.jpg)
លោក ហែត ណៃ តំណាងសហគមន៍ព្រៃព្រះរកា ម្នាក់ក្នុងចំណោម ១១ នាក់ ដែលតុលាការអោយចូលបំភ្លឺករណីញុះញង់។ រូបថត សហការី
ព្រះវិហារៈ អយ្យការសាលាដំបូងខេត្តព្រះវិហារបានកោះហៅប្រជាសហគមន៍ព្រៃព្រះរកាចំនួន ១១ នាក់ ឱ្យចូលបំភ្លឺជាបន្តបន្ទាប់ក្នុងសំណុំរឿងឆបោក និងញុះញង់បង្កឱ្យមានភាពវឹកវរដល់សន្តិសុខសង្គមពាក់ព័ន្ធនឹងគម្រោងចូលរួមតវ៉ាឱ្យដោះលែងលោក រ៉ុង ឈុន ប្រព្រឹត្តកាលពីដើមខែកញ្ញា នៅភូមិក្តុល ឃុំម្លូព្រៃ ១ ស្រុកឆែប ខេត្តព្រះវិហារ។
លោក ហែត ណៃ តំណាងសហគមន៍ព្រៃព្រះរកាដែលមានឈ្មោះក្នុងចំណោមអ្នកទាំង ១១ នាក់នោះបានប្រាប់ ភ្នំពេញ ប៉ុស្តិ៍ ពីថ្ងៃទី ៨ វិច្ឆិកា ថា កាលពីថ្ងៃទី ៦ ខែ កញ្ញា ឆ្នាំ ២០២០ ប្រជាសហគមន៍ព្រៃព្រះរកាទាំង ១១ នាក់បានប្រមូលផ្ដុំគ្នានៅភូមិក្តុល ឃុំម្លូព្រៃ១ ស្រុកឆែប ខេត្តព្រះវិហារមុនពេលធ្វើដំណើរមករាជធានីភ្នំពេញ ដើម្បីចូលរួមតវ៉ាឱ្យមានការដោះលែងលោក រ៉ុង ឈុន ប៉ុន្តែពុំទាន់បានចូលរួមទេ។
លោកថ្លែងថា៖ «ពួកយើងបានមកដល់ភ្នំពេញ ប៉ុន្តែមិនបានចូលរួមតវ៉ានោះទេ ដោយដេក ១ យប់។ លុះព្រឹកឡើងក៏ត្រឡប់មកវិញ ហើយក៏ត្រូវបានអយ្យការសាលាដំបូងខេត្តព្រះវិហារកោះហៅសាកសួរជុំវិញបញ្ហានេះ ប៉ុន្តែអ្វីទាំងអស់នេះមិនមានអ្វីជាការខុសនោះទេ»។
លោក ហែត ណៃ ដែលត្រូវចូលខ្លួនបំភ្លឺនៅថ្ងៃទី ១១ វិច្ឆិកា ស្អែកនេះកំពុងពិចារណារកមេធាវី និងអ្នកគាំទ្រដើម្បីពិភាក្សាលើការស្នើសុំពន្យារពេលចូលខ្លួនបំភ្លឺ ខណៈដែលករណីនេះធ្លាប់មានអ្នកចូលខ្លួនបំភ្លឺខ្លះហើយ។
លោកថា៖ «ខ្ញុំថាចង់ពន្យារពេលសិន ដើម្បីស្វែងរកមេធាវីមកពិភាក្សាជាមុន និងរកកម្លាំងគាំទ្រឱ្យបានច្រើនបន្តិចផងដែរ ដើម្បីបញ្ជាក់ពីអ្វីដែលពួកខ្ញុំមិនទាន់យល់ដឹងពីច្បាប់ទម្លាប់ឱ្យបានត្រឹមត្រូវ និងនីតិវិធីរបស់តុលាការដែលចោទប្រកាន់មកលើខ្ញុំក្នុងគោលបំណងអ្វីច្បាស់លាស់នោះទេ...គេចោទមកលើយើង ខណៈយើងមិនបានប្រព្រឹត្តជាក់ស្តែង អីចឹងហើយ យើងចង់ដាក់ពាក្យពន្យារចំពោះសំណុំរឿងនេះ»។
