងកើតហេតុ ទី២- ចៅ ចាម អាយុ ២០ ឆ្នាំ ត្រូវក្រុមជនសង្ស័យកាប់ចំក្បាល និងដៃបណ្តាលឲ្យរងរបួសធ្ងន់។ ចំណែកឯយុវជន ៣ នាក់ទៀតត្រូវរបួសស្រាលម្នាក់ និង ២ នាក់ទៀតគ្មានត្រូវរបួសទេ។
លោកបន្តថា បន្ទាប់ពីកើតហេតុ និងបន្ទាប់ពីទទួលបានបណ្តឹងពីក្រុមជនរងគ្រោះ កម្លាំងកងរាជអាវុធហត្ថខេត្តសៀមរាបបានបើកការស្រាវជ្រាវ រហូតដល់ថ្ងៃទី ២១ សីហា ២០២០ ទើបសមត្ថកិច្ចបានកំណត់មុខសញ្ញាជនសង្ស័យបាន ហើយក៏ស្នើសុំការសម្របសម្រួលផ្នែកផ្លូវច្បាប់ពីព្រះរាជអាជ្ញាអមសាលាដំបូងខេត្តសៀមរាប និងបានចុះឃាត់ខ្លួនជនសង្ស័យបានទាំង ៦ នាក់តែម្តង។
លោក ថា ដាលុច បានឲ្យដឹងទៀតថា តាមរយៈការសួរចម្លើយ ក្រុមជនសង្ស័យទាំង ៦ នាក់បានសារភាពថា ករណីនេះពួកគេពិតជាបានប្រព្រឹត្តដោយកាប់ទៅលើជនរងគ្រោះមែនដោយមូលហេតុថា កាលពីថ្ងៃទី ១៨ ខែសីហា ឆ្នាំ ២០២០ ពួកគេធ្លាប់មានទំនាស់ជាមួយភាគីក្រុមជនរងគ្រោះ ហើយរហូតដល់យប់ថ្ងៃទី ១៩ ខែសីហា ក៏ធ្វើសកម្មភាពកាប់ទៅលើក្រុមជនរងគ្រោះតែម្ដង។
បើតាមលោក ថា ដាលុច ចំពោះវត្ថុតាងដែលពាក់ព័ន្ធនឹងអំពើឃាតកម្មនេះរួមមាន ដាវចំនួន ៣ ដើម ប្រវែង ០,៧០ ម៉ែត្រ ម៉ូតូចំនួន ៤ គ្រឿង កាំភ្លើងខ្យល់ ចំនួន ១ ដើម និងខោអាវសម្រាប់ពាក់ពេលធ្វើសកម្មភាពចំនួន ២ កំប្លេ។
មិនមានប្រភពទាក់ទងទៅឪពុកម្តាយជនរងគ្រោះ និងឪពុកម្តាយជនសង្ស័យដើម្បីសុំអត្ថាធិប្បាយលើបញ្ហានេះបានទេពីម្សិលមិញ៕