.jpg)
ក្រុមជនជាតិវៀតណាម ដែលឆ្លងដែនខុសច្បាប់ និងឈូសឆាយដីព្រៃក្នុងទឹកដីប្រទេស កម្ពុជា។ សហការី
រតនគិរីៈ ជនជាតិវៀតណាម ១២ នាក់ ត្រូវបានតុលាការខេត្តរតនគិរីបញ្ជូនទៅឃុំខ្លួននៅពន្ធនាគារភ្នំស្វាយជាបណ្ដោះអាសន្នដោយជាប់ចោទពីបទឆ្លងដែន និងឈូសឆាយដីព្រៃក្នុងទឹកដីប្រទេស កម្ពុជា ដោយខុសច្បាប់។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី បានប្រាប់ភ្នំពេញ ប៉ុស្តិ៍ កាលពីម្សិលមិញថា នៅថ្ងៃទី ១៦ ខែ មេសា ឆ្នាំ ២០១៨ កម្លាំងប្រតិបត្តិការ ស្រាវជ្រាវនិងទប់ស្កាត់បទល្មើសធនធានធម្មជាតិ ក្នុងតំបន់ឧទ្យានជាតិវរជ័យ បានប្រទះឃើញនិងឃាត់ខ្លួនជនជាតិវៀតណាមមួយក្រុមមានគ្នា ១២ នាក់ និងរឹបអូសគ្រឿងចក្រចំនួន ៦ គ្រឿង ក្រោយពីពួកគេបានធ្វើសកម្មភាពឈូសឆាយដីព្រៃនៅចំណុចអូរតាយ៉ាក ស្ថិតក្នុងឃុំតាវែងលើ ស្រុកតាវែង ខេត្តរតនគិរី នៃប្រទេស កម្ពុជា ដោយខុសច្បាប់។
ជនជាតិវៀតណាមទាំងនោះត្រូវបានប្រគល់ទៅឲ្យសមត្ថកិច្ចនគរបាលអន្តោប្រវេសន៍ចាត់ការបន្តតាមនីតិវិធី ហើយពួកគេត្រូវបានក្រុមមន្ត្រីនគរបាលអន្តោប្រវេសន៍ កសាងសំណុំរឿងបញ្ជូនទៅតុលាការខេត្តរតនគិរីផងដែរ។
លោក ជា ពេជ្រ ព្រះរាជអាជ្ញាអមសាលាដំបូងខេត្តរតនគិរី បានប្រាប់ភ្នំពេញប៉ុស្តិ៍នៅថ្ងៃអាទិត្យថា សំណុំរឿងនេះបានមកដល់ដៃតុលាការហើយ និងកំពុងស៊ើបសួរបន្តដោយចៅក្រមស៊ើបសួរ។
លោកចៅក្រមស៊ើបសួរ ឡេង វណ្ណារិទ្ធ សម្រេចចោទប្រកាន់ក្នុងម្នាក់ៗ ២ ករណី គឺបទ «លួចឆ្លងដែនដោយគ្មានលិខិតអនុញ្ញាត» និងបទ «នាំគ្រឿងចក្រចូលមកឈូសឆាយដីព្រៃយកធ្វើជាកម្មសិទ្ធិ»។
លោក អ៊ុក គឹមជន់ ប្រធានពន្ធនាគារភ្នំស្វាយខេត្តរតនគិរី បានអះអាងថា ជនសង្ស័យ ទាំង ១២ នាក់នោះ ត្រូវបានបញ្ជូនទៅដល់ពន្ធនាគារភ្នំស្វាយខេត្តរតនគិរីហើយ៕
