សៀមរាបៈ សាលាដំបូងខេត្តសៀមរាប សម្រេចចេញដីកាឃុំខ្លួនលោក ឌីម សួនណាត អគ្គនាយកក្រុមហ៊ុន Enarita ជុំវិញបទឆបោក ក្រោយឃាត់ខ្លួនសួរនាំកាលពីសប្តាហ៍មុន បន្ទាប់ពីមានពាក្យបណ្តឹងពីប្រជាពលរដ្ឋជាង ១០ រាជធានី-ខេត្ត លើទឹកប្រាក់រាប់លានដុល្លារ តាមរយៈការដាក់ទុនវិនិយោគ។
ដីកាបង្គាប់ឲ្យឃុំខ្លួន ចេញដោយចៅក្រមស៊ើបសួរ លោក ជូ លឹមហ៊ាង ចុះថ្ងៃទី ២១ កក្កដា បានលើកឡើងថា ដើម្បីធានាការស៊ើបសួរឲ្យបានល្អ បង្គាប់ឲ្យឃុំខ្លួន ឈ្មោះ ឌីម សួនណាត ដែលជាអគ្គនាយកក្រុមហ៊ុន Enarita Development Co.Ltd អាយុ ៣៦ ឆ្នាំ រស់នៅផ្ទះលេខ ៣៤ ផ្លូវលេខ ១០០៧ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ ដែលត្រូវបានឃាត់ខ្លួន កាលពីថ្ងៃទី ១៨ ខែកក្កដា។
ដីកាដដែល បានបញ្ជាក់ថា៖ «បង្គាប់ឲ្យប្រធានមន្ទីរឃុំឃាំងខេត្តសៀមរាប ទទួល និងឃុំខ្លួនឈ្មោះនេះ បណ្តោះអាសន្នឲ្យបានសម្រេច រហូតដល់មានបញ្ជាថ្មីសម្រេចផ្សេងពីនេះ»។
តាមដីកាឃុំខ្លួនរបស់សាលាដំបូងខេត្តសៀមរាប បានឲ្យដឹងថា ជនសង្ស័យរូបនេះ ត្រូវបានដាក់ឲ្យស្ថិតក្រោមការត្រួតពិនិត្យ ពីបទឆបោក ដោយមានស្ថានទម្ងន់ទោស និងមិនបំពេញកាតព្វកិច្ចចំពោះឧបករណ៍ដែលអាចជួញដូរបាន តាមមាត្រា ៣៧៧ និង ៣៨០ នៃក្រមព្រហ្មទណ្ឌ និងមាត្រា ២៣១ នៃច្បាប់ស្តីពីឧបករណ៍អាចជួញដូបាន និងប្រតិបត្តិការទូទាត់សាច់ប្រាក់ ប្រព្រឹត្ត កាលពីអំឡុងឆ្នាំ ២០១៩ ដល់បច្ចុប្បន្ន នៅក្នុង ក្រុង រាជធានី ខេត្ត ជាង ១០ ដូចជា សៀមរាប កំពង់ចាម ក្រចេះ កំពង់ស្ពឺ ប៉ៃលិន ព្រះវិហារ និងខេត្ត បន្ទាយមានជ័យជាដើម។
លោក ឌីម សួនណាត ត្រូវបានលោក ថេង សំណាង ព្រះរាជអាជ្ញារង អមសាលាដំបូងខេត្តសៀមរាប សម្រេចចោទប្រកាន់ និងត្រូវបានបញ្ជូនទៅចៅក្រមស៊ើបសួរ កាលពីថ្ងៃអាទិត្យ។
មេធាវីរបស់ជនសង្ស័យ ឌីម សួនណាត ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ពីម្សិលមិញថា នឹងព្យាយាមស្វែងរកភ័ស្តុតាង ដើម្បីដោះបន្ទុកកូនក្តីខ្លួន ឲ្យរួចពីកាលពីចោទប្រកាន់នេះ។ ប៉ុន្តែមិនអាចធ្វើការសន្និដ្ឋានបានដែរថា មានដើមបណ្តឹង និងមានទឹកប្រាក់ប៉ុន្មាន ដែលជាប់ពាក់ព័ន្ធក្នុងករណីនេះ ព្រោះមិនទាន់ទទួលបានពាក្យបណ្តឹងណាមួយដែលប្តឹងពីកូនក្តីរបស់លោកនោះទេ។
