The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​កោះ​ហៅ​ព្រះ​សង្ឃ​២​អង្គ​មនុស្ស​បី​នាក់​រឿង​បាត់​នេន​១អង្គ




តុលាការ​កោះ​ហៅ​ព្រះ​សង្ឃ​២​អង្គ​មនុស្ស​បី​នាក់​រឿង​បាត់​នេន​១អង្គ

តុលាការ​កោះ​ហៅ​ព្រះ​សង្ឃ​២​អង្គ​មនុស្ស​បី​នាក់​រឿង​បាត់​នេន​១អង្គ

កំពង់ចាមៈ សាលា​ដំបូង​ខេត្ត​កំពង់ចាម បាន​ចេញ​ដីកា​កោះហៅ​ព្រះសង្ឃ​២​អង្គ​និង​ប្រជា​ពលរដ្ឋ​៣នាក់​បន្ថែម​ទៀត​ឲ្យ​ចូល​បំភ្លឺ​នៅ​ថ្ងៃទី​១៩-២០ ខែ​ធ្នូ ទាក់ទិន​ទៅ​នឹង​បណ្តឹង​បាត់​ខ្លួន​នេន​មួយ​អង្គ​ដែល​សង្ស័យ​ថា​ចៅអធិការ​វត្ត​បាន​ប្រើ​អំពើ​ហិង្សា​រហូត​ដល់​សុគត។

លោក គ្រួ អាន ក្រុម​ប្រឹក្សា​ឃុំ​ប៉ើស​បាន​ប្រាប់​ឲ្យ​ដឹង​ថា សាលា​ដំបូង​ខេត្ត​កំពង់ចាម​បាន​ចេញ​ដីកា​កោះ​ហៅ​ព្រះសង្ឃ​២អង្គ​និង​ពលរដ្ឋ​បី​នាក់​បន្ថែម​ទៀត​ឲ្យ​ចូល​ខ្លួន​បំភ្លឺ​នៅ​តុលាការ​នៅ​ថ្ងៃទី​១៩-២០​ធ្នូ ខាង​មុខ​ទាក់ទិន​ទៅ​នឹង​បណ្តឹង​បាត់​ខ្លួន​នេន​មួយ​អង្គ​ដែល​សង្ស័យ​ថា​ចៅ​អធិការ​វត្ត​បាន​ប្រើ​អំពើ​ហិង្សា​រហូត​ដល់​សុគត។ លោក​បាន​ឲ្យ​ដឹង​ទៀត​ថា៖«ខ្ញុំ​និង​អ្នក​ស្រុក​ភាគ​ច្រើន​នៅ​តែ​មាន​ការ​មន្ទិល​សង្ស័យ​មិន​ដឹង​ថា​ការ​បាត់​ខ្លួន​នេន​១​អង្គ​នោះ​ជា​ដើម​ហេតុ​មក​ពី​ចៅ​អធិការ​វាយ​ធ្វើ​បាប​ឬ​មក​ពី​លោក​នេន​នោះ​រត់​គេច​ខ្លួន​ទៅ​ណា​ទេ»។

លោក​ឲ្យ​ដឹង​ទៀត​ថា ក្នុង​រឿង​នេះ​បើ​ទោះ​ជា​មាន​ប្រជា​ពលរដ្ឋ​ខ្លះ​ចូល​ទៅ​បំភ្លឺ​ហើយ​ក៏​ដោយ​ក៏​ខាង​មន្ទីរពេទ្យ​នៅ​តែ​និយាយ​មិន​ច្បាស់​ដោយ​ម្តង​ឆ្លើយ​ថា​មិន​បាន​ទទួល​ព្យាបាល​នេន​នោះ​ទេ ម្តង​ឆ្លើយ​ថា បាន​ទទួល។ រីឯ​២​នាក់​ប្តី​ប្រពន្ធ​នៅ​ក្នុង​វត្ត​នោះ​ក៏​ឆ្លើយ​មិន​ស៊ី​ចង្វាក់​គ្នា​ដែរ។ ខណៈ​សាក្សី​ជា​អ្នក​ភូមិ​ថា​មុន​ថ្ងៃ​បាត់​ខ្លួន​គេ​ឃើញ​នេន​នោះ​ដើរ​ខ្ចី​លុយ​និង​សូត្រ​មន្ត​មង្គលការ​គេ នៅ​អំឡុង​ថ្ងៃទី​២០​មេសា តើ​ហេតុ​អ្វី​បាន​ជា​ឮ​ដំណឹង​ថា​បាត់​ខ្លួន​ថ្ងៃទី​១៣​មេសា​ទៅ​វិញ​។ លោក​បាន​ឲ្យ​ដឹង​ទៀត​ថា៖ «កន្លង​មក​លោក​ចៅ​អធិការ​អង្គ​នោះ​ធ្លាប់​ប្រើ​ហិង្សា​វាយ​នេនៗ​មែន ចរិត​កោង​កាច​នោះ​មិន​សមរម្យ​ជា​សាមណៈ​ក្នុង​ការ​សង្រួម​ឥន្ទ្រិយ​ទាំង​៦​ទេ» ។

ព្រះ​វិន័យ​ធម៌​ខេត្ត​យិត សុខា មាន​សង្ឃ​ដីកា​ថា ករណី​ព្រះចៅ​អធិការ​វត្ត​ប៉ើស​នោះ​អាច​នឹង​វិល​និមន្ត​ទៅ​គ្រប់គ្រង​វត្ត​វិញ​ក្នុង​ប៉ុន្មាន​ថ្ងៃ​ទៀត​បន្ទាប់​ពី​តុលាការ​រក​មិន​ឃើញ​ថា​មាន​ភស្តុតាង​ទេ​នោះ។ ព្រះ​អង្គ​បញ្ជាក់​ថា៖«បើ​អាត្មា​រក​ឃើញ​ថា​ព្រះចៅអធិការ​វត្ត​ធ្វើ​អ្វី​មួយ​ខុស​ពី​វិន័យ​ព្រះ​ពុទ្ធ​សាសនា​មែន​នោះ អាត្មា​ធានា​ថា​នឹង​ផ្សឹក​ហើយ​ចាប់​ដាក់​គុក​តែ​ម្តង»។

