.jpg)
ក្រុមមន្រ្តីនគរបាលខេត្តកំពង់ស្ពឺត្រូវបានឃាត់ខ្លួនកាលពីថ្ងៃទី ២២ សីហា ក្នុងករណីបាញ់បោះសេរី។ រូបថត នគរបាល
កំពង់ស្ពឺៈ តុលាការខេត្តកំពង់ស្ពឺបានចោទប្រកាន់លោក កង ភារី អធិការរងនៃអធិការដ្ឋាននគរបាលស្រុកសំរោងទង និងមន្ដ្រីនគរបាលជាបក្ខពួកចំនួន ៦ នាក់ទៀតពីបទកាន់កាប់ និងប្រើប្រាស់អាវុធខុសច្បាប់ និងឃុំខ្លួនពួកគេជាបណ្ដោះអាសន្ននៅពន្ធនាគារខេត្ដកំពង់ស្ពឺកាលពីថ្ងៃទី ២៥ ខែសីហា។ យោងតាមក្រឡាបញ្ជី លោកស្រី ទិត ដាលីន ចៅក្រមស៊ើបសួរនៃអយ្យការអមសាលាដំបូងខេត្តកំពង់ស្ពឺបានថ្លែងឲ្យដឹងកាលពីម្សិលមិញ។
សមត្ថកិច្ចនៃស្នងការដ្ឋាននគរបាលខេត្ដកំពង់ស្ពឺបានឃាត់ខ្លួនលោក កង ភារី និងមន្ដ្រីនគរបាលក្រោមបង្គាប់ជាបក្ខពួកចំនួន ៦ នាក់ទៀត ក្រោយផឹកស៊ីស្រវឹងហើយប្រើប្រាស់អាវុធខុសច្បាប់បាញ់បោះសេរីជាង ១០ គ្រាប់នៅបរិវេណសាលាស្រុកសំរោងទងកាលពីថ្ងៃ ១៩ សីហាកន្លងទៅនេះ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) ដែលបានតាមអង្កេតករណីនេះបានថ្លែងដោយសង្ស័យថា ករណីបែបនេះធ្លាប់មានអ្នកចេញមុខមកអន្តរាគមន៍ឱ្យដោះលែងវិញ។
លោក ហ៊ាន ថ្លែងថា៖ «បើសិនជាមានករណីដោះលែង ឬស្នើនៅក្រៅឃុំ ចំពោះអធិការរង និងមន្ដ្រីនគរបាលទាំង ៦ រូបនេះខ្ញុំនឹងបើកការស៊ើបអង្កេតពាក់ព័ន្ធនឹងអំពើពុករលួយព្រោះពេលនេះព្រះរាជអាជ្ញាបានសម្រេចចោទប្រកាន់ និងឃុំខ្លួនរួចហើយ»។
លោក សម សាមួន ស្នងការនៃស្នងការដ្ឋាននគរបាលខេត្តកំពង់ស្ពឺបានឲ្យដឹងថា លោក ភារី និងមន្ដ្រីនគរបាលម្នាក់ទៀតឈ្មោះ កាន់ សៅលី ជាម្ចាស់កាំភ្លើងខ្លីម៉ាក Lock អត់ច្បាប់ចំនួន ២ ដើមបានឱ្យកាំភ្លើងនោះទៅឈ្មោះ ដន សុខុម ម៉ាន់ ប៉ុណ្ណារ៉ា, ម៉ាន់ ប៊ុនណ្ណារែក, នី សុភាក់ និង ព្រីង ឡង់ឌី ជាអ្នកបាញ់ចំនួន ១១ គ្រាប់នៅកន្លែងកើតហេតុ៕