លោក ឡោ ចាន់ មន្ត្រីសម្របសម្រួលអាដហុកប្រចាំនៅខេត្តព្រះវិហារថ្លែងកាលពីថ្ងៃទី ៨ វិច្ឆិកា ថា ប្រជាសហគមន៍ព្រៃព្រះរកាទាំង ១១ នាក់នោះ ត្រូវបានតំណាងអយ្យការលោក សេង ម៉េងស្រ៊ុន ចេញដីកាកោះហៅឱ្យចូលបំភ្លឺ ក្នុងនោះនៅថ្ងៃទី ៤ ខែវិច្ឆិកា កន្លងមកចំនួន ៨ នាក់ នៅថ្ងៃទី ៦ ខែវិច្ឆិកា ចំនួន ២ នាក់ និងថ្ងៃទី ១១ ខែវិច្ឆិកា ចំនួន ១ នាក់។
លោកបានចាត់ទុកការកោះហៅនេះហាក់ដូចជា ធ្វើតែលើប្រជាសហគមន៍។ ចំណែកឯឈ្មួញធំៗអ្នកដែលមានអំណាច ហើយទន្ទ្រានយកដីតំបន់ព្រៃរកា មិនមានការចាត់វិធានការអ្វីទាល់តែសោះ ហើយចំពោះការប្តឹងឱ្យមានការកោះហៅប្រជាសហគមន៍នេះមានតែអាជ្ញាធរទេ ប៉ុន្តែយ៉ាងណាលោកមិនទាន់ហ៊ានអះអាងថាយ៉ាងណាទេ។
លោកបន្ថែមថា៖ «បើនិយាយរឿងនីតិវិធី តុលាការមានសិទ្ធិក្នុងការស៊ើបរឿងក្តីណាមួយ នៅពេលដែលទទួលបានបណ្តឹងក្នុងការចេញលិខិតកោះហៅពាក់ព័ន្ធនឹងករណីសង្ស័យ ប៉ុន្តែទៅថ្ងៃមុខ ប្រសិនបើព្រះរាជអាជ្ញាតម្កល់ [មិនចាត់ការ] ជារឿងល្អសម្រាប់ប្រជាសហគមន៍ ប៉ុន្តែបើគាត់ធ្វើការចោទប្រកាន់ វាធ្វើឱ្យអយុត្តិធម៌សម្រាប់ប្រជាសហគមន៍យើង ដែលខំប្រឹងការពារព្រៃឈើ ហើយទទួលរងនូវបណ្តឹងទៅវិញ»។
លោកស្រី ភី ស៊ីថង ព្រះរាជអាជ្ញារង និងជាអ្នកនាំពាក្យសាលាដំបូងខេត្តព្រះវិហារមិនអាចសុំធ្វើការអត្ថាធិប្បាយជុំវិញសំណុំរឿងនេះបានទេកាលពីម្សិលមិញដោយទូរស័ព្ទចូល តែមិនមានអ្នកទទួល។
ប៉ុន្តែលោក ទី សុវិនថាល់ ព្រះរាជអាជ្ញានៃសាលាដំបូងខេត្តព្រះវិហារបានជំរុញឱ្យអ្នកដែលត្រូវបានកោះហៅទាំងនោះចូលខ្លួនបំភ្លឺតាមការណាត់ និងកុំមានការភ័យខ្លាច ហើយកុំស្តាប់តាមអ្នកដទៃដែលបំភ័យ តែបើមិនមានការចូលទេខាងតុលាការនឹងមាននីតិវិធីបន្ថែមទៀត។
លោកបានបញ្ជាក់ថា៖ «សូមចូលខ្លួនតាមនីតិវិធី និងតាមពេលវេលាដែលបានកំណត់ អត់មានបញ្ហាអ្វីទេ។ សូមកុំភ័យ កុំខ្លាច កុំញញើត ញញើមទៅនឹងកិច្ចការអ្វីក៏ដោយនៅពេលដែលយើងបានចូលក៏ជាបទពិសោធផងដែរបើឆ្លងកាត់បទពិសោធ និងឆ្លងកាត់ការសាកល្បងកាន់តែច្រើនកាន់តែដឹង កាន់តែដុះ និងកាន់តែមានគំនិតភ្លឺស្វាង»។
ជាមួយនេះដែរ លោកបានរំឭកថា៖ «កាលណាអត់មក គេចេញដីកាលើកទី ២ អាចបង្គាប់ឱ្យចូលខ្លួន បើចេញដីកាលើកទី ៣ គេអាចចេញដីកាចាប់អ៊ីចឹងទៅ ហេតុដូច្នេះមកឆ្លើយមក គេមិនដែលឃុំខ្លួនទេ ព្រោះមិនមែនបទល្មើសព្រហ្មទណ្ឌ។ នេះគ្រាន់តែជាបទល្មើសវិសេសត្រឹមពិន័យ»៕
