ភ្នំពេញៈ ប្រធានក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ លោក លិ សុខា បានប្រកាសសាលក្រមកាលពីម្សិលមិញដោយសម្រេចផ្តន្ទាទោសលោក គ្រុយ លឹមហេង អតីតអគ្គកុងស៊ុលកម្ពុជាប្រចាំទីក្រុងគុនមិញប្រទេសចិនដាក់ពន្ធនាគា ៧ ឆ្នាំ និងពិន័យជាប្រាក់ ១០ លានរៀល បន្ទាប់ពីបើកសវនាការចំនួន ២ លើក។
អ្នកនាំពាក្យអយ្យការអមសាលាដំបូងរាជធានីភ្នំពេញលោក គុជ គឹមឡុង បានប្រាប់ភ្នំពេញប៉ុស្តិ៍ពីម្សិលមិញថា លោក គ្រុយ លឹមហេង ត្រូវបានតុលាកាសម្រេចផ្តន្ទាទោសពីបទចំនួន ៤ គឺគៃបំបាត់ និងបំផ្លាញដោយទុច្ចរិត បទវីតិក្រម [យកលុយលើសការកំណត់] បទរំលោភអំណាច និងបទមិនប្រកាសទ្រព្យសម្បត្តិចាប់តាំងពីឆ្នាំ ២០១៥ ដល់ ២០១៩។
សំណុំរឿងនេះត្រូវបានបើកសវនាការជំនុំជម្រះចំនួន ២ លើក តែលោកមិនចាំថ្ងៃខែទេ។
កន្លងមកលោក ឱម យ៉ិន ទៀង ប្រធានអង្គភាពប្រឆាំងអំពើពុករលួយដែលចុះស៊ើបអង្កេតលើករណីលោកគ្រុយ លឹម ហេង ធ្លាប់បានថ្លែងថា អតីតអគ្គកុងស៊ុលកម្ពុជាប្រចាំទីក្រុងគុនមិញនេះ បានប្រព្រឹត្តបទល្មើសពុករលួយចន្លោះឆ្នាំ ២០១៦ ដល់ខែមិថុនា ឆ្នាំ ២០១៨។ លោកថា ករណីបទល្មើសទាំងនោះរួមមានការយកលុយលើសតម្លៃកំណត់ និងការប្រើអំណាចហួសជាដើម។
ក្នុងន័យនេះលោក យ៉ិនទៀង បានសង្កត់ធ្ងន់ថា លោក គ្រុយ លឹមហេង បានប្រើអំណាចដកយកលុយរបស់អគ្គកុងស៊ុលកម្ពុជាពីធនាគារចិន ១ តាមរយៈការប្រើប្រាស់ «ត្រាអគ្គកុងស៊ុល» ខុសច្បាប់អស់រយៈពេល ២ ខែកន្លងមកនៅគ្រាដែលរូបលោកត្រូវបានដកចេញពីតំណែងកាលពីឆ្នាំ ២០១៨។ នេះបើតាមការផ្សាយរបស់សារព័ត៌មានអេឡិចត្រូនិកថ្មី។
លោក អំ សំអាត មន្ត្រីបច្ចេកទេសជាន់ខ្ពស់នៃអង្គការលីកាដូបានថ្លែងថា ការផ្តន្ទាទោសរបស់តុលាទៅលើការប្រព្រឹត្តអំពើពុករលួយគឺជាគំរូ ១ ល្អ ព្រោះកន្លងមកក៏ធ្លាប់មានមន្ត្រីឯកអគ្គរាជទូតមួយចំនួនក៏ដូចជា មន្ត្រីកុងស៊ុលមួយចំនួនត្រូវផ្តន្ទាទោសពាក់ព័ន្ធអំពើពុករលួយផងដែរ។
លោក សំអាត បានបញ្ជាក់ថា៖ «វាជារឿងល្អ ប៉ុន្តែសូមឱ្យអនុវត្តនូវវិធានការនេះបន្តទៅទៀត ចំពោះអ្នកដទៃទៀតមានន័យថា អ្នកណាក៏ដោយឱ្យតែប្រព្រឹត្តអំពើពុករលួយហ្នឹង យើងត្រូវតែអនុវត្តតាមច្បាប់ទាក់ទងនឹងមន្ត្រីរាជការចំពោះអ្នកដែលប្រព្រឹត្តអំពើពុករលួយបំផ្លាញថវិកាជាតិនោះ»។
បើតាមលោក សំអាត អំពើពុករលួយជាឫសគល់ដ៏អាក្រក់សម្រាប់បំផ្លាញទៅលើថវិកាជាតិក៏ដូចជាប៉ះពាល់ដល់ការអភិវឌ្ឍជាតិផងដែរ។ ហេតុនេះ ការលុបបំបាត់ ការប្រឆាំងនឹងអំពើពុករលួយគឺជារឿងសំខាន់សម្រាប់ការអភិវឌ្ឍប្រទេសកម្ពុជា។
លោក សំអាត បានបន្ថែមថា៖ «លោកទទួលស្គាល់ថា កន្លងមកអង្គភាពប្រឆាំងអំពើពុករលួយបានបន្តនីតិវិធី មានចំណាត់ការជាបន្តបន្ទាប់ចំពោះមន្ត្រីទាំងឡាយដែលពាក់ព័ន្ធនឹងអំពើពុករលួយ ប៉ុន្តែជាសំណូមពរគឺចង់ឱ្យបង្កើនការអនុវត្តបន្តទៅទៀតចំពោះជនដែលប្រព្រឹត្តអំពើពុករលួយដោយអនុវត្តឱ្យស្មើភាពគ្នា ទោះបីជាជនណាក៏ដោយ» ៕