ព្រះ​ចៅ​អធិការ​វត្ត​ប៉ើស​ត្រូវ​បាន​អនុគណ​ស្រុក​ក្រូច​ឆ្មារ​នាំខ្លួន​ទៅ​មន្ទីរ​ធម្មការ​ខេត្ត​និង​មនុស្ស​២​នាក់ ទៅ​ស្នងការ​ខេត្ត កាល​ពី​ព្រឹក​ថ្ងៃទី​២១​វិច្ឆិកា ឆ្នាំ​២០១២​ពាក់ព័ន្ធ​ករណី​ធ្វើ​ឲ្យ​នេន​១​អង្គ ដែល​សង្ស័យ​ថា​ចៅ​អធិការ​វត្ត​វាយ​ជ្រុល​ដៃ​ហើយ​យក​ទៅ​ពេទ្យ​សុគត​ក្នុង​អំឡុង​៨​ខែ​មុន។

កាលពី​ថ្ងៃទី​១៣ ខែ​មេសា ឆ្នាំ​២០១២​វេលា​ម៉ោង​៩​ព្រឹក​ព្រះចៅអធិកា​វត្ត​នាម​ស្រួយ គីមហ៊ង បាន​ហៅ​នេន​ឈ្មោះ​ម៉ាន់ សុហេង​ព្រះជន្ម​២១​ឆ្នាំ មក​ស្តី​ប្រដៅ​ហើយ​បាន​ប្រើ​ហិង្សា​វាយដំ​រហូត​ដល់​នេន​នោះ​រង​របួស​ធ្ងន់​និង​ត្រូវ​ដឹក​ទៅ​សង្គ្រោះ​នៅ មន្ទីរពេទ្យ​ខេត្ត។ ព្រះចៅអធិការ​វត្ត​និង​អ្នក​ដាំ​បាយ​វត្ត​២​នាក់​ប្តី​ប្រពន្ធ​បាន​ទៅ​ដេក​កំដរ​មើល​នេន​នោះ។

ចៅអធិការ​វត្ត និគ្រោធ​នារាម ដែល​រង​ការ​ចោទ​ប្រកាន់​ថា​បាន​ប្រើប្រាស់​ហិង្សា​រហូត​ឈាន​ដល់​ការ​សុគត សាមណេរ​មួយ​អង្គ ពុំ​អាច​ស្នើ​សុំ​ការ​បំភ្លឺ​បាន​ទេ​លើ​បញ្ហា​នេះ​កាល​ពី​នៅ​ថ្ងៃទី​១៦ ខែ​ធ្នូ ឆ្នាំ​២០១២។

រីឯ​តុលាការ​ខេត្ត​ក៏​ពុំ​អាច​ទំនាក់​ទំនង​ដើម្បី​ធ្វើ​ការ​អត្ថាធិប្បាយ​បាន​ទេ​កាល​ពី​ម្សិលមិញ។

សាច់​ញាតិ​សង្ឃ​រងគ្រោះ​បញ្ជាក់​ថា ក្រោយ​ហេតុការណ៍​កើត​ឡើង ព្រះរាជអាជ្ញារង​នៃ​សាលា​ដំបូង​ខេត្ត​កំពង់ចាម បាន​ចេញ​ដីកា​ឃុំ​ខ្លួន​សាក្សី​ចំនួន​៤​នាក់ ក្នុង​នោះ​មាន​បុគ្គលិក​ពេទ្យ និង​អ្នក​បើកបរ​ឡាន​របស់​មន្ទីរ​សុខាភិបាល​ស្រុក​ក្រូច​ឆ្មារ ដោយ​រួម​ទាំង​ប្ដី​ប្រពន្ធ​ដែល​ដាំ​ចង្ហាន់​សម្រាប់​ចៅ​អធិការ​វត្ត​ផង។ ក៏​ប៉ុន្តែ​ក្រោយ​មក បុគ្គលិក​ពេទ្យ និង​អ្នក​បើកបរ​ឡាន ត្រូវ​ដោះ​លែង​ឲ្យ​នៅ​ក្រៅ​ឃុំ ដោយ​ពុំ​បាន​បើក​ការ​ស៊ើប​អង្កេត​នោះ​ទេ។ ប្រភព​បន្ត​ថា ការ​សម្រេច​ឃុំ​ខ្លួន​ជន​សង្ស័យ​៤​នាក់​នេះ ព្រោះ​ពួក​គេ​គឺជា​អ្នក​ដែល​ដឹក​សាមណេរ​យក​ទៅ​ព្យាបាល​តាម​ការ​បញ្ជា​របស់ ចៅ​អធិការ​វត្ត។

លោក ប៊ូ វីរៈ មន្ត្រី​សម្រប​សម្រួល​អង្គការ​លីកាដូ​ប្រចាំ​ខេត្ត​កំពង់ចាម​បាន​ប្រាប់​ថា ករណី​នេះ​លោក​នេន​ត្រូវ​បាន​ម្តាយ​ទៅ​ប្តឹង​លោក​ផ្ទាល់​មាត់ ហើយ​លោក​កំពុង​បន្ត​ការ​ស៊ើប​អង្កេត៕

អត្ថបទគួរចាប់អារម្មណ៍