ភ្នំពេញៈ សាលាដំបូងរាជធានីភ្នំពេញកាលពីម្សិលមិញបានប្រកាសសាលក្រមដោយសម្រេចផ្តន្ទាទោសលោក សម រង្ស៊ី ប្រធានស្តីទីអតីតគណបក្សសង្គ្រោះជាតិឱ្យជាប់ពន្ធនាគារសរុបចំនួន ៤ ឆ្នាំ និងពិន័យជាប្រាក់ ៨ លានរៀល ព្រមទាំងបង្គាប់ឱ្យសងជំងឺចិត្តដើមបណ្តឹង (មេធាវីរដ្ឋាភិបាល) ២ ពាន់លានរៀលពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។
ចំណែកគូកន ៤ នាក់ទៀតក៏ត្រូវតុលាការសម្រេចផ្តន្ទាទោសឱ្យជាប់ពន្ធនាគារពី ១ ឆ្នាំកន្លះទៅ ១ ឆ្នាំ ៨ ខែ និងពិន័យជាប្រាក់ក្នុងម្នាក់ៗ ៤ លានរៀល ផងដែរបន្ទាប់ពីជំនុំជម្រះកាលពីថ្ងៃទី ២១ ខែធ្នូ។ ចូលរួមនៅក្នុងបន្ទប់សវនាការប្រកាសសាលក្រមកាលពីម្សិលមិញមានលោក សំ សុគង់ មេធាវីការពារសិទ្ធិឱ្យលោក សម រង្ស៊ី និងជនជាប់ចោទឈ្មោះ អ៊ុក ឆុំ អតីតអនុប្រធានប្រតិបត្តិគណបក្សសង្គ្រោះជាតិខេត្តត្បូងឃ្មុំ និងជនជាប់ចោទឈ្មោះ លាស់ ឆេងឡាយ អតីតមេឃុំឃ្លាំងមាសនៅក្នុងស្រុកបវេល ខេត្តបាត់ដំបង។
លោក ចៅក្រម រស់ពិសិដ្ឋ បានថ្លែងនៅចំពោះមុខលោកមេធាវី សំ សុគង់ និងចំពោះមុខជនជាប់ចោទថា សំណុំរឿងរបស់ជនជាប់ចោទឈ្មោះ សម រង្ស៊ី និង គូកន ៤ នាក់ទៀតមាន ២ ករណីដែលសំណុំរឿងទាំង ២ ករណីនេះ សាលាដំបូងរាជធានីភ្នំពេញបានបើកសវនាការជំនុំជម្រះកាលពីថ្ងៃទី ២១ ខែធ្នូ កន្លងមក។
លោកចៅក្រមបានថ្លែងថា បន្ទាប់ពីបានស្តាប់សេចក្តីសន្និដ្ឋានរបស់មេធាវីការពារសិទ្ធិឱ្យជនជាប់ចោទ និងសេចក្តីសន្និដ្ឋានរបស់តំណាងអយ្យការមក ក្រុមប្រឹក្សាជំនុំជម្រះបានសម្រេចផ្តន្ទាទោសជនជាប់ចោទឈ្មោះ សម រង្ស៊ី ដាក់ពន្ធនាគារក្នុង ១ សំណុំរឿង ២ ឆ្នាំ សរុប ២ សំណុំរឿងមានរយៈពេល ៤ ឆ្នាំ ពិន័យជាប្រាក់ ៨ លានរៀល និងសងជំងឺចិត្តទៅដើមបណ្តឹងដែលជាមេធាវីរបស់រដ្ឋាភិបាលចំនួន ២ ពាន់លានរៀល។ លោកចៅក្រមបានបន្តថា ទន្ទឹមនឹងនេះតុលាការក៏បង្គាប់ឱ្យសមត្ថកិច្ចតាមចាប់ខ្លួនជនជាប់ចោទឈ្មោះ សម រង្ស៊ី យកមកផ្តន្ទាទោសដាក់ពន្ធនាគារទៅតាមច្បាប់ផងដែរ។
លោកថ្លែងថា៖ «ជនជាប់ចោទ សម រង្ស៊ី ត្រូវចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍តាមបញ្ញតិ្តមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌប្រព្រឹត្តនៅប្រទេសកម្ពុជាកាលពីឆ្នាំ ២០១៩»។
លោកចៅក្រម រស់ ពិសិដ្ឋ បានថ្លែងទៀតថា ចំពោះសំណុំរឿង ១ ទៀតរបស់ជនជាប់ចោទឈ្មោះ សម រង្ស៊ី មានគូកនចំនួន ៤ នាក់គឺព្រះសង្ឃឈ្មោះ ប៊ុត ប៊ុនតិញ និងឈ្មោះ ទុំ ប៊ុនថន ដែលអ្នកទាំង ២ ត្រូវសម្រេចឱ្យជាប់ពន្ធនាគារក្នុងម្នាក់ៗ ១ ឆ្នាំ ៨ ខែ និងពិន័យប្រាក់ម្នាក់ ៤ លានរៀល។ ចំណែកជនជាប់ចោទឈ្មោះ អ៊ុក ឆុំ និងឈ្មោះ លាស់ ឆេងឡាយ ដាក់ពន្ធនាគារម្នាក់ៗ ១ ឆ្នាំ ៦ ខែ និងពិន័យជាប្រាក់ម្នាក់ៗ ២ លានរៀល។
ក្នុងសំណុំរឿងដែលត្រូវបានបំបែកនេះជនជាប់ចោទទាំង ៥ នាក់ក៏ត្រូវបានចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌផងដែរ។
លោក សំ សុគង់ មេធាវី ការពារសិទ្ធិឱ្យលោក សម រង្ស៊ី បានប្រាប់ដល់ក្រុមអ្នកសារព័ត៌មាននៅក្រៅបន្ទប់សវនាការពីម្សិលមិញថា ចំពោះសាលក្រមនេះ គឺតុលាការមិនបានផ្តល់យុត្តិធម៌ដល់កូនក្តីលោកទេ។
លោកថា សាលក្រមទី ១ នេះត្រូវបានតុលាការចោទពីបទពាក់ព័ន្ធនឹងលោក សម រង្ស៊ី ញុះញង់បំភ្លៃព័ត៌មាន។ រីឯសាលក្រមទី ២ គឺលោក សម រង្ស៊ី ជាប់ពាក់ព័ន្ធនឹងការញុះញង់កងទ័ពមិនឱ្យស្តាប់បង្គាប់រដ្ឋាភិបាល។
លោកថ្លែងថា៖ «ពាក់ព័ន្ធនឹងការផ្តន្ទាទោសនេះ ខ្ញុំនឹងពិភាក្សាជាមួយកូនក្តីបន្តទៀត ដើម្បីប្តឹងទាស់ទៅសាលាឧទ្ធរណ៍។ តែជុំវិញបណ្តឹងឧទ្ធរណ៍នេះគឺកូនក្តីរបស់ខ្ញុំ គាត់ជាអ្នកសម្រេច»។
លោក អំ សំអាត នាយករងអង្គការសិទ្ធិមនុស្សលីកាដូដែលបានចូលស្តាប់ការប្រកាសសាលក្រមពីម្សិលមិញដែរយល់ឃើញថា សាលក្រមផ្តន្ទាទោសដល់លោក សម រង្ស៊ី និងគូកនរបស់គាត់នេះ ជាចំណែកមួយដែលគេអាចរិះគន់ធ្វើឱ្យជះឥទ្ធិពលមិនល្អដល់សេរីភាពក្នុងការបញ្ចេញមតិ។
លោកថា បច្ចុប្បន្ននេះមានការរិះគន់ច្រើនពីមជ្ឈដ្ឋានអន្តរជាតិពីការរិតត្បិតសេរីភាពក្នុងការបញ្ចេញមតិ សិទ្ធិសេរីភាពក្នុងការជួបជុំ និងប្រមូលផ្តុំដោយសនិ្តវិធី។ លើសពីនេះលោកថ្លែងថា៖ «សាលក្រមនេះក៏ជាការព្រមានដល់អ្នកដែលចង់រិះគន់ក្រោយៗ។ ប៉ុន្តែខ្ញុំយល់ថា ប្រទេសដែលប្រកាន់លទ្ធិប្រជាធិបតេយ្យ សេរីភាពក្នុងការបញ្ចេញមតិ និងការរិះគន់ដើម្បីស្ថាបនាគឺជារឿងសំខាន់»។
ក្រៅពីសំណុំរឿងនេះលោក សម រង្ស៊ី ដែលកំពុងរស់នៅនិរទេសដោយខ្លួនឯងនៅបរទេសនៅមានរឿងក្តីក្តាំជាច្រើនទៀតនៅតុលាការ៕
វីដេអូ៖