លោកមេធាវីរូបនេះបានឲ្យដឹងថា៖ «យើងនឹងស្វែងរកភ័ស្តុតាងដោះបន្ទុក ហើយនឹងរកភាពស្អាតស្អំជូនគាត់។ យើងនឹងធ្វើការស្រាវជ្រាវបន្ត»។
យោងតាមការអះអាងរបស់បុគ្គលិកផ្នែករដ្ឋបាលនៃក្រុមហ៊ុន Enarita Development Co.Ltd ដែលសុំមិនបញ្ចេញឈ្មោះបានឲ្យដឹងថា ក្រុមហ៊ុននេះមានបុត្រសម្ព័ន្ធចំនួន ៧ ទូទាំងប្រទេស និងវិនិយោគលើវិស័យជាច្រើន ដូចជាវិនិយោគលើដី លើហាងកាហ្វេ វិនិយោគលើទឹកសុទ្ធ និងក្នុងវិស័យអប់រំជាដើម ដែលមានសាខាធំនៅរាជធានីភ្នំពេញ និងខេត្តសៀមរាប និងតាមបណ្តាខេត្ត មានប្រធានផ្នែកទីផ្សារគ្រប់គ្រងបន្ត។
បុគ្គលិករូបនេះ បានអះអាងថា កន្លងទៅ ក្រុមហ៊ុន ទទួលប្រាក់វិនិយោគពីអតិថិជន ដោយផ្តល់ឲ្យនូវការប្រាក់ខ្ពស់ ហើយក្រុមហ៊ុន តែងតែផ្តល់ជូនអតិថិជន មិនដែលខកខាននោះទេ ប៉ុន្តែដោយសារមួយរយៈចុងក្រោយនេះ ក្រុមហ៊ុនមានបញ្ហាផ្នែកហិរញ្ញវត្ថុ ដោយមិនអាចបង្វិលលុយជូនអតិថិជនទាន់ពេល ដូច្នេះ ក៏បានជូនដំណឹងដល់អតិថិជនផងដែរ និងបានព្យាយាមទូទាត់ប្រាក់តាមដែលអាចធ្វើបាន ដោយមិនមានចេតនាគេចវេះនោះទេ។
បុគ្គលិករូបនេះបានបញ្ជាក់ថា៖ «អ្នកមួយចំនួនដែលប្តឹងហ្នឹង គាត់ចង់យកលុយគាត់ទាំងអស់ភ្លាមៗ ដែលធ្វើឲ្យយើងបង្វែរសាច់ប្រាក់មិនទាន់ បើសិនជាគាត់ (អគ្គនាយក) មានចេតនាឆបោក គាត់មិននៅរហូតដល់ថ្ងៃហ្នឹងទេ គាត់រត់បាត់ហើយ ព្រោះគាត់មានចេតនា ដោះស្រាយដល់ទីបញ្ចប់ ប៉ុន្តែដោយសារមានជនមួយក្តាប់តូចបង្កបញ្ហា»។
បុគ្គលិករូបនេះ បានឲ្យដឹងថា ដោយសារតែក្រុមហ៊ុនមានប្រធានទីផ្សារ បន្តការគ្រប់គ្រងនៅតាមបណ្តាខេត្ត ដូច្នេះពួកគេដែលជាប្រធានទីផ្សារមួយចំនួន មានចេតនាមិនល្អ ហើយបានឆបោកអតិថិជន ធ្វើឯកសារក្លែងក្លាយ និងប្រមូលលុយដាក់ក្នុងហោប៉ៅខ្លួនឯង ដោយមិនបានបញ្ចូនមកក្រុមហ៊ុននោះទេ។ ដូច្នេះហើយទើបមានបញ្ហាប្តឹងអគ្គនាយកក្រុមហ៊ុនតែម្តង៕