កំពង់ស្ពឺៈ ជនសង្ស័យម្នាក់ដែលកាប់ក្មេងស្លាប់នៅភូមិអំពិលផ្អែម ឃុំរលាំងចក ស្រុកសំរោងទង ខេត្តកំពង់ស្ពឺ កាលពីថ្ងៃទី ១៤ ខែមីនា ត្រូវបានចៅក្រមស៊ើបសួរចេញដីកាឃុំក្នុងពន្ធនាគារខេត្តហើយកាលពីថ្ងៃទី១៦ មីនា បន្ទាប់ពីព្យាបាលរបួសនៅមន្ទីរពេទ្យខេត្តកំពង់ស្ពឺ ។
លោក សម សាក់ ស្នងការរងផែនព្រហ្មទណ្ឌ នៃស្នងការដ្ឋាននគរបាលខេត្តកំពង់ស្ពឺ ប្រាប់ភ្នំពេញប៉ុស្តិ៍នៅថ្ងៃនេះថា ជនសង្ស័យឈ្មោះ អ៊ាង រ៉ាដូ ភេទប្រុសអាយុ ៤០ ឆ្នាំមានរបួសត្រង់ក ប៉ុន្តែរបួសនោះត្រូវបានក្រុមគ្រូពេទ្យព្យាបាលបានធូរស្បើយហើយ។ បន្ទាប់មក សមត្ថកិច្ចលោកបាននាំខ្លួនជនសង្ស័យទៅសាលាដំបូងខេត្តកំពង់ស្ពឺ ពីថ្ងៃទី ១៥ មីនា និង ត្រូវបានលោកព្រះរាជអាជ្ញាចោទហើយចៅក្រមស៊ើបសួរលោក តុប ឈុនសុង ចេញដីកាឃុំខ្លួនបណ្តោះអាសន្នក្នុងពន្ធនាគារនៅថ្ងៃដដែលនេះតែម្តង។
លោកប្រាប់ថា៖ «បុរសសង្ស័យត្រូវចោទបទឃាតកម្មដែលមានស្ថានទម្ថន់ទោសទាក់ទង ជនរងគ្រោះ និង បទហិង្សាមានស្ថានទម្ងន់ទោសតាមបញ្ញត្តមាត្រា ២០២ និង មាត្រា ២១៨ នៃក្រមព្រហ្មទណ្ឌ»។
ជនត្រូវចោទរូបនេះ បើតុលាការកឃើញថាពិតជាបានប្រព្រឹត្តដូចការចោទប្រកាន់តាមមាត្រា ២០២ មែននោះត្រូវផ្តន្ទាទោសដាក់ពន្ធនាគារពី ១៥ ទៅ ៣០ ឆ្នាំ។ រីឯមាត្រា ២១៨ វិញ ត្រូវផ្តន្ទាទោសពី ២ ឆ្នាំទៅ ៥ ឆ្នាំ និងពិន័យប្រាក់ពី ៤ លានទៅ ១០ លានរៀល។
គួរំឭកថា កាលពីថ្ងៃទី១៤ ខែមីនា ជនសង្ស័យបានយកកាំបិតផ្គាក់កាប់ក្មេងរងគ្រោះឈ្មោះ ភ.ដ.ណ អាយុ ១ ឆ្នាំ ២ ខែត្រូវក្បាល ១ កាំបិត និងនៅផ្នែកត្រង់ក ១ កាំបិត ទើបបណ្តាលឱ្យក្មេងស្លាប់ភ្លាមៗនៅកន្លែងកើតហេតុ។
ក្មេងរងគ្រោះមានម្តាយឈ្មោះ ផ. ស.ន. អាយុ ៣០ ឆ្នាំ ជាកម្មការិនីរោងចក្រកាត់ដេរ និង មានឪពុកឈ្មោះ ភ. ស.ណ. អាយុ ៣០ ឆ្នាំ រស់នៅភូមិអំពិលផ្អែម ឃុំរលាំងចក ស្រុកសំរោងទង ខេត្តកំពង់ស្ពឺ។ បន្ទាប់ពីរត់ចូលក្នុងផ្ទះ ជនសង្ស័យបានអាកខ្លួនឯងហើយត្រូវបានសមត្ថកិច្ចចាប់ខ្លួនបញ្ជូនទៅព្យាបាលរបួសនៅមន្ទីរពេទ្យខេត្តកំពង់ស្ពឺ។
បើតាមអ្នកស្រី ពិន គីម អាយុ ៣៨ ឆ្នាំ ជាប្រពន្ធជនសង្ស័យអះអាងថា ប្ទីខ្លួនកើតមានជំងឺផ្លូវចិត្តជាច្រើនឆ្នាំមកហើយ ប៉ុន្តែព្យាបាលមិនជាទាំងគ្រូពេទ្យ និង គ្រូបុរាណខ្មែរ